Look 19:30-41

³⁰“Unu goh da di vilij weh deh lee wayz hed. Az unu get deh, unu wahn fain wahn yong dongki tai op weh nobadi neva raid pahn yet. Loos ahn, ahn bring ahn ya.

³¹If enibadi aks unu wai unu di loos ahn, tel dehn di Laad need ahn.”

³²Soh dehn gaan ahn fain di dongki jos laik how Jeezas mi tel dehn.

³³Wen dehn mi-di loos ahn, di oana dehn seh, “Ey! Da weh unu di loos da dongki fa?”

³⁴Dehn seh, “Di Laad need ahn.”

³⁵Soh dehn bring ahn tu Jeezas, ahn chroa dehn jakit ahn ting pahn di dongki bak ahn mek Jeezas sidong pan it.

³⁶Az ih mi-di goh lang, di peepl dehn jos staat tu chroa dong dehn jakit ahn ting pahn di road fi mek Jeezas raid pan.

³⁷Az soon az ih mi-di geh kloas tu di road weh goh dong fahn di Mongt a Alivz tu Jeroosalem, di hoal krowd a peepl weh mi-di fala ahn staat tu mek lata naiz di prayz Gaad, sayka aala di mirakl dehn weh dehn mi si Jeezas du. Dehn hala:

³⁸“Gaad bles di king weh kom eena di naym a di Laad.” “Hihn mek pees kohn dong fahn hevn. Mek wi aana Gaad weh deh hai op eena hevn!”

³⁹Bot som a di Farisee dehn weh mi deh eena di krowd seh, “Teecha, mek dehn peepl weh di fala yu stap seh dehn ting, hyaa!”

⁴⁰Bot Jeezas tel dehn seh, “If dehn shet op, den di stoan dehn wahn staat tu hala!”

⁴¹Now az dehn mi-di geh kloas Jeroosalem, Jeezas si di siti ahn ih staat tu baal oava it.