Luka 13:18-34

¹⁸Jesu e dâŋ moc kecʒiŋuc ʒuhuckerâ muwec: “Anuture uucmaŋ e wemo wiac iŋucne, wemohec sâc hepe?

¹⁹E nemuja hândâŋ iŋucne. Ŋic moczi i jufu‐ticnao râeme âkeʒurâ jâc ewec. Eme sawa wipe jaŋe fisirâ tieŋnao herâ ŋeeŋgopieŋ.”

²⁰Eme moc ʒuhuckerâ muwec: “Anuture uucmaŋ i wemohec sâc hepe?

²¹E hâmu goreŋne iŋucne. Ŋokac moczi hâmu goreŋne nânâhec bâsifuckeme aŋac‐ticnezi nânâ isiricke‐fârewec.”

²²Jesu e Jerusalem haeo raocte hae sâko hae pitic rahuc miti jaza qazuc ewec.

²³Ehame ŋic moczi wiocnerâ muwec: “Wofuŋ, ŋic afecnezi mecne sambâŋko feniŋmu, me weniŋuc?” Eme Jesuzi ʒiŋuc âzâcnewec:

²⁴“Motâc fâŋfâŋnao raʒiniŋte sama qamariehuc raʒinʒepieŋ. No ŋazape mananiŋ: Ŋic bocjahazi raraʒire muniŋmu, murâ sifu mi raʒiniŋmu.

²⁵Fic rune e motâc herâ ki bame ŋoŋe fisirâ râpenao domahuc heickerâ ʒiŋuc muniŋmu: ‘Wofuŋ, motâc ronârec.’ Mupie ʒiŋuc ŋazaocmu: ‘No ŋoŋere kâuc bakopac, ŋoŋe wenirec?’

²⁶Wio‐ŋareme okacne ʒiŋuc âzâcneniŋmu: ‘Nâŋe gohec juhuc nânâ opâ nâmbeŋ â hae‐nâŋecko miti mutec manambeŋ.’

²⁷Mupie ʒiŋuc ŋazaocmu: ‘Ŋazakopac i, ŋoŋe wenirec, no mi manac‐ŋopakopac, sâqocne bapa ŋoŋe behecnu‐fâreniŋ.’

²⁸Eme Abraham, Isaka, Jakobo â porofete sasawa Anuture uucmaŋko juhapie honec‐jopaniŋmu. Â ŋaŋacne ine qikiŋ‐ŋopakicnere râpenao mic kikiaric kihuc ki oowa ehuc juniŋmu.

²⁹Ehame mâreŋ ŋifec â ŋifec, faic â juwic, irec ŋic fisirâ Anuture uucmaŋko raʒirâ tiwâ nâ ʒeri eniŋmu.

³⁰Manaŋgopieŋ, ʒâhecne jaŋeraonec gâcnezi bâbâni eniŋmu, â bâbâni jaŋeraonec gâcnezi ʒâhecne eniŋmu.”

³¹Dameŋ ijaha farisaio ŋic tucne fisirâ ʒiŋuc muhuc âzâcnembiŋ: “Herodezi guocte mukac irec mâreŋ ʒi beherâ biac rac.”

³²Mupie ʒiŋuc jazawec: “Ŋoŋe risie rarâ qâqâto e nore ʒiŋuc âzâcneniŋ: ‘Manakic, no miŋecgac â tomâcko ŋic demoŋ jâpe‐jarepemu â ɋiɋicne bacjopapemu, fureme batarapemu.

³³Miŋecgac â tomâc fureme hata rahuc juzepac. Porofete moc e Jerusalem haeo mi fisihame qaqane mi fokac.’”

³⁴Iŋuc murâ muwec, “O Jerusalem rune, go hâcne porofete ʒikazi jopahuc mitiŋic gorao sorec‐jopakicne qânâzi hehâmoc‐jopaekic. Qâqâczi motecfâcne qânusuc‐joparâ fakecnezi ɋoroc‐jopaekac, iŋuc jaha noni kikefuŋfâcge wemo afecne maŋfuŋ‐naneo qânusuc‐jopazo mupe qikiŋne warehuc jumbiŋ.