Lucas 19:5-40

⁵Pegdateng i Jesus doton te kayo pinenitan i Sakeo, limengag sikandin aw minikagi, “Sakeo, ayas ka tenà, so keilangan meg-ogpà a kidoen te balay no te aldaw seini.”

⁶Ayas timenà si Sakeo, aw inibing din si Jesus doton te balay din, aw migsagman kandin, aw neluba se pedowan din.

⁷Meneng simila se kedita te otaw kimità kenyan, kagi dan, “Medaet iyan, so midegà sikandin kidoen te balay te otaw nelegeb te salà.”

⁸Migpedapag si Sakeo diyà ki Jesus aw minikagi, “Pengolo, seini se inangen ko. Ibegay ko se ketengà te kedònan ko diyà te menge otaw nelimahan. Aw migleges a te otaw memegay kanak te kwarta, yan se lintapan ko te mekeepat.”

⁹Minikagi si Jesus, “Aldaw seini, mekelowà ka den lekat te salà, so nemenal ka den kanak iling te pegpemenal i Abraham gebii.

¹⁰Dimini a te tanà Timanem Migpekeotaw amon tewalen ko se otaw nelegeb te salà, aw ipelowà ko dan.”

¹¹Gayed egpenenalan se kedita te otaw diyà ki Jesus, aw mig-indan sikandin te tegdeyanan, so medapag den sikandin te Jerusalem, aw eden dan aw agpet den megtebò se Timanem lomowan diyà kandan.

¹²Yan se doun te minikagi sikandin, “Doen melangkaw otaw dimoton te mediyò ogpeanan amon inangen sikandin selotan te lonsod din, aw penga niyan molì amon lomowan.

¹³Te wedà pa kesayo, tinawal din se sempolò sineligan din, aw imbegay din diyà kandan se kwarta, sebad gatos diyà te teg sebad-sebad kandan. Minikagi sikandin, ‘Seini se kwarta gemiten niyo te pegnigosyo dalem te iyogan ko.’

¹⁴Nayan, se doma otaw eg-ogpà kidoen te lonsod sìyan, wedà dan keibeg aw meinang sikandin selotan lomowan diyà kandan. Penga te pegkesayo din, doen otaw insogò dan mikagi diyà te gobirno te eked dan keibeg aw otaw sìyan se lomowan diyà kandan.

¹⁵Meneng gayed sikandin neinang selotan. Peg-olì din, impeangay din se sempolò sineligan din, sìyan binegayan din te kwarta, so ibeg din ketegahan aw pila se kedakel te gamad dan.

¹⁶Dimateng se tagnà aw minikagi, ‘Sir, se sebad gatos imbegay no diyà kanak, neinang iyan sebad melalan.’

¹⁷Minikagi se selotan, ‘Mèpiya se ininang nikaw. Pengkey deitek se imbegay ko diyà kamno, meneng keseligan ka, aw yan se doun te inangen ta den gobirnador lomowan diyà te sempolò lonsod.’

¹⁸Dimateng se ikedowa sineligan aw minikagi, ‘Sir, se sebad gatos imbegay no diyà kanak, neinang iyan lima gatos.’

¹⁹Minikagi se selotan, ‘Inangen ta den gobirnador lomowan diyà te lima lonsod.’

²⁰Penga niyan, doen sineligan dimateng aw minikagi, ‘Sir, iolì ko den diyà kamno se sebad gatos imbegay no diyà kanak, so intagò ko iyan diyà te kelobaw aw in-eles ko.

²¹Wedà ko iyan gemiti, so nelemitan a kamno, so mebolot ka otaw. Eg-ebaten no se wedà no kepegodi, aw eglegeniyen no se intanem te doma otaw.’

²²Minikagi se selotan, ‘Ontò medaet se ininang nikaw. Pineokit te inikagi no sìyan, impetaga-taga no den te keilangan ipelumun ta. Minikagi ka te ontò a mebolot, so eg-ebaten ko se wedà ko kepegodi, aw eglegeniyen ko se intanem te doma otaw. Aw netegahan no iyan,

²³keilangan ipebeles no peden se kwarta ko diyà te doma otaw amon iolì iyan diyà kanak te peg-olì ko sipat batà niyan.’

²⁴Penga niyan, minikagi se selotan diyà te menge doma otaw kidoen, ‘Ebati niyo se sebad gatos imbegay ko diyà kandin, aw begayi niyo iyan diyà te otaw doen sebad melalan.’

²⁵Meneng minikagi dan, ‘Pengolo, eked iyan kepakay, so tapay den doen sebad melalan diyà kandin.’

²⁶Timaba se selotan, ‘Penenalan kaw te kagi ko. Se otaw egkeseligan, yan se begayan ko te labi pa dakel. Meneng se otaw kenà egkeseligan, yan se ebatan ko te imbegay ko diyà kandin.

²⁷Meneng labi pa medaet se pelumun ko diyà te menge poon ko, sìyan wedà keibeg te peglowan ko diyà kandan. Ibingi niyo dan dini kanak, aw imetayi niyo se kedita dan.’”

²⁸Penga te peg-ikagi i Jesus kenyan, nekeonà sikandin te doma otaw pesalo doton te Jerusalem.

²⁹Pegkedapag din kidoen te lonsod te Bitpahi aw Bitanya doton te ongan te bontod te Olibo, insogò din se dowa tinoledaan din,

³⁰kagi din, “Onà kaw doton te lonsod sida peselowan tadon. Aw domateng kaw, ketelaan niyo se nati te kodà. Iniketan iyan, meneng wedà iyan lumun kesekayi te otaw. Lebadi niyo, aw ibingi niyo dini.

³¹Aw doen otaw meg-insà kenyo te nengà lay linebad niyo iyan, ikegihi niyo te keilangan sekayan iyan te Pengolo niyo.”

³²Nesayo se didowa dan insogò din, aw netelaan dan iyan iling te inikagi din diyà kandan.

³³Peglebad dan te lobid in-iket te nati, mig-insà se tig-apò, “Nengà lay linebad niyo iyan?”

³⁴Timaba dan, “Keilangan sekayan iyan te Pengolo day.”

³⁵Penga niyan, inibing dan se nati doton ki Jesus. Menge saol dan se in-ampal dan diyà te getan te nati, aw impesakay dan si Jesus.

³⁶Pegsakay din, inladlad te menge doma otaw se saol dan doton te dalan peselowan din, so yan se ketanem dan aw segmanen dan se otaw meinang selotan.

³⁷Pegkedapag i Jesus te lonsod te Jerusalem, te wedà pa topang te bontod te Olibo, migtebò se kedita te otaw timaking kandin dimuyun te Timanem te dakel se kagi dan. Ontò dan neluba aw migpesiontong dan diyà te Timanem so medita se kepelahan ininang i Jesus tapay dan kinità.

³⁸Migpegais dan, “Iduyun se Selotan seini insogò te Pengolo tadon Timanem. Begayan kidon din te kelinaw te pedowan lekat te langit. Iduyun den se Timanem.”

³⁹Doen heman menge Parisiyo timaking ki Jesus, aw minikagi dan diyà kandin, “Sir, segdahi se peg-ikagi dan kenyan.”

⁴⁰Meneng minikagi si Jesus, “Penenalan kaw kanak. Simpana mepenek se menge otaw seini, metoman somelilin kandan se menge bato megpegais aw domuyun kanak.”