Luuk 13:18-34

¹⁸Jiisasnoŋ sareqaa moŋ kokaeŋ jero, “Anutuwaa bentotoŋaa kania ii nomaeŋ? Ii naamombo so ambenaga?

¹⁹Ii nejoŋ kotaa so kokaeŋ kolooja: Eja moŋnoŋ ii meŋ gawoŋanoŋ kema komoro waama somariiŋ gere kolooro. Gere kolooro kanakeewaŋ kooŋa kooŋa yoŋonoŋ haigia gere iikawaa borianoŋ aŋgi.” Kiaŋ.

²⁰Jiisasnoŋ mombo sareqaa moŋ kokaeŋ jero, “Anutuwaa bentotoŋa ii naa iwoiwo so ambenaga?

²¹Ii yiist me flaua meŋ somasomariiwaa so kokaeŋ kolooja: Emba moŋnoŋ ‘Bered oomaŋa,’ jeŋ yiist meŋ flaua konde karooŋ kanoŋ mindiriŋ meleŋqeleeŋ ama ano rama korebore somariiro.” Kiaŋ.

²²Jiisasnoŋ kema taoŋa taoŋa ano gomaŋa gomaŋa kanoŋ Buŋa qaa kuma oŋoma kema laligoŋ Jerusalem sitinoŋ baageŋ keno.

²³Keno moŋnoŋ kokaeŋ qisiŋ muro, “Poŋ, uugia meleeŋgi Anutunoŋ hamo qeŋ oŋono letombuti, ii ejemba afaaŋgoya me nomaeŋ?” Qisiŋ muro kokaeŋ iŋijoro,

²⁴“Oŋo mono nagu goŋgoŋanoŋ keubombaajoŋ janjariŋ riiŋ aoŋorowu. Niinoŋ kokaeŋ iŋijowe mobu: Ejemba mamaganoŋ Anutuwaa bentotoŋ uutanoŋ keubombaajoŋ batogowuto, ii amamaawuya.

²⁵Kanageŋ miri toyanoŋ waama nagu konogo oŋo kambaŋ iikanoŋ kanaiŋ seleeŋgeŋ nama nagunoŋ qeŋ kokaeŋ jewuya, ‘Poŋ, mono nagu horoŋ nonomba.’ Kaeŋ jegi meleema kokaeŋ iŋijowaa, ‘Nii mende moma oŋonjeŋ. Oŋo daaŋkaya, ii mende mojeŋ.’

²⁶Kaeŋ iŋijoro oŋo iikanondeeŋ kanaiŋ kokaeŋ jewuya, ‘Nononoŋ mono giwo ainjoloŋ rama nene neniŋ. Giinoŋ mono liligoŋ nonoo sombenoŋ Buŋa kuma nonona.’

²⁷Kaeŋ jewuyato, iinoŋ qaa kokaeŋ iŋijowaa, ‘Oŋo mono dakaya, nii mende moma oŋonjeŋ. Kawaajoŋ kokaeŋ iŋijowe mobu: Bologa meme kuuya, oŋo mono nomesaoŋ togowu.’

²⁸“Togogi iikanoŋ Aabraham, Aisak, Jeikob ano gejatootoo ejemba kuuya yoŋonoŋ Anutuwaa bentotoŋ uutanoŋ naŋgi iŋiibuto, oŋoaŋgia hagoŋ oŋoŋgi seleeŋgeŋ nambuya. Kaniagia kaeŋ mokolooŋ saama gigilaaŋ gobugia kigi qaro laligowuya.

²⁹Ejembaya ejembaya ii weeŋ koukoutanoŋga ano kemekemetanoŋga ano leelee Noot Saut iikanoŋa kaŋ Anutuwaa bentotonoŋ keuma duŋ raragia meŋ nembanene neŋ korisoro ama laligowuya.

³⁰Kaeŋ laligowuto, mobu! Konoga yoŋoonoŋga tosianoŋ mutuya koloowuya ano mutuya yoŋoonoŋga tosianoŋ konoga koloowuya.” Kiaŋ.

³¹Kambaŋ iikanondeeŋ Farisii (Kana qaawaa kaparaŋkoŋkoŋ) tosianoŋ Jiisaswaanoŋ kaŋ kokaeŋ jegi, “Kiŋ Herodnoŋ guro komuwaatiwaajoŋ moja. Kawaajoŋ mono gomaŋ koi mesaoŋ kemba.”

³²Jegi kokaeŋ meleema oŋono, “Oŋo mono duuyaa kasu sooŋa ii kokaeŋ jegi moba, ‘Moba! Niinoŋ kete ano woraŋ ome oŋotaamaŋa ano ji ejemba meŋ qeaŋgoŋ oŋoma laligomaŋa. Kemaŋati, indigeŋ mono iikanoŋ keuma gawona metogomaŋa.’

³³“Gejatootoo ejemba seiseiya ii Jerusalem sitinoŋ uŋugi komugi. Gomaŋ tosianoŋ mende toroqeŋ uŋugi komuŋkeju, iikawaa tanitani eja iijeŋ. Kawaajoŋ niinoŋ kete ano woraŋ indigeŋ kana kema laligomaŋa. Jerusalem keube nugi komumaŋati eeŋ, mono iyoŋoonoŋ kaiyakagiaga ii toroqeŋ ambu.” Kiaŋ.

³⁴Jiisasnoŋ jero, “Oo Jerusalem Jerusalem, oŋo gejatootoo ejemba uŋugi komugi Anutunoŋ ejemba wasiŋ oŋono oŋoonoŋ kaŋkejuti, ii jamonoŋ uŋugi komuŋkeju. Kuru nemuŋanoŋ merauruta eŋgaŋa baatanoŋ ama kojojooŋ oŋomakeji, niinoŋ iikawaa so kambaŋa kambaŋa goo kanagesouruga suuŋgoŋ kololooŋ oŋomambaajoŋ moma laligoweto, oŋo ii togoŋ laligoŋ kougi.