Luku 11:4-43

⁴kumitia apaserantegeta, tagranena anazanke huta miko kumima hurantesamokizmia atrezmantamneno. Hagi tatregeta reravataga zampina u'oframneno.

⁵Anante Jisasi'a anage huno zmasami'ne, hagi magomoka roneka'amofontega kenage vunka, tagufa breti namitegena, henka nonahuna kamineno,

⁶na'ankure rone nimo'a afeteti eno emaninegena, neza amisuazana omanenegena nehue hanankeno'a,

⁷nomofo agu'afinti ana ne'mo kenona anage hugahie. Ko kafa erigi'na mofavre'ni'ane, nagranena tafete mase'nonanki, mago'zana eri onkamigahuanki eme nazeri oraotio hugahie.

⁸Nagra negasamue, nomofo agu'afima mani'nea ne'mo'a, arone'amo mani'neanagi otino agrira ne'za omigahie. Hianagi na'ankure kazikazima hania zanku avesinesiama'a amigahie.

⁹Ana hu'negu negasamu'e, antahigegeno, anazana kamino, hakesunka, kenka eri fore hugahane. Kafante vagre vagre hugeno, kafamo'a anagi kantegahie.

¹⁰Na'ankure antahigaza vahe'mo'za e'nerize. Hakraza vahe'mo'za, keza eri fore nehaze, kafante vagre vagre hanamokizmia, kafana anagi zmantegahie.

¹¹Ina ne'mo amuno tamifinti, mofavre'amo'ma aganetenkeno nozamegu'ma antahigesigeno'a, nozamea omi osifavea amigahio?

¹²Hifi kokore amuku'ma antahigesigeno'a, amane segintave (Scorpion) amigahio?

¹³Hanki tamagra havizama nehzamota, tamagra antahinaze. Knare museza mofavretmia nezamize. Mago'ane monafi mani'nea Neramafa'a, Ruotge Avamuku'ma antahigaza vahera zamigahie!

¹⁴Mago zupa ageruma eritagne havi avamu mago ne'pinti Jisasi'a humegi atrene. Ana havi avamumo atineramigeno, kema nosia nemo'a agafa huno kea nehige'za, tusi'a veamo'za antri hu'naze.

¹⁵Hianagi mago'amo'za hu'za, Belsebul, havi hankromofona, ugagota havi hankromofo hanavefi, Agra havi avamu hunente hu'naze.

¹⁶Mago'amo'za rehe'za kenaku, agafa hu'za monafinti mago avame'za huraveri huo hu'za hankavetiza antahige'naze.

¹⁷Hianagi Jisasi'a antahintahizmia negeno, anage huno zmasmi'ne, mago rankumo amu'nompinti refko huno ha' orente arente haniana, taregamoke haviza hugaha'e. Mago nompi nagamoma amu'nompinti refkoma hanuno'a traka huno haviza hugahie.

¹⁸Hagi Satama agra'a naga'ane amu'nompinti refko huno ha' orente arente haniana, nankna huno ana rankuma'amo'a oti hankavetigahie? Tamantahimanegoana, na'ankure tamagra hutma, Belsebul ugagota havi hankromofo hanavefi, havi hankrora hunente hazazanku nehue.

¹⁹Hagi Nagra'ma ugagota havi hankromofo Belsebul hanavefima, havi hankroma huntesugeno'a, iza hanavefi tamagri'ma tamagema nentaza naga'mo'za hunentaze? E'ina hu'neankiza zamagra refko hurmantegahaze.

²⁰Hianagi Anumzamofo hanaveretima havi avamu hunentesuana, Anumzamofo kumamo'a ko tamagrira tamagaterene.

²¹Hanave ne'moma kuma'ama kegva huno manisigeno'a, maka zama'amo'a mane so'e hugahie.

²²Hianagi mago hanavenentake ne'mo'ma ha' eme hunteno agateresuno'a, maka ati keve'ane, so'e zama'a erino ome refko hugahie.

²³Iza'o Nagranema nomanimo'a ha' renenante. Iza'o Nagrane emeritru nosimo'a panini huno nefre.

²⁴Agru osu havi avamumo vahepinti atiramino vuteno, ti omane'nea kokampi nevuno, manigsahu kumaku hakeana onkeno anage hu'ne. Ete rukrahe hu'na ko'ma mani'no'a vahe'mofo agu'afi vanue nehuno,

²⁵vuno ana nonte ome keana, nona harafi huno eri so'ehu fatgo hunte'ne.

²⁶Anante ete vuno mago'a 7ni'a havi avu'ava agetereno nehia avamutmi ome zmavareno ege'za, ufre'za umani'naze. Hankino ana nemofona henka nomani'zamo'a, kote nomnizana agatereno havizantfa hu'ne.

²⁷Jisasi anage huno nehigeno, mago a'mo vea kevumofo amuno'zimifi mani'neno kezatino, amanage hu'ne, Negrera kaseganteno ami kami'nemo'a muse hugahie.

²⁸Hianagi Jisasi'a kenona huno, ana hu'neanagi Anumzamofo nanekema nentahino amagema nentemo, agatereno musena hugahie.

²⁹Tusi'a vea krefamo'za mago'ane etruhu rama nahazageno, Jisasi agafa huno anage hu'ne, ama knafi vahera havi vahe mani'ne'za avame'za kenaku nantahinegaze. Hianagi mago avame'za okegahazanki, Jona avame zanke kegahaze.

³⁰Na'ankure Ninive kumate vahe'mokizmire, Jona'a avame'za mani'neankna huno, Vahe'mofo Mofavremo enena anahukna huno menima mani'naza vahe'motarera huramaverina kegahaze.

³¹Anumzamo'ma vahe'ma refko huno keagama huzmantesia knarera, Sauti kaziga Siba kumateti Quini a'mo'a otino, Anumzamo'ma keagama refkoma hanirera, ama knafi vahera keontahi vahe mni'naze huno keaga huzmantegahie. Na'ankure ana Quini amo'a afete'arega mni'neanagi, Solomoni knare antahintahi'a antahinaku e'ne. Hianagi antahiho, mago nera Solomonima agaterenea nera amuno tamifina mni'ne.

³²Anumzamo'ma vahe'ma refkoma hania knarera, Ninive vahe'mo'za oti'za ama knafi vahera keontahi vahe mni'naze hu'za keaga huzmantegahaze. Na'ankure Jona'ma hia kerera zmagu'a rukrehe hu'naze. Hanki keho, Jonama agatereneazana amafi mni'ne. (Jona 3:4-10,1 Kin 10:1-13)

³³Vahe'mo'za tavira rekru hu'za oku'a antege, ekaeka kupina eririza refinotaze. Hianagi tavira tagiza tavima rekru hunte azotare antenesageno, remsa hu'nenige'za ufresaza vahe'mo'za kegahaze.

³⁴Tamavurgamo'a tamavufgamofo tavire, tamavurgamoma keama nehanageno'a, maka tamavufgamo'a msa hugahie. Hianagi haviza hanigeno'a maka tamavufgamo'a hani hugahie.

³⁵Hanki tamagripima me'nea tavi'moma hanima huzankura, kva hiho.

³⁶E'ina hu'negu maka tamavufgafima msamoma avimatenenkeno'a, tamavufgafima hanina omnenena, maka tamavufgamo'a tavimoma hiaza huno remsa hu vgaregahie.

³⁷Jisasima ana kea huvgaretegeno, mago Farisi ne'mo huno, nagrane feru nezana eme no huno antahigegeno, vuno neza nenaza trate aza tununte (reclined) umanine.

³⁸Ana Farisi ne'moma keama, zamagra Farisi vahe'mo'zama zmazama sesema hute'za nezama nenazaza osu, Jisasima nezama amne nenegeno'a, antri hu'ne.

³⁹Hianagi Ramo'a anage huno ana nera asamine, tamagrama Farisi vahe'motma kapune, pletinena amega sese nehaze. Hianagi tamagu'afina kumazafa zamo'ene, havi avu'avazamo avitene.

⁴⁰Tamagra negi vahe mni'naze, Agra amegama troma hunemo'a, agu'afinena trora osunefi?

⁴¹Tamagrama erinenaza zama, muse nehutma tamaguareti zmamunte omne vahema zmamisazana, tamagrira maka zantamimo'a agru hugahie.

⁴²Hianagi Farisi vahe'mota kva hiho! Na'ankure tamagra izane aruine, maka hozafi mananentake nezana 10ni'a kevufinti, mago kevua refko huta nemizanagi, Anumzamofo fatgo avu'avazane, avesizamofona netreta, vahera so'e hunozmantaze.

⁴³Kva hiho Farisi vahe'motma! Na'ankure tamagra osi mono nontamimpi ugota trate mani'zanku tamavenesigetma, maketi kumatamimpi vahe'mo'za antahiramiza husgama huramantezankuke nehaze.