Lukas 19:30-41

³⁰“Magdulot kanan ta babali kidewan, a am nakadatang kanan ta bikat da a maita muy sangaw ya urbun na kabayu nga megalut nga awan para la natakayan. Ubadan muy, te idatang muy hapa sin.

³¹A am itta sangaw ya mangpohut ta pangubad muy a ‘Pa masapul na bit la i Afu,’ kummuy,” a umange kid.

³²Naita da hala ya kabayu en ta kuman na nebar ni Hesus tekid,

³³a tekiden nangubad tentu a “Annun muy hud ubadan ya urbunina?” kunna hapa na makākwa en.

³⁴“A te masapul na kan na dafu tamen,” kunda hapa.

³⁵A ta nepangidatang da tentu a neimmak da ya ulolat da ta urbunen, a inuffunan da i Hesusen nagtakay.

³⁶A tentu en nakatakay a imunnan hapa ya addu na tolay nga nangihuklad ta ulolat da kiden ta angen na en ta pangdayaw da tentu.

³⁷Pakadatang da ta dadagutan na bagetayen a sa gimihawa ya ituldu na kiden, a neayag da ya pangdayaw da ta Namaratu gafu ta ngamin kiden naita da ta pakapangwa ni Hesus.

³⁸“Bendisyonam, Afu, ya Ari in nga pinakabarim, petta mappya ta lutakin ta kuman na langitina, a kumanen ka hapa,” kunda.

³⁹A ya uhohug na kadwan kiden Pariseyu nga nehulun ta tolay kiden a “Anu awem ihuya ya ituldum kiden, te igitta da ka ta Namaratu,” kunda te Hesus.

⁴⁰“Am awena mina magsitang na inin kid a ibar ku tekamuy ta magsitang hud la ya batu kidin,” kunna hapa tekid.

⁴¹A tentu en nakaabikan ta ili na Herusalem a pake itan na, a nagtangit hapa ta damdam na ta tolay na kiden.