Luka 19:5-40

⁵Ebu Iesuꞌa eꞌe habaꞌano feurirotene, ani ite ehamanadu Zagaio huniro, raenaꞌa, “Zagaio! Ḡarihe bua ovaoꞌi! E izidi ḡae neo radiꞌuma.”

⁶Zagaio ani ḡarihe sibire buanadu matuꞌu boroḡeta ane neo Iesu mae ḡihiniro.

⁷Vaze vazeꞌa eꞌe horonadu zeḡe niduꞌa gumude ḡoeriro, raenaꞌa, ''Iesu aniꞌe haḡai sauꞌa vazeḡa neo diuḡe radiuꞌohe!”

⁸Ebu ane ne zamaḡano, Zagaioꞌa iḡune edanadu Zuhiꞌa Boro niro, raenaꞌa, “Zuhiꞌa Boro, ḡianoꞌi! E izidi eḡe ḡau ḡahaꞌa zahara azaḡa ziniꞌuma. Zu eḡeꞌa vaze mazao ḡuriradu ḡau ꞌahoga meiniro reine, eḡeꞌa ḡae ḡazaḡa bare barono ziniꞌuma.”

⁹ꞌOugadu Iesuꞌa naenaeniro, raenaꞌa, “Izidi ḡae zu ḡae teite ne tibano radiuꞌeteꞌe azaḡaꞌe Badiꞌaꞌa zeḡe sauꞌanonoꞌo ḡabozeha, mazaḡa ḡae zuni ḡae vouḡa Aberahamo teige Badiꞌa mazao fieꞌohe.

¹⁰Eḡe, Vaze Ubugaꞌe, dauḡiroteꞌe azaḡa vaḡoga zu ḡabozoga veize onairo.”

¹¹Iesuꞌa Ierusalema habaꞌa hanitirotene vazevazeꞌa ꞌahige zamariro, raenaꞌa, 'Iesu ani Ierusalema habaꞌa diuḡine, ani kini reꞌuma ebu Badiꞌaꞌa ibitohauꞌeteꞌe habaꞌaꞌe zogone fureraꞌuma.' Eꞌanoꞌo ze Iesu ḡoere ize abiteꞌeteꞌe zamaḡano, Iesuꞌa hari ꞌahoga idaniro, raenaꞌa,

¹²“Vaze ꞌahogaꞌe niḡa boro. Aniꞌa kini rouga radu haba faḡa onamihi ebu bariꞌuma rae reiro.

¹³ꞌAhine ani izema onamogano, tuḡureḡa azaḡa 10 huzadu zeḡe niduꞌa moni tiba tiba ziniro. Ebu zinaꞌa, 'Moni ꞌahi hina moni borofoꞌi onamo eḡeꞌa bare onaiꞌuma.'

¹⁴U ane haba azaḡaniꞌa ani kini rouga mene uratiro. Ebu ane ḡaruna hari odohe dureꞌeteꞌe azaḡa tuḡuzadu haba zuhiꞌaḡa mazao uminiro, raenaꞌa, 'Ani emeḡe kini rouga mene urateꞌohe!'

¹⁵Rehano haba zuhiꞌaḡaniꞌa ani kinio ohonadu bare onairo. Aneꞌa moni ziniroteꞌe tuḡure azaḡa huzadu zeꞌa nougenouge moni borofiroteꞌe ederihi rae reiro.

¹⁶Ebu tuḡure vazeḡa ibiꞌaniꞌa ane vaḡe onaadu raenaꞌa, 'Zuhiꞌa, ḡaꞌa iniroteꞌe moni tiba hina moni 10 haḡaeha.'

¹⁷Ane zuhiꞌaꞌa ninaꞌa, 'Manoḡa taugi! Ḡaꞌe tuḡure vazeḡa manoḡa! Ḡa gau komeꞌa faine odohe gaueha uꞌano, neḡa neḡa niduꞌa 10 ḡianeꞌeteꞌe vazeḡano ohoꞌiꞌuma.'

¹⁸Tuḡure vazeḡa ꞌaheuḡaniꞌa onaadu zuhiꞌaḡa ninaꞌa, 'Zuhiꞌa, ḡa iniroteꞌe moni tiba hina bare moni fuꞌo haḡaeha.'

¹⁹Ane zuhiꞌaꞌa naenaeniro, raenaꞌa, 'Manoḡa tauḡi! Ḡa zuni neḡaneḡa niduꞌa fuꞌo ḡianeꞌeteꞌe vazeḡano ohoꞌiꞌuma.'

²⁰Rehano tuḡure vazeḡa ꞌahoganiꞌa onaadu raenaꞌa, 'Zuhiꞌa, ḡa moni ahiꞌeꞌe. Eḡeꞌa mene daunoga veize dabua hina umadu uꞌuru tiro.

²¹Ḡaꞌe vaze riḡa. Vazeꞌa tiroteꞌe ḡauḡa ḡaꞌa maꞌohe, zu vazeꞌa ḡoraroteꞌe ḡauḡa ḡaꞌa hiriveꞌohe. Eꞌanoꞌo e ḡa mazao rihanadu ꞌouge haḡairo.'

²²Ane zuhiꞌaꞌa naenaeniro, raenaꞌa, 'Ḡaꞌe tuḡure vazeḡa sauꞌa! Ḡaꞌa raꞌeteꞌe ḡoeꞌa uꞌano, e ḡa aduga ḡaniꞌuma! Eꞌe vaze riḡa radu vazeꞌa tiꞌeteꞌe zu ḡorauꞌeteꞌe ḡauḡa maꞌohe rae ederifone,

²³ḡa nougadu e moni moni neḡano mene tiro? ꞌOugifone e bare aradu moni eꞌe bare ragate meifo.

²⁴Ebu ani vaetadu uhira edaroteꞌe azaḡa ziro. 'Ani mazao moni tiba eꞌe moꞌi, ebu moni 10 mateꞌe tuḡure vazeḡa hanoꞌi!'

²⁵Rehano zeꞌa ninaꞌa, 'Zuhiꞌa, ani moni 10 amahi maha.'

²⁶Ani naenaezinaꞌa, 'Oꞌe, rehano e ꞌahige rae zihi. Iniu vaze nagini hideꞌeteꞌe faine odohe gauine, ani hena borofe hidiꞌuma. Rehano iniu vaze nagini hideꞌeteꞌe mene faine odohe gauine, ani mazao nagini komeꞌa zuni meiniꞌuma.

²⁷Ebu eḡeꞌa kini rouga mene uratiroteꞌe agire azaḡa tutuze aradu eḡe zamao mau ruzoꞌi!”

²⁸ꞌOuge radu Iesu ani ane tahiꞌatahiꞌa zamao Ierusalema habaꞌa uꞌa itiro.

²⁹Olive maḡano Betefage zu Betania neḡano feurirotene, ane tahiꞌa ꞌaheu tuḡuziro.

³⁰Ebu zinaꞌa, “Zama mone neḡa onamoꞌi. Diuḡine, doniki modohuḡa, vaze ꞌahoganiꞌa mene ehoroga ḡauḡa eꞌea ꞌute touga horoniꞌuma. Ebu fuhiꞌadu ꞌahi mae aroꞌi!

³¹Vaze ꞌahoganiꞌa ḡadizenaꞌa, 'Nougadu fuiꞌeꞌohe?' roꞌidene, 'Zuhiꞌa Boroꞌa urateꞌohe,' rae noꞌi!”

³²Iesuꞌa ziroteꞌe idunaḡano ze onamiro ebu doniki modohuḡa horoniro.

³³Ze eꞌe fuhiꞌeꞌenogano, doniki modohuḡa eꞌe azaḡaniꞌa ḡadiziro, raenaꞌa, “Za nogadu eꞌe fuhiꞌeꞌohe?”

³⁴Zeꞌa naenaeninaꞌa, “Zuhiꞌa Boroꞌa urateꞌohe.” Ze ꞌouge reirotene doniki modohuḡa azaḡaniꞌa ziniro.

³⁵Ebu ze doniki modohuḡa mae Iesu vaḡe onamadu dabuaze doniki modohuḡa ḡarunio zahariro, ebu Iesu ani rana tiriro.

³⁶Iesuꞌa onameꞌeteꞌe zamaḡano, vaze ḡuḡuvaḡaniꞌa dabuaze ane ibio hirau onamiro.

³⁷Ebu ani Olive maḡanonoꞌo ovoeꞌeteꞌe ibiḡa hanitiro. Eꞌea Iesu ḡaruna hegoteꞌeteꞌe vaze ḡuḡuvaḡa niduꞌa onameꞌenogano matuꞌuzeta huauꞌenaꞌa, Badiꞌa niguniro, mazaḡa ze Iesuꞌa haḡainuteꞌe haḡai gigiꞌaḡa niduꞌa horoniro.

³⁸Zeꞌa raenaꞌa, “Zuhiꞌa Boro ane niḡano onaeꞌeteꞌe kiniḡa nigunoꞌi! Adureo uniho manoḡa, ebu hitana huneo Badiꞌa nigunoga!”

³⁹Rehano vaze ḡuḡuvaḡa boꞌaḡano Farisea azaḡa nuꞌa raenaꞌa, “Ihore vazeḡa, ḡa ḡaruna hegoteꞌeteꞌe azaḡaniꞌa ꞌouge raꞌeteꞌe gararoꞌi!”

⁴⁰Iesuꞌa naenaeziro. “E mene ꞌougiꞌuma. E ziꞌohe, ze mene niguhine, hadi zeḡeꞌa huanadu eḡe niguhiꞌuma.”