Lukas 19:30-41

³⁰Kagi ni Hisus kandan to, “Hondio kow to sika no lunsud kai to tangkaan ta. Ko pokouma kow ogkitoon now ka nohikotan no nati to asno. Ka sikan no nati, waro pad mounturi to otow. Hokara now woy tuyuka now dini to koddi.

³¹No ko duon otow no og-inso kaniu ko manio to oghokaron now ka nati, ogtabak kow kandin to, ‘Og-awoson to Igbuyag noy ka soin no nati.’ ”

³²Nò, nighipanow on ka nigsugu ni Hisus no nigkita ran ka nati unawa to innangon ni Hisus kandan.

³³To oghokaron dan on ka hikot to nati, kagi to mgo tagtuun to nati to, “Manio to oghokaron now ka hikot to nati?”

³⁴Nigtabak to, “Og-awoson to Igbuyag noy.”

³⁵Nò, pigtuyuk dan on ka nati dio ki Hisus no nigluung dan ka malayat no kinabo dan no impanhanig to poka to nati woy nigbuligan dan on si Hisus to ogsakoy.

³⁶Poghipanow on ka sikan no nati no pigsakayan ni Hisus, igtahud dan ki Hisus, imbolat to mgo otow ka kandan no malayat no kinabo dio to ogbayaan ni Hisus.

³⁷Nò. Pogmarani ran to sikan no bubungan to Olibu no ogkapantow to lunsud to Hirusalim, ka tibo no mgo sakup ni Hisus no nigluyudluyud kandin, nigbabansagon kandan to pogsayo dan to Magboboot bahin to tibo no mgo maroyow no hinimuan no nakitaan dan no impohimu to Magboboot ki Hisus.

³⁸Kagi ran to, “Ka goinawa noy ian to ogkapulusan ka soini no Labow no Igbuyag no nighondini to ngaran to Magboboot. Ogbogayan ki to maawang no goinawa ta no ogpuun dio to Langit woy ogsayoon tanow ka dakol no ngaran to Magboboot.”

³⁹Nò, duon mgo Parisiu no nakaamut to sikan no nalibulung no mgo otow no nigkagi ki Hisus to, “Maistru, sapari nu pa ka mgo hibatoon nu no ogsasayo koykow.”

⁴⁰Di nigtabak si Hisus kandan to, “Malogot ian ka ignangon ku kaniu. Ko ogpahagtongon ku sikandan, ka mgo batu ka ogsoip no ogbabansagon no ognangonnangon bahin koddi.”

⁴¹To marani on si Hisus to lunsud to Hirusalim no nigkita rin on, nakasinogow on sikandin