Luk 19:5-40

⁵Jises edek eme isos bahandra kei nane iy udu aliy, ya madan anya ki loke badeh, atou iy. Eme Jises tiye i tan anya, “Sakiyas, ou ame andri suwi, na dah kameh jo anya kewek asiu tam.”

⁶Eme iy ales eme andri, ndrinen badeh sekesek labai, ma iy kuhi Jises i asiu tan.

⁷Ya eme iri lau atou badeh, iri nunu-uh nunu-uh anya, “Aha kanyolom se! Iy badeh, ilih amadin asiu ta ndramak ari ta amekes kandriyen ndra-in.”

⁸Sakiyas eme ales ere loke udu asiu tan, tiye sahou i ta Laban anya, “Laban, ou ndratou! Na dah kameh jo edeu lakou tek ranah mara-ei kameh i tiri lau tiri lakou bwe. Ya, i buku none jo mene ndrabene-ei rayah lakou tiri ndrame tek, idah kameh, jo edeu lakou san hasan ja, i la-u toro mene ja.”

⁹Eme Jises tiye i tan i buku doh, “Na len dah Kindrei ndrasebenei oro ndramak badu asiu dah, tasah na dah, ndramak dah, ndrasan lundriye Abraham.

¹⁰Tasah, Nadu Ndramak Awas eme andri dah badeh, ta asilah ma ta aseben are oro taku ta kandriyen ndra-in.”

¹¹Iri lau anuhun iy asehek sahou nane dah kahis le badeh, iy asehek sahou sokek i tiri, tasah iy ndrame mirihik ta Jerusalem. Eme iri lau lomondra anya, idah kameh Kindrei atondrok kon dan ai?

¹²Eme Jises anya, “Na len ari badeh, ndramak batun ta boho kamen ra-em badeh, anya kili kon munyak ari udu len, ta iri kadeu iy kasahan kabin ta atondrok iri, ano iy barame hamon ja.

¹³Eme iy luhi oro lohowan tan ma ronoh ame, ya iy atehei luk ma luwa (K200) i mine oro. Udu bolo luk ma luwa (K200) doh badeh, iy ari ari akohok lunek (K20). Ano iy tiye i toro i buku doh, ‘Ado kadeu luk doh, ki ta amekes lahou, ya kaliu bundruwen keme hamon, winiya le jo barasahan.’

¹⁴“Arile, iri lau badu kon tan baseken iy asahan kabin bwe. Eme iri suni iri lau rayah are hamon tan ala, ta tiye i tan anya, ‘Ahi bwale ahi ndramak kede-eh asahan kabin tahi.’

¹⁵“Arile, bwe adeh, iy ndrasahan kabin ai. Ano iy eme hamon eme kon. Eme iy suni sahou ili toro lohowan mene iy edeu luk i mine oro ame, ya iy ndremenya oro ta sabe handru oro ndraluwi ndrame na luk mene.

¹⁶“Eme iy ari ma mwena ili anya, ‘Tinan tek, luk tam mene, badeh, jo ndraluwiy luwa (K200) ja ndrame hawe lunek (K20) mene eme minek.’

¹⁷“Eme kabin tan anya, ‘Lohowan tek, ou mwasin handru. Ou tondrokei luk nadu bwisik asahan sola, ou kameh atondrok kon tinan ronoh udu baha tondrok tam.’

¹⁸“Ano iy ari eme ja anya, ‘Tinan tek, luk tam mene badeh, jo ndraluwiy rawa (K100) ja ndrame hawe lunek (K20) mene eme minek.’

¹⁹“Eme kabin tiye i tan anya, ‘Ou kameh atondrok kon tinan limeh.’

²⁰“Ano iy ari eme ja anya, ‘Tinan tek, luk tam mene asah idah, jo su-iy na ndrari kolau, ma tone udu abe-en ou.

²¹Jo badeh, inoh ou, tasah ou badeh, ndramak ta losen. Ou akohok lakou laleyah ma akohok lakou badu bwisi limem bwe.’

²²“Eme kabin tiye i tan anya, ‘Ou lohowan ndra-in! Jo kameh edeu maha-an ewek tam in hamon ta sahou tam. Ou tanam jo badeh, ndramak ta losen. Jo akohok lakou laleyah ma akohok lakou badu bwisi limek, jo atah bwe.

²³Ya, i buku sah handru, ou batehei luk tek bala bolo buk ta ndrahu luk bwe? Ya, i buku none jo keme hamon badeh, jo winiyan andrei ma hawe bundruwen ale.’

²⁴“Ano iy tiye i toro lau nane ales are mirihik dah, anya, ‘Ado kakuhi luk ma lunek (K20) tan, ya katehei ki ta ndramak nane luk ma luwa (K200) udu minen.’

²⁵“Eme oro lau tiye i ta kabin anya, ‘Tinan taso, iy mene ndrandrei luk ma luwa (K200) bwena mene o!’

²⁶“Arile, ndramak tinan dah, tiye i toro ja anya, ‘Jo katiye tado, are lau oro mene ndrakohok bwena, idah kameh oro akohok i la-un ja. Arile, are lau oro sese le udu aliy, idah kameh kuhi mari ano iu.

²⁷Ma ado katiyani are lau oro mene anya jo sasahan kabin badeh, kame, ya ado kadai oro kamak kare madak.’”

²⁸Jises asehek sahou doh, ano iy edek in bwena toro iu ili Jerusalem.

²⁹Iy edek eme mirihik ta kon Betapes ma Betani, udu loboho kesehe mandrei aloh Olip. Eme iy suni uru lau tan la-uh ma tiye turu anya,

³⁰“Ah kala kon udu bwena ta to badeh. Ya ah ala bolo kon le kameh ah atou donki ari loweu, ari ndramak bamanyah bare bwele-en bwe le. Ya ah katolowei malou, ma ah kasiriniy keme dah.

³¹Ya, i buku none are lau kandremenya ah anya, ‘Ah anya katalou malou tan ta sasah?’ Ah katiye ki buku doh, ‘Laban gok udu tan.’”

³²Eme uru lau tan nane ala badeh, atou udu aliy, i le buku none Jises nane ndrasehek turu.

³³Ya uru talou malou kahis le badeh, iri lau ta nadu donki dah, anya, “Hei, ah anya katalou donki badeh, ta sasah?”

³⁴Eme uru tiye i tan anya, “Laban gok udu tan.”

³⁵Eme uru sirini iy ili hawe Jises, ano oro lowosani kolau toro lawe-en badu bwele-e awin toro i konan, ma bwese-ei Jises manyah udu la-un.

³⁶Eme iy edek ili badeh, iri lau ame asin awin tiri lawe-en ya iri talaha in san.

³⁷Ano iy edek eme mirihik ta kon tinan, san ili andri ili bwilin ndrondro-ou Olip. Eme iri lau solo-an badu hamon tan badeh, iri sekesek tinan labai, ma hawe iri atudun nyara Kindrei na boho iri i loken, ta lahou tinan mari mene iri ndranyolom ndra-au.

³⁸Ma iri anya, “Kasekesek ki ta kabin! Kasore nyaran! Iy eme ta nyara Laban!” “Mondrei udu kandrah, ma lomadan ki ta Kindrei badu loken!”

³⁹Eme oro Parasi rayah ado bolo iri lau nane, tiye i ta Jises anya, “Ndramak ta leheya, ou abarah iri lau tam kandru-uk!”

⁴⁰Eme iy tiye i toro anya, “I buku none oro kandru-uk kameh iri bek kameh katubuni iri, ma iri kasarakau.”