Isanquienare Irocashi 19:30-41

³⁰icantaqueri: —Pijate anta nampitsiqui, pineapaaqueri voro itsatacotaca anta. Tequera inquijacoyeeteari. Pintsatacoreapaaqueri, pamaquenari.

³¹Ariorica irisampiyeetempi: “¿Paita pitsatacoreantariri?” Ari pincanteri: “Icoaqueri Avincatsarite”.

³²Ari ijajeitanaque apite, ineapaaqueri icantaqueriri Jesoshi.

³³Ari itsatacoreapaaqueri. Irosati isampitantacari ashitariri: —¿Paita pitsatacoreantariri novorote?

³⁴Yacanaqueri: —Icoaqueri Avincatsarite. —Ari, paanaqueneri.

³⁵Ari yaanaqueri anta Jesoshiqui. Yoanquetaqueneri imititsaqui iitsaarepee irisavicanteari Jesoshi, impoiji iquijacotanacari.

³⁶Ari yovaacotanaja anta avotsiqui, yoajeitiniri atiripee iitsaarepee avotsiqui, iraniitantanaqueari voro.

³⁷Ari intanacaro meeca yoirincacotanaja. Yoijajeitanaqueri oshequi quemisantajeitatsiri, iveshireimentajeitanacari, icajemajeitanaque. Icantajeitanaque: —Tempa icameetsataque Tasorentsi. Aneajeitaqueri itasoncaventapinijeitaquee.

³⁸Icameetsataque Avincatsarite itiancaqueeri Tasorentsi. Cameetsa isavicajeitaque maaroni inquitesati, ineacameetsajeitaqueri Tasorentsi.

³⁹Ari itimaiti anta variseopee, icarajeitaqueri atiripee. Icantavetari Jesoshi: —Oametantatsiri, poimajerentajeiteri yora oijajeitimpiri.

⁴⁰Yacanaqueri: —¿Paita noimajerentanteariri? Ocameetsataque icantajeitaqueri. Irimajerejeiteme yocapee, irointi irineanatacaaqueme Tasorentsi mapipee ompincatsatantenameri.

⁴¹Ari iquempejijeitapaaque, meeca oconijatapaaque Jerosare. Iraacojeitaqueri Jesoshi savicajeitatsiri,