Luka 19:30-41

³⁰I ene, “Au lau eanua matamiu eai, au lage arinai asini natuna se hedai au ita, sora nige tau esau i bawasae arinai, abo au eairihai, au woeaiama.

³¹Ena tau esau i hesiowa, i ene, ‘Paana saha asini ne au eairihai?’ abo au riba ina doha, au ene, ‘Paana Guiau bena i abi.’”

³²Isi se hetamaridi wa abo se lau, hinage se ita doha ena riba i ribaei.

³³Asini natuna daina bena se earihai, tanuagana se ribalau aridi eai, si ene, “Asini natuna me sahana au eairihai?”

³⁴Si ene, “Guiau bena i abi.”

³⁵Abo se woeai se laei Iesu arinai, adi lulu se toresae asini natuna potana eai; abo Iesu se hebawasae potana eai.

³⁶Ia ma launa adi lulu se lauweseauri dobila eai.

³⁷Ia i lage hanahanau, Oliveta tupina abaleta‐dobina eai, ena heaheatayao moutuadi gamagamagari se kode, eo se arina lailai Eaubada se aihelahui, paana ana paisoa gigiboridi se itadio;

³⁸si ene, “Wasawasa i lolo, ia i laoma Guiau esana eai: loni galewa eai, ma ana tepo i mia iniini puripurina eai!”

³⁹Parisea tataodi headi moutuana boeadi eai se ribalau ia arinai si ene, “Tanuagamai e, em heaheatayao u ribasuuidi.”

⁴⁰Ia arinadi i heuio, i ribalau aridi eai, i ene, “Ea heribamiu ta ena tatao ta se monomonou ta, weu ma esega abo se eabayabalaoma.”

⁴¹Ia abo i lage hanahanau, eanua wa i ita, sabina ie dou.