Luka 13:18-34

¹⁸Motong la Yesu iwete pang di mulu nen, “Dada yo Maro be matan kala di tooltool ki ye i, in dawa ben soo so? Too, ole ananpootoo ye soo so, a nen ngan lomim galanga ye nga?

¹⁹Dada tani in dawa ben kai yo ene mastet, in patunu. Ngan tool atu ikaua mastet patunu tani in la ipe du kumu ki, ngan le isup le lo iyei ben kai somai. Inbe itar baene somaimai le di man yo tiro lang katene nga, ngan man tire giniu kidi ye a tiyepe ye.”

²⁰Motong la Yesu iwete pang di mulu nen, “Dada tani yo Maro be matan kala di tooltool ki ye i, in ole ananpootoo ye soo so mulu?

²¹Nga ole ananpootoo ye yis yo tataru lo ye porong ngan iyeii a isung i. Garup atu ikaua so mai tiap tani a itaru ilo ye porong tina maiyoko in a ipargarungraii ye, ngan le iyeie porong tani a isung le imot.”

²²Motong la Yesu imadit mulu be itoo dada a ilo pang Yerusalem nga, ngan le lo pombe ye malala maimai le malala kakase kapala yo ikenen dada nga, inbe ipatomonai di tooltool.

²³Le nga tool atu itoru nen, “Tool Mai, ngan pang dama ni nga, ngan ole di tooltool kasin leu la be Maro ikap di a ipamulu di ye so dook tiap tani yo be igarung di i, too?” Motong la Yesu iyei ne,

²⁴“Awete pang nen, dada yo be ilo pang ye malala ke Maro i, in mai tiap. Le guramim a be nen ngan kapa ye dada tani in a kalo. Yesoo, di tooltool alunu kaiye la ole tikapye be titoo dada tani in a tilo nga, bong o ke be tilo tiap.

²⁵Ngan pang dama ni ngan rumu taunu ole iman tina le itiukala dada, inbe kaman le man kakodo ke diki a kapitpiti dada, inbe kayei ne, ‘Tool Mai, kuso dada pam.’ “Bong ngan ole iraua betanga kiang nen, ‘Ang nga kapa ke ngai? Au i lok galanga yang pitiap yege.’

²⁶“Lo ngan be kawete panga nen, ‘Ona tiap! Am tina nga la kuman malala kiam man kupatomonai am inbe am yong tagauagaua ye kaningi le yinungu nga, e nga yelei be lom sarere yam nga?’

²⁷“Bong ngan ole iwete pang nen, ‘Ang nga ke soo malala? Atoo, au i lok galanga yang pitiap yege. Ang nga di tooltool ke yeingi dada dook tiap, le kakoo yau a kala!’

²⁸“Ngan ole kala be matamim lo ngan kakamata Apram ye Esaka ye Yakop tiye di Maro koonoo yo ke muku nga, ngan tilo tigaua di tooltool yo Maro be matan kala di nga. Bong ang tapmim ngan ole tingangang a du kayepe diki, a be nen ngan katangtang, inbe kakanen dongamim a iparrasa.

²⁹Inbe di tooltool yo tipa ye ni mai le imot nga, ngan ole timan a tilo lo tiye di tooltool yo Maro be matan kala di nga, ngan tigaua, inbe tiwur a tikan so.

³⁰Ngan nanga, di tooltool yo nookoot ngan tikimur nga, ngan ole tise le lo timuku. E di tooltool yo nookoot ngan timuku nga, ngan ole tidu le du tikimur yege.”

³¹Ye kene tani in di Paresi pattu timan le man tiwete pang Yesu nen, “Ai, nga ole kuyege ni, inbe kula pang ye ni sa mulu ngan, yesoo Erot ni ngo lono be ole iraumatong a kumata.”

³²Ngan Yesu iraua betanga kidi nen, “Kala kawete pang gaunu gok ni nen, ‘Katai inbe bongbong nga, ngan ole anganga di so sadi yo tiyepe ye di tooltool nga, inbe akarata di tooltool yo matamatenge ikap di nga, le tinidi dook mata mulu. Le malama ngan la be ayei porai urata kiau le imot nga.’

³³Bong katai inbe bongbong be malama ngan ole apa le ikenen leu a alo pombe, yesoo ni sa mulu be tiraumata Maro koonoo ye tiap. Ni ataleu yo be tiraumate ye le imata i, in la Yerusalem ni.”

³⁴Motong la Yesu tani in iparau nen, “Atoo, Yerusalem, Yerusalem, ong i la di tooltool kiong tiraumatamata di Maro koonoo a timmata, inbe tikap pat a tikatmatamata di tooltool yo Maro iwanga di a timala pang yong nga. Inbe ye lal alunu ngan au i lok be agaua di tooltool kiong a tigaua le imot yau, dawa ben tareke tinana igaua di natunu a ipatur di ye balini nga. Bong di tooltool kiong lodi be timan tigaua yau tiap.