Lucas 19:30-41

³⁰Oquemelfejque: ―Xeyöcö ipa inu puieblo niepaca. Cuöc nencalaquesque ompa, nenqueniextisque sente purojconetzi elpetas. Ayemo öque ipa tlejco. Xectojtomacö, hua xecualecacö.

³¹Tlö canajyeca nemiechtlajtlanis: “¿Tlica nenquetojtoma?” ejqueyi nenquenönquelisque: “Tlöcatzintle quenesesitöruro”.

³²Hua uyajque tli oquentitlanque, hua oqueniextejque quiene oquemelfejque.

³³Hua cuöc oquetojtontaya inu purojconetzi, itiecohua de inu purojconetzi oquemelfejque: ―¿Tlica nenquetojtoma inu purojconetzi?

³⁴Hua yejua oquejtojque: ―Tlöcatzintle quenesesitöruro.

³⁵Yecuöquenu oquehualecaque tieca Jesús. Hua oquetlötlölejque intlaquie ipa inu purojconetzi, hua ipa tietlejcabejque Jesús.

³⁶Hua cuöc ye biloaya yejuatzi, quesoaya intlaquie ipa ojtle.

³⁷Hua ye axihuato itlac inu ciudad, cöne mopeloa ojtle itlac inu Tepietl de los Olivos. Noche inu meyactie tiemachtejcöhua ca meyac pöquelestle opiejque tiechamoöya Deus ca checöhuac tlajtule por noche tli tietzöbetl oquejtaque yejua.

³⁸Oquejtoöya: ―¡Ma tetieteochihuacö tietucöyupa Tlöcatzintle nöiloac rey öque biloatz! ¡Ma uye yecsiebelestle ompa elfecac, hua yectieniebelestle ompa tlacpac!

³⁹Yecuöquenu seque de inu fariseos de tli ompa tlamachyöya otieyelfejque: ―Maestro, xequenmajajfele inu momachtejcötzetzihua.

⁴⁰Yejuatzi onöhuatihuac, oquemelfejque: ―Nemiechelfea que tlö ini nöncate quetzacuasque incamac, teme tzajtzajtzesque.

⁴¹Hua cuöc ye itlac onaxihuato oquejtaque inu ciudad, hua chucoac ipampa yaja.