Luka 13:18-34

¹⁸Ŋineŋga Yesu iporo kilo mine tu, “Maro Kindeni ne mâsi ŋana ikai maro panzi tamâta kâ nde itogo sâ. Naŋa ma aporo ŋgua tambirâŋa mana.

¹⁹Ŋinde nde itogo kaniŋa ‘mastet’ vâsa toŋge. Tamâta toŋge ikai ‘mastet’ vâsa toŋge ku ilâ ipau lâ ne tâno ilo. Aku muli ŋga kaniŋa ŋinde ipâŋga ŋalae itogo kâi mine, aku kinzi sii kie-kie uru sipagona simâ sisaŋona ne laka kulu.”

²⁰Yesu iporo ŋgua kilo mine tu, “Naŋa ma aporo ŋgua tambirâŋa mana ŋana Maro Kindeni ne mâsi ŋana ikai maro panzi tamâta kâ.

²¹Ŋinde nde itogo ‘yisi’ taine toŋge ikai ku igema tona puroŋa ne kulo ŋalae toŋge. Igema lee, ŋineŋga puroŋa ŋinde ndoni ipondi kâki.”

²²Yesu nde iyoka nzâla ŋana ikâki ilâ pa Jerusalem kâ. Aku ilâ lawea kiri-kiri ilo wa lawea ŋalaŋala ilo ŋana ipanananzi tamâta kâ.

²³Ande tamâta toŋge ikasoŋa i mine tu, “Tamâta Ŋalae, tiambo Maro Kindeni ma ikainzi tamâta pinde nâ piti lâ kondoma ilo ku via mao ilanzi, tiya?” Ŋineŋga Yesu itu lâ kawanzi ku itambira ŋgua mine tu,

²⁴“Ara ŋana miki ma kamakâsa ŋalae ŋana kakai nzâla mota piti kalâ luma ilo. Naŋa apaimi tu kinzi tamâta rârâ ma situ sikai nzâla mota piti silâ luma ilo, andeta ma sikura tia.

²⁵Aku lâ zo muli, luma warika ma imandi ku isae luma ne nzâla giri lâ. Ŋineŋga miki pinde ma kamâ kamandi nzâla tini, aku ma kapitikina nzâla ku kasarâwa tu, ‘Tamâta Ŋalae, pwai nzâla piti pama ŋga!’ Andeta i ma iporo taulo pami tu, ‘Naŋa azizâla ŋanami. Miki nde koka pa sinia kamâ, a?’

²⁶Ŋineŋga miki ma kapai tu, ‘Wa, maka muŋga kaka wa kanu kuku noko ma, aku noko muŋga kumandi ŋginima ku kupananama.’

²⁷Andeta i ma ipaimi tu, ‘Naŋa azizâla ŋanami. Miki nde koka pa sinia kamâ, a? Miki nde tamâta ŋana kaveta kiesaka kâ! Miki rârâni kakâwa kalâ!’

²⁸Lâ zo ŋinde, miki ma kamoranzi timbunda Abraham ŋga Isaka ŋga Yakopu sitavanzi ŋgua-tulâŋa tamâta rârâni, kinzi ŋinde ma simo Maro Kindeni ne ŋgumbi ilo. Aŋga miki warakami, ande Maro Kindeni ma iŋarami kamo niaka. Mine kala miki ma kata pâta ku niŋomi giri lâ.

²⁹Ŋana tu lâ zo ŋana Maro Kindeni ma iveta kâŋa-nuŋa ŋalae tina panzi tamâta ŋinde i uru ikai maro panzi, ande kinzi tamâta ma soka pa tâno ndoni simâ sisaŋona ŋana sika kâ.

³⁰Aku kaloŋo ŋga; kinzi tamâta kala zo ŋine simo tamâta ŋalaŋala, ande muli ma simo tamâta kaa nâ. Aŋga kinzi tamâta kala zo ŋine simo tamâta kaa nâ, ande muli ma simo tamâta ŋalaŋala.”

³¹Lâ zo ndainani nâ, kinzi Parisai tamâta pinde nde simâ pa Yesu ku sipai tu, “Koipu Ŋalae Herot itu ma isupwanzi tamâta pinde ŋana sipu noko pâta kumâte kâ. Mine nde ara ŋana noko ma kupile lawea ŋine ku kulâ pa nia pinde.”

³²Andeta Yesu itu lâ kawanzi tu, “Tamâta ŋinde nde itogo mbwâmbwa saka mine! Miki kalâ ku kapai i mine tu, ‘Kuloŋo; kari ŋine wa mbwale wa, ande naŋa ma asokinzi koroani saka piti wa avetanzi pukoŋa tamâta tininzi ara wa. Aŋga ma mbwale mauru, ŋineŋga naŋa ma apâŋga lâ keri, ikura Maro Kindeni ne pateâŋa mine.’

³³Mao nâ, kari ŋine wa mbwale wa mbwale mauru wa, ande naŋa ma ayoka alâ. Kinzi kazâŋa tamâta uru sipunzi ŋgua-tulâŋa tamâta simâte lâ Jerusalem lawea nâ; kinzi uru siveta mine lâ lawea toŋge, ande tia.

³⁴O, Jerusalem, Jerusalem, miki kakai kazâŋa panzi ŋgua-tulâŋa tamâta kala kapunzi pâta simâte. Mao nâ, miki uru kakainzi tamâta ŋinde Maro Kindeni isupwanzi simâ pami, aku mira nâ kasianzi pâta simâte. Ikura zo zo naŋa atu agogorami itogo tatareko tina igogoranzi natu simâ taitu ku isupinanzi lâ mbani kalo mine. Andeta miki tinimi pwâka.