Luka 19:5-40

⁵Eme Jesu e ira fisirâ fime feme honerâ ʒiŋuc âzâcnewec: “Zakaio go picpac wahac, no miŋecgac ficgao iqicgupemu.”

⁶Mume izia picpac jaha waharâ bubiaŋ manahuc ficticnao jowame fepic.

⁷Eme ŋic sasawa jaŋe i honerâ mana sâqorerâ mumbiŋ, “E wemocte ŋic sâqocnere ficko fejec fokac.”

⁸Zakaio eki ine Jesure maŋfuŋko rarâ muwec: “Manakic, Wofuŋ, moneŋ mafa‐nane sâckoa bâtâc barâ tucne ŋic hapetac jarepemu, â ŋic gâcne moneŋ sâc jâuruhuc jowac ropo ine ropo sâc i fohame baferâ okacne bazu‐jarepemu.”

⁹Eme Jesuzi muwec: “Ŋic kecʒi Abrahamte ɋâric jaha, irec ere ficko miŋecgac miti fuame biaŋkekac.

¹⁰Ŋic Fâri Wâtuŋne e ŋic sâqorekicne rocjoparâ bâpiaŋ‐jopazore wahawec hâcne.”

¹¹Jesu e Jerusalem hae bâqiŋkeme ŋic dâŋticne manambiŋzi mumbiŋ, “Ʒi Anuture uucmaŋ fua taniŋkeocte dameŋne maickekac.”

¹²Eme irec Jesuzi dâŋ suŋsuŋne moc ʒiŋuc jazawec: “Ŋicbomboŋ moczi, ŋicwofuŋ sâkorao ra mupe mâreŋ soŋaŋ âkendâŋnume risiezepac, muhuc mâreŋ wiwicko rawec.

¹³Raocte kiŋaŋ motecfâcne 10 hefârec‐joparâ moneŋfoŋ mocjaha mocjaha muhuc jarewec: ‘Ŋoŋe moneŋ ʒi kime kiŋ qahuc basawehuc juhapie risiezepac.’

¹⁴Rahame ŋicfâcne ere takic‐jopawecte ŋic kiŋaŋ sorec‐jopapie ʒâhec rarâ ŋicwofuŋ sâko ʒiŋuc âzâcnembiŋ: ‘E mâreŋ soŋaŋ‐nâŋec mi juocte muŋgopeneŋ.’

¹⁵Eme ŋicwofuŋ sâko e sifu mâreŋ soŋaŋ âkendâŋneme risiewec. Risierâ kiŋaŋ motec moneŋ jarewec jaŋe ʒiŋuc muhuc hefârec‐jopawec: ‘Moneŋ ŋarepo i giene bahuc hotâckekupie wezimuc fuawec?’

¹⁶Hefârec‐jopame kiŋaŋ motec moczi fisirâ muwec, ‘Bomboŋ, go moneŋfoŋ mocjaha naremeŋ izi furune 10 kime fuawec.’

¹⁷Mume ʒiŋuc âzâcnewec: ‘Sowine kiŋaŋ motec biaŋne, go wiac omanere gie aimuŋ bameŋte noni hae 10 jaŋere soŋaŋ râecgupe juzemec.’

¹⁸Iŋuc mume kiŋaŋ motec moczi fisirâ muwec, ‘Bomboŋ, go moneŋfoŋ mocjaha naremeŋ izi furune 5 kime fuawec.’

¹⁹Mume ʒiŋuc âzâcnewec: ‘Sâcne, go hae 5 jaŋere soŋaŋ juzemec.’

²⁰Eme kiŋaŋ motec moczi fisirâ muwec, ‘Moneŋfoŋge ʒi, no qoruczi foŋkerâ aimuŋ râepe fowec.

²¹Go ŋic gereŋ gereŋne, go gahac wiac mi hurehuc gâcnezi bâfuapie rozo muekic, â go gahac gie he sarac mi ehuc gâcnezi bapie fârine fuame nâzo muekic. Eme no irec araŋ bagarehuc moneŋge aimuŋ bajupo.’

²²Mume bomboŋzi ʒiŋuc âzâcnewec: ‘Kiŋaŋ motec sâqocne go, gahac dâŋ mumec ijaha bâtikie‐garekopac; no ŋic gereŋ gereŋne, no nahac wiac mi hurehuc gâcnezi bâfuapie rozo muekopac, â no nahac gie mi he sarac ehuc gâcnezi bapie fârine fuame nâzo muekopac.

²³Go fuŋne‐nane iŋuc manahuc moneŋ‐nane moneŋŋic jaŋerao râetec jaŋe kime kiŋ qakupie sawehame risierâ rozapo.’

²⁴Iŋuc murâ ŋic domambiŋ jaŋe ʒiŋuc jazawec: ‘Ŋoŋe moneŋfoŋ‐ticne jâoc rorâ 10 bajukac e râceniŋ.’

²⁵Eme jaŋe mumbiŋ, ‘Hâc, bomboŋ, e 10 bajukac i!’

²⁶Eme muwec, ‘No ŋazape mananiŋ, moc e wiac râcnekicne bajume kiqecnecnezo, â moc e wiac râcnekicne mi bajume jâoc rozo, eme mâc juzejec.

²⁷Râsifâc‐nane ŋicwofuŋ‐jeŋic mi jupere muŋgopieŋ, ine bacjopa warerâ honehape jopa mizieniŋ.’”

²⁸Jesu e dâŋ i mufârerâ Jerusalem haeo fisiocte rawec.

²⁹Raku Oliwa tikio ferâ Betefage â Betania hae bâqiŋ‐jofawec. Ehuc motecfâcne jaŋeraonec jajahec ʒiŋuc muhuc sorec‐jofawec:

³⁰“Hae rajecko ŋekac ira ranic. Rarâ doŋgi motecne niŋgiŋko domakac i bâfuanicmu. Motecne i ŋiczi fainao mi ŋekicne furune. Eme i bâfuarâ firuerâ bareniŋ.

³¹Firuepire ŋic moczi ‘wemocte rokopirec?’ mume ʒiŋuc muhuc âzâcnenic: ‘Wofuŋzi irec mukac.’”

³²Mume motec jahe rarâ muwec sâc bâfuapic.

³³Eme doŋgi firuepire rune jaŋe mumbiŋ, “Ŋohe wemocte goroŋkekopirec?”

³⁴Jahe mupic, “Wofuŋzi irec mume rokoperec.”

³⁵Iŋuc murâ Jesurao bararâ fainao ŋaqi‐jeŋic râerâ Jesu sâsepie fewec.

³⁶Ferâ rame ŋaqi‐jeŋic hatao rumacke rambiŋ.

³⁷Eme Oliwa tiki heâŋnao huhuctecne kikefuŋ gurufâc‐ticne jaŋe mâsi‐ticne fuŋne fuŋne honembiŋ irec manasurâ ʒeri ehuc Anutu mucne bacnembiŋ.

³⁸Ehuc fânâŋkehuc ʒiŋuc mumbiŋ: “Ŋicwofuŋ‐nâŋec Wofuŋte micte warekac e mumbiaŋkenaŋ, faic sâmbâŋko wama bumâteŋ fokâc â hae faic micne ira ʒeri mumuteŋ fokac.”

³⁹Iŋuc muhuc fânâŋkepie farisaio moc moc ŋicŋondeŋko jumbiŋ jaŋe ʒiŋuc âzâcnembiŋ: “Qaqazu, qâjâpecfâcge qatara‐jaretec beheniŋ.”

⁴⁰Mupie jazawec, “No ŋazape mananiŋ, jaŋe niniŋkeniŋmuo qânâzi owackeniŋmu.”