Lucas 13:18-34

¹⁸Ekꞌuchiriꞌ, xubꞌiꞌij tanchi ri Jesús: «¿Saꞌ rukꞌ kajunimax wi rutaqanik ri Dios?

¹⁹Riꞌin kanjunimaj rukꞌ juna ijaꞌ re moxtasa, ri xkꞌam bꞌi ruma jun achi y xtikiꞌ chupa ri werta. Ekꞌu riꞌ waꞌ xkꞌiyik y lik xuꞌan bꞌojobꞌik; yey ri tzꞌikin kexikꞌikꞌ che ruwa kaj xkiꞌan kisok puwi taq ruqꞌabꞌ» xchaꞌ.

²⁰Y xubꞌiꞌij tanchi ri Jesús: «¿Saꞌ rukꞌ kanjunimaj wi rutaqanik ri Dios?

²¹E jelaꞌ pachaꞌ ri levadura, ma echiriꞌ juna ixoq kuꞌan pam, kutuk jubꞌiqꞌ levadura xoꞌlibꞌal oxibꞌ pajbꞌal harina y ri levadura kusipowirisaj upa ronoje ri qꞌor» xchaꞌ.

²²Echiriꞌ ri Jesús kꞌo chi bꞌe re keꞌek Jerusalem, xikꞌow pa taq tinamit y pa taq aldeas, e riꞌ kakꞌutunik.

²³Y kꞌo kꞌu jun xbꞌiꞌn che: —Wajawal, ¿xa nawi jujun ri kekolobꞌetajik? —xcha che. Y ri Jesús xukꞌul uwach:

²⁴«Lik chichꞌikikej iwibꞌ chaꞌ kixok chupa ri nutaqanik che ri okibꞌal xa chꞌutiꞌn uwach, ma kambꞌiꞌij chiwe: Kopon na ri qꞌij echiriꞌ lik e kꞌi ri kakaj kebꞌok bꞌi, noꞌj na kayaꞌtaj ta chike kebꞌok bꞌi.

²⁵»Ma e kuꞌana pachaꞌ ri rajaw juna ja echiriꞌ kuꞌan juna nimaqꞌij. Echiriꞌ ebꞌokinaq chi konoje ri ebꞌusikꞌim, kutzꞌapij lo ri puerta, y na jinta chi kꞌu junoq kokik. Jekꞌulaꞌ riꞌ ri kikꞌulumaj riꞌix, na kixok ta chubꞌi. Kijeq kꞌu riꞌ kixchꞌaw apanoq: “Qajaw, Qajaw, yaꞌa ko la chiqe kojok bꞌi” kixchaꞌ. »Yey Rire jekꞌuwaꞌ kukꞌul lo uwach chiwe: “Riꞌin na wetaꞌam taj pa ix petinaq wi riꞌix” kacha chiwe.

²⁶»Ekꞌuchiriꞌ, kijeq ubꞌiꞌxik: “Oj waꞌ kꞌu woꞌqinaq ukꞌ la yey xkꞌutun ne la pa taq ri bꞌe re ri qatinamit” kixcha che.

²⁷»Noꞌj Rire kubꞌiꞌij lo chiwe: “Paqatzij wi, riꞌin na wetaꞌam taj pa ix petinaq wi riꞌix. Chixela chinuwach, iwonoje ri ix ꞌanal re ri lik itzel uwach” kacha chiwe.

²⁸»Ekꞌuchiriꞌ, lik kixoqꞌik y kaqichꞌichꞌ ruwi iweꞌ echiriꞌ kebꞌiwil ri Abraham, ri Isaac y ri Jacob kukꞌ konoje ri qꞌalajisanelabꞌ e kꞌo rukꞌ ri Qaqaw pa rutaqanik chilaꞌ chikaj; yey ekꞌu riꞌ riꞌix na jinta piqꞌabꞌ kixok bꞌi kukꞌ.

²⁹Noꞌj e kꞌo ri na e ta aj judiꞌabꞌ e petinaq pa relebꞌal lo ri qꞌij, putzaqibꞌal ri qꞌij y pa ronoje luwar che ruwachulew, riꞌ kebꞌok chwa ri mexa pa rutaqanik ri Dios.

³⁰»Chiwilape kꞌu riꞌ, ma e kꞌo jujun chike ri na jinta kiwach wara che ruwachulew, e lik kakꞌojiꞌ kiwach chwach ri Dios chilaꞌ chikaj; yey e kꞌo ri lik kꞌo kiwach wara che ruwachulew, e kuꞌana na jinta kiwach chwach ri Dios chilaꞌ chikaj» xchaꞌ.

³¹Chupa kꞌu waꞌ wa qꞌij xeqibꞌ jujun fariseos rukꞌ ri Jesús y jewaꞌ xkibꞌiꞌij che: —Chelubꞌi la y oj la ma ri rey Herodes karaj kukamisaj la —xechaꞌ.

³²Y ri Jesús xubꞌiꞌij chike: —Oj alaq y jeꞌbꞌiꞌij alaq che laꞌ laꞌchi, ri e pachaꞌ juna yak: “Waqꞌij y chweꞌq kꞌa kebꞌenuwesaj bꞌi ri itzel uxlabꞌixel y kanꞌan kunanik yey kabꞌij kꞌut kankꞌis ri nuchak” kacha alaq che.

³³Pero che kꞌu woꞌxibꞌ qꞌij chirajawaxik wi kambꞌinibꞌej pan nubꞌe kinꞌek, ma na taqal ta che juna qꞌalajisanel kakam kꞌa naj che Jerusalem —xchaꞌ.

³⁴Tekꞌuchiriꞌ xubꞌiꞌij: «¡Jerusalem, Jerusalem, riꞌix kebꞌikamisaj ri qꞌalajisanelabꞌ y kebꞌiꞌan paꞌbꞌaj janipa ri ebꞌutaqom lo ri Dios iwukꞌ! E riꞌin ukꞌiyal laj lik xuaj xinmol kichiꞌ riwalkꞌoꞌal riꞌix jelaꞌ pachaꞌ kuꞌan juna atiꞌ akꞌ chike taq ruwiꞌch echiriꞌ kumol kichiꞌ chuxeꞌ taq ruxikꞌ, noꞌj riꞌix na xiwaj ta kꞌenoq.