LUKA 11:4-43

⁴Emai dika ba gwau tao; badina be ai ese danu e hadikamaimu taudia edia dika a gwau taomu; Bona hedibaḡani ai basio hakaumai vareai.

⁵Ia ese ma e hereva henidia, eto, Umui ta malokihi bema lao, turana bema ha noia, bema toma “Turagu e, aniani ḡaudia toi ame henigu torehai;

⁶badina be turagu ta ena laolao vada ema, to dekegu ai iubulaina ḡauna ta lasi”.

⁷A ia na laloma amo bema haere, bema toma “Asio haraivagu; iduara vada na koua, bona lau na natugu ida hehekure; lau na basina tore isimu, basina henimumu”.

⁸Na hamaoromuimu, ena be hetura dainai basine tore isi, basine henia, to ena noinoi loulou dainai ia na baine tore isi, bena ena ura ḡaudia iboudiai baine henia.

⁹Lau na hamaoromuimu: ba noinoi, do baine henimui: ba tahu, do ba davari; ba pidipidi, iduara baine hekeho emui.

¹⁰Badina be noinoi taudia iboudiai ese e abimu; itahuna tauna ese e davariamu; iduara na e hekehomu pidipidi tauna ena.

¹¹Umui daika natuna aniani bema noi negana ai nadi bema henia? Eiava gwarume bema noi negana ai gaigai bema henia?

¹²Eiava gatoi bema noi negana ai doadoa bema henia?

¹³Benaini, umui na dika taumui, ḡau namodia natumui ihenidia be mai dibamui, a Tamamui guba ai e nohomu na Lauma Helaḡa inoina taudia basine henidia a?

¹⁴Ia ese mu laumana ta e lulua lasi, bena hari mu tauna vada e hereva. Bena aru taudia na e hoa.

¹⁵A haida eto, Beel-sebul, lauma dikadia biagudia, siahuna ai ia ese lauma dikadia e luludia lasimu.

¹⁶Ma haida ese e dibaḡania, toa ta guba amo baine henidia eto.

¹⁷To ia na eddia lalo-hadai dibana, bena e hereva henidia, eto, Basileia ta bema haheparara, ia na bema dika; bona iduhu ta bema haheparara, ia na bema heḡiḡi rohoroho;

¹⁸bona Satana sibona bema haheparara, ena basileia na ede bema gini toma?

¹⁹Lau na Beel-sebul siahuna ai lauma dikadia na luludia lasimu o tomamu, matona umui natumui be daika siahuna ai e luludia lasimu? Taunabunai, idia ese bae hahemaoro henimui.

²⁰A, bema lau ese Dirava imana dainai lauma dikadia na luludia lasimu, Dirava ena basileia na emui ai vada eme kau.

²¹Goada tauna imana mai karevana ida ena ruma baine gimaia negana ai, ena kohu do baine mia.

²²A nega ta, goada-herea tauna ta bainema, baine tuari henia; bena baine hadarerea, imana ḡaudia, e abidadama heniva ḡaudia, na baine dadihai; bena ena kohu idoidiai baine hari rohoroho.

²³Egu ai se taomu tauna ese e laogu ahumu; bona lau ida asia gogomu tauna ese e ḡiḡi rohorohomu.

²⁴Lauma dikana ta tau ta ena amo e raka lasi; bena gabu kaukaudia e raka hanai, laḡana baine ania eto, to laḡa-ani gabuna ta se davaria. Bena eto, Na rakatania rumana hari ma baina lou henia.

²⁵E lou lao, e davaria, vada a ḡoevaḡoeva.

²⁶Bena ia ese lauma dika-hereadia hahitu ma e hakaudia lao, iboudiai e raka vareai, e noho henia. Taunabunai, una tau be matamana ai ena dika na taina maraḡi, a dokona ai ena dika na bada herea.

²⁷Una hereva e gwauraiava ai, hahine ta hutuma bogaragidia amo e hereva henia, e gwau badabada, eto, Oi e havaralaimu bogana bona e ubulaimu ratadia na nanamo.

²⁸A Iesu eto, Dirava ena hereva e kamonaimu bona e badinamu taudia hari nanamo heherea.

²⁹Hutuma ia dekena e aru ela, bena ia ese e hereva henidia, eto, Ina na uru dikana, toa e tahuamu, a toa ta ediai basine hedinarai, lona, peroveta tauna, mo vadaeni.

³⁰Badina be Iona na toa ai ela, Nineve taudia ediai; una heḡereḡerena Taununanima Natuna na toa ai bainela, ina uru ediai.

³¹Hahemaoro negana ai, diho kahana pavapavana hahinena na ina uru taudia ida bae gini hebou, baine dunidia dae; badina be ia na tanobada dokona amo Solomon ena aonega herevadia ikamonaidia ema, a iniseni ai ta ese Solomon ehereaiamu.

³²Hahemaoro negana ai danu Nineve taudia na ina uru taudia ida bae gini hebou, bae dunidia dae; badina be Iona ena haroro dainai e helalo kerehai, a iniseni ai ta ese Iona e hereaiamu.

³³Tau ta ese lamepa baine haraia negana ai na ruma henuhenunai basine atoa eiava tohe amo basine karuhia ahu, a lamepa patana ai baine laia kau, bena bae raka vareai taudia ese diarina bae itaia.

³⁴Tau-anina ena lamepa na mata; taunabunai matamu baine namo, taumu anina idoinai baine diari. A matamu baine dika, taumu anina idoinai baine dibura.

³⁵Taunabunai, nahuamui ba toho, diari lalomu ai e miamu na baine dibura na garina.

³⁶Badina be taumu idoinai baine diari, dibura sina taina basine mia, ia na baine diari ḡuḡuru, lamepa e hururu-hururumu, oi e hadiarilaimumu, heḡereḡerena.

³⁷Ia e hereva vaitani, bena Farisea tauna ta ese e vavea, ia ida bae aniani hebou. Bena ena ruma ai e dae kau, aniani gabuna ai e ege diho.

³⁸A Farisea tauna ese e itaia, bena e hoa, badina be ia na se digu guna.

³⁹Bena Lohiabada ese e hereva henia, eto, Umui Farisea taumui ese kehere bona nau muridia kahadia mo o huri ḡoevaḡoevamu, to lalomui ai be dadidadi bona kara havara eme honu honu dae.

⁴⁰Kava taumui e, murina kahana e karaia tauna ese lalona kahana se karaia a?

⁴¹A ogoḡami taudia ba harihari henidia, bena ḡau iboudiai emui ai bae ḡoeva.

⁴²Farisea taumui e, madi ihabaimui! Badina be aniani avadia maraḡimaraḡidia iboudiai karoadia o hagwautamu, karoa ta herahia ḡauna ai o halaoamu, to hahemaoro bona Dirava iura-henina o reamu: ini boma badina bona unu danu basioma rea bema namo.

⁴³Farisea taumui e, madi ihabaimui! Badina be o uramu dubu ai helai ḡaudia hereadia ai ba helai, o uramu danu ariara ai taunimanima ese bae hanamomui.