Luka 19:30-41

³⁰inbe iwete pang di nen, “Angru kamuku a kalo ye malala yo iken pang dama i. Ngan kumata be kapa le lo pombe nga, ngan ole kakamata asara ke solanga di tooltool yo ene donki i, in kase paunu atu yo tiwatu i. Ngan donki tani in tool sa iwur pono a idada ye pitiao. Lo ngan be angru karu ooroo ki, inbe kadede a kasi.

³¹Le kumata be tool sa ikamatang le itorang nen, ‘Ai, nga yelei a karu ooroo ke donki in nga?’ ngan kawete panga nen, ‘Tool Mai be iyei urata ki ye ngan.’ ”

³²Motong la di galiunu ru tina yo iwanga di nga, ngan timuku a tilo ngan le lo yaru tikamata so dawa ben tina yo Yesu iwete pang di ye nga.

³³Motong la yaru be tiru ooroo ke donki natunu tani, ngan di taunu tikamata di le nga titor di nen, “Ai, nga yelei a be angru karu ooroo ke donki natunu in nga?”

³⁴Ngan tiyei ne, “Tool Mai be iyei urata ki ye ngan.”

³⁵Motong la yaru tidede donki tani in a tidu pang ye Yesu. Tidu, motong la tidur sousoungu matolene kidi ngan a tiyoo lo donki tani in pono, inbe tiyiti Yesu lo iwur ye.

³⁶Motong la yeisa be donki tani isola a be itoo dada a ilo, ngan le di tooltool kapala yo tiye tipa nga, ngan tidur sousoungu matolene kidi lapau a tiyoo du dada katene ye ni yo be ipa ye a ilo i.

³⁷Ngan ise potai pang ye ni yo dada ki ipa ke kawal Olip a be idu i, motong Yesu di galiunu malala mai tina yo titoo nga, ngan lodi ponana a tiyitmaka Maro ene, yesoo ye mos tina le imot yo Yesu iyei a tikamata ye matadi koot nga. Le nga koodi le mai nen,

³⁸“Maro ole iyei urata dook mata pang ye tool kuto mai yo isi ye Tool Mai ene i. Maro yo iyepe ye malala ki ete ni, in iyei idi tooltool le imot le tayepe ye lo silene ki. Le tayeie ene le ilo ete ke be di tooltool tipayiti ye!”

³⁹Bong ngan di Paresi pattu yo tipa kataunu ye di tooltool malala mai tina ngan tilongo yo koodi nen nga, le nga tiwete pang Yesu. Tiyei ne, “Pannoongoo, kulele di galium nga a koodi dookoot!”

⁴⁰Motong la Yesu iraua betanga kidi nen, “Awete pang nen, kumata le be alele di nga, ngan ole pat nga di tapdi la be koodi a tiyitmaka Maro ene nga.”

⁴¹Yesu ipa a ilo potai pang Yerusalem, ngan ikamata, le nga itang ye.