Luk 11:4-43

⁴Un unus ru anumet a kum sakino petutna, uni met kai met dumano ru anundet a kum sakino petutna torom met. Gong u ben met una ululam.’”

⁵O Iesu i watungi tan anun a kum nat na ususer lena, “Ra taio tagun mot in nan torom tu pasano una labino mirum, ma in saringi lena, ‘Pasang, a nem lako tulin beret munung,

⁶uni ara pasang i wanpat torom iau una nun a inawan ut, ra kalako utna sur an tabori nami.’

⁷Ra a pasano kura urumu in watungi lena, ‘Gong u ubalon iau! Met sa tagar, ma met nama kum nutnutung liklik met sa inep. Kan pirso melet mo sur an los tar tu utna tam.’

⁸A inanos mot, in pirso sur in pitar tar a beret tano, awu sur i kibino ra der pasano, awu, i kibino uni i sasaring liklik ut.

⁹“A watungi tamot, mot in sasaring, ra din tabor mot, mot in sisio, ra mot in sio pasi, mot in pinpidik, ra din papos pas mot.

¹⁰Uni det rop ra det sasaring din tabor det, ma osi ra i sisio in sio pasi, ma osi kai ra i pinpidik, din papos pasi.

¹¹Osi na pasamot a kum tamtaman a kum nat liklik, ra o nutunulik in saringi sur tin kiripo, in tabori kut namin nusui?

¹²O, ra in saringi sur tin nikiau, in tabori kut nama bukalo?

¹³Mot a laulau na taro, ikut mot tasmani ut a wakak na etabor sur mot in tabor a kum nutnutu mot nami. Ra mot ser pami lenra, i lingmulus sakit lena, osi ra in saring a Tamamot ra i kis sapat una langit, in tabori ut nama Tokodos na Nion.”

¹⁴O Iesu i lakro ru a laulau na nion ra i ngat gusun ara musano. Ra a laulau na nion ra i pirso gusuni, a musano ra i wasiso maragom. Ma a kunur na taro det kisin.

¹⁵Ikut ara taro tagun det, det watungi lena, “I ser lakro ru a kum laulau na nion nama dekdekin o Belsebul, a labino anun a kum laulau na nion.”

¹⁶A ramano taro kai det lar o Iesu sur in pam tu ukinalong sur in ese i lena, i tagisapat una langit.

¹⁷Ikut o Iesu i sa tasman a nuknukin det, ra i watungi tandet lena, “Ra tu gapman det melet ut det in waim etalai, a gapman ra in rop kut. Ma ra lako taro tagun tu rumu det in waim etalai melet kut, det in nan sarara.

¹⁸Ra o Satan in waim melet kut nam anun a kum tultul, anun a gapman in tur dekdek pepetlai? A watungi lenri, uni mot watungi un iau lena, a lakro ru a kum laulau na nion nama dekdekin o Belsebul.

¹⁹Ikut, ra iau, an lakro ru a kum laulau na nion nama dekdekin o Belsebul, anumot a taro, det ser lakro ru a kum laulau na nion nama dekdekin osi? Anundet a pinapam ut in upuaso i lena anumot a etakun ke lingmulus.

²⁰Ikut, ra an lakro ru a kum laulau na nion nama dekdekin o God, in ese i lena a matanitu anun o God i sa wanpat torom mot.

²¹“Ra ara dekdek na musano i sa emar pas nam anun a kum utna na inaim, ra i tamtamabat anun a rumu, anun a kum utna in kis wakak.

²²Ikut, ra taio ra i dekdek tauni in nanpat toromi ma in winim pasi, in ras ru anun a kum utna na inaim ra i nurnur taru uni, ma in los pas anun a kum utna rop, ma in tabor a taro nami.

²³“O naro ra ka mir tar pasano mir ebar. Ma o naro ra ke warut iau u eben, i lu sarara ru a taro kut.

²⁴“Ra tu laulau na nion in pirso pas gusun tu musano, in nan una kum nubual ra kalako danim iai, sur in mana, ikut ken sio pas tu nubual sur in mana uni. Ra in watungi lena, ‘An milet melet sur anung a rumu, ra a sa pirso pas gusuni.’

²⁵Ra in nanpat, in tama i ra di sa surupu tari, ma di sa ukodos tari.

²⁶Numur in nan, ra in ben melet pas a wonom mawit na laulau na nion, ra det laulau sakit tano, ma det in ruk rop taru una rumu ra, ma det in kis uni. Ma a nilaun anun a musano ra in laulau sakit taun a nilaun ra numugu i utur ukai i.”

²⁷Ra o Iesu i wasiso utmakai, ara ino tagun a kunur na taro ra, i watungi lena, “A ino ra i usus pas ui ma i ugu ui, i dan.”

²⁸O Iesu i balu i lena, “Ikut det ra det longoro a wasiso anun o God ma det muri, det dan sakit.”

²⁹Ra a kunur na taro det bukus nanan, o Iesu i watungi tandet lena, “A taro tagun uniri, a sakino taro. Det tamtama sur tu ukinalong, ikut ka din pam taio torom det. Din pam a ukinalong kut elar nami ra di sa pam tari un o Jona.

³⁰Uni o Jona i a ukinalong torom a taro Niniwe, ma lenkutkai ra a Nutun a Musano in nanpat a ukinalong torom a taro tagun uniri.

³¹Una bung na warkurai, a kwin tagitong una matmatano tobar in tur ma in takun dekdek a taro tagun uniri, uni i wan ut tagitiro bakbak sur in longoro a mananos anun o king Solomon, ma o naro ra i labo taun o Solomon kuri ut nin, ikut ka mot longoro i.

³²Una bung na warkurai, a taro Niniwe det in tur ma det in takun dekdek a taro tagun uniri, uni det nukpukus una warawai anun o Jona, ma o naro ra i labo taun o Jona kuri ut nin, ikut ka mot longoro i.

³³“Katutaio in ungangon tar tu lam ma in munu tari, o in wop bat tari nama paket. Awu! In ubek tari ut netes una nun a turtur, sur det ra det ruk det in tama a talapor.

³⁴Arin matam der elar nama lam una pinim. Ra arin matam der wakak, a pinim rop in bukus nama talapor. Ikut ra der laulau, a pinim rop in bukus nama dumirum.

³⁵Un tumarong, sako a talapor ra kura un ui in dumirum.

³⁶Ra a pinim rop in bukus nama talapor, ma katu dumirum uni, in talapor rop, elar nama lam ra a talaporino i sisio un ui.”

³⁷Ra o Iesu i sa wasiso rop, ara Parisi i ben pasi sur det in nangon tomo. O Iesu i ruk ma i kis sur in nangon.

³⁸Ma a Parisi ra, i tama i lena o Iesu ke gos mugu pas a lamano, ra i kisin uni.

³⁹Ra a Labino i watungi tano lena, “Mot a kum Parisi mot ser gos pasi kut a surun a kap ma a pelet, ikut a balamot i bukus nama petutna na ungongos pas a utna tan taio ma a kum sakino petutna.

⁴⁰Mot a kum longlong! Ka mot tasmani lena, o naro ra i pam a surun a kum utna, i pami utkai a balandet?

⁴¹Mot in tabor a kum sibo na taro nama utna ra kura ubalan anumot a kum kap ma a kum pelet, sur katu dur kura un mot umatan o God.

⁴²“In laulau doko torom mot a kum Parisi. Mot nuknuk doko sur a kum natnat na warkurai lenri, mot pitar in tekteken nanai torom o God tagun a noino natnat na duwai ra i sangsangnain wakak tagun anumot a kinobot, ikut ka mot pam a tokodos na warkurai torom a taro ma ka mot nem o God. I wakak sur mot in pam a tokodos na warkurai torom a taro ma mot in nem o God, ma gong kai mot dumano ru in tektekene tagun a noino, sur mot in pitari torom o God.

⁴³In laulau doko torom mot a kum Parisi, uni mot nem a kinkinis na labino sa numugu una kum rumu na lotu. Ma mot nemi kai sur a taro det in pitar a labino urur torom mot una kum nubual na inawan tomo.