Luka 11:4-43

⁴Oprostin amenđe amare greja sar so hem amen oprostinaja đijekhese kova grešinđa premala amende! Hem cide amen taro iskušenje!”

⁵Tegani o Isus phenđa lenđe: “Zamislinen da ki ekvaš i rat džana koro tumaro amal te phenen lese: 'Amala, te de man trin mare, i ka irinav će.

⁶Mlo amal alo oto drom kora mande, a nane man so te ikalav anglo leste!'

⁷A ov od andral te phenel: 'Ma uznemirin man! O udarai phandle, a mle čhavorei mancar ko than e pašljojbnasoro hem sovena. Našti akana te uštav te dav tut!'

⁸Vaćerava tumenđe: te na uštino te del le adalese soi lesoro amal, ka uštel hem ka del le sa so valjani adalese so lesere amale nane lađ te ovel uporno.

⁹Vaćerava tumenđe: Mangen hem ka del pe tumenđe! Roden hem ka arakhen! Khuven hem ka phravel pe tumenđe!

¹⁰Adalese so đijekh kova mangela, primini; hem kova rodela, arakhi; hem kova khuvela, ka ovel lese phravdo.

¹¹A kova dad tumendar: ked bi lesoro čhavo rodela lestar maćhe, a ov te del le sape?

¹²Ili ked rodela jaro, te del le škorpija?

¹³Ked tumen, kola injen bišukar, džanen te den šukar stvarija tumare čhavenđe, kobor više tumaro Dad taro nebo ka del e Svetone Duho okolenđe kola molinena le.”

¹⁴I jekh dive o Isus ispudinđa e demone kova ćerela ine jekhe manuše te našti vaćeri. Ked iklilo o demoni, o manuš lelja te vaćeri. I o manuša kola inele adari inele zadivime,

¹⁵ali nesave olendar vaćerde: “E Veelzevulesere, e demonengere šerutnesere, zoralipnaja ispudini e demonen!”

¹⁶A avera iskušinde e Isuse ađahar so rodinde lestar te ćerel čudo saveja ka mothoj da o Devel bičhalđa le.

¹⁷Ali o Isus džanđa lengere mislija, i phenđa lenđe: “Đijekh carstvo savoi ana peste ulavdo ka properel, hem o čher ano savo nane sloga ka perel.

¹⁸Tei e bengesoro carstvo ana peste ulavdo, sar onda pana trajini? Akava vaćerava adalese so tumen phenena da e Veelzevulesere zoralipnaja ispudinava e demonen.

¹⁹A te me e Veelzevulesere zoralipnaja ispudinava e demonen, kasere zoralipnaja tumare učenici ispudinena len? Adalese on ka dokažinen tumenđe da na injen u pravu.

²⁰Ali te e Devlesere zoralipnaja ispudinava e demonen, onda o carstvo e Devlesoro alo maškara tumende.”

²¹O Isus phenđa hem akava: “Ked okova kovai zoralo hem naoružime pazini plo boro, lesoro barvalipei osigurime.

²²Ali ked avela o po zoralo lestar, ka pobedini le hem ka lel lesoro oružje upro savo nadinđa pe hem ka ulaj plencar adava so lelja e slabonestar.

²³Ko nane mancar, ovi protiv mande. I ko na čedela mancar, ov frdela.”

²⁴Tegani o Isus phenđa: “Ked o bišukar duho ikljola taro manuš, džala ko pusta thana hem rodela than kote šaj te odmorini. Ked na arakhi le, vaćeri: 'Ka irinav man ano manuš kolestar ikliljum.'

²⁵O bišukar duho irinđa pe hem arakhlja dai adava manuš sar čučo čher savoi šulavdo hem namestime.

²⁶Tegani džala hem lela efta avere duhoven po bišukaren pestar i đerdinena ano manuš hem ačhona adari. I ko kraj adale manušese ovela po bišukar nego angleder.”

²⁷I sar o Isus vaćeri ine adava, nesavi đuvli oto narodo vičinđa: “Bahtali i đuvli koja akharđa tut ano vođi hem dinđa tut čuči!

²⁸A o Isus phenđa: “Po bahtalei okola so šunena o lafi e Devlesoro hem ćerena le!”

²⁹Sar čedela pe ine po baro narodo, o Isus lelja te vaćeri: “O manuša kola živinena ano akava vreme, oni bišukar manuša. Rodena mandar znako, ali znako na ka del pe lenđe sem o čudesija so ćerde pe e Jonase.

³⁰Sar so adava so ulo e Jonase inele znako e manušenđe kola živinde ki diz Niniva da o Devel bičhalđa le, ađahar hem so ka ovel maje, e Čhavese e Manušeserese, ka ovel znako e manušenđe kola živinena avdive da o Devel bičhalđa man.

³¹Ko dive ked ka ovel e Devlesoro sudo, i carica koja angleder vladinđa ki južno phuv ka uštel hem ka osudini e manušen kola akana živinena adalese so ali taro krajevija e phuvjakere te šunel e caro e Solomone kova inele but mudro, a akatei tumencar po baro e Solomonestar, a tumen na mangena te šunen!

³²Ko dive ked ka ovel e Devlesoro sudo, o manuša kola živinde ani purani diz Niniva ka ušten hem ka osudinen e manušen kola akana živinena adalese so on pokajinde pe ked o Jona propovedinđa, a akatei tumencar po baro e Jonastar, a tumen pana na pokajinđen tumen!”

³³“Niko na tharela i svetiljka i te čhivel la ko garavdo than ili talo čaro, nego čhivela la ko than zaki svetiljka te šaj dikhen o svetlost okola kola đerdinena.

³⁴Ti jakhi sar svetiljka te telose. Kedi ti jakh šukar, sai to telo osvetlime. A kedi ti jakh bišukar, hem to teloi ani tomina.

³⁵Adalese pazin da o svetlost so mislineja dai ana tute nane tomina.

³⁶Tei sa to telo pherdo oto svetlost, bizo jekh kotor oti tomina, tegani sa to dživdipe ka ovel osvetlime sar ked i svetiljka osvetlini tut.”

³⁷Ked o Isus vaćerđa adava, nesavo fariseji vičinđa le te xal maro koro leste. I o Isus đerdinđa lese ko čher hem čhivđa pe uzalo astali.

³⁸A o fariseji dikhindoj adava, čudinđa pe so o Isus na thovđa ple vasta angleder o xajba, palo adeti e jevrejengoro.

³⁹A o Gospod o Isus phenđa lese: “Oja, tumen o fariseja kosena i šolja hem o čaro od avrijal, a pherđen len tumara pohlepaja hem bišukaripnaja.

⁴⁰Hulavonalen! Nane li o Devel okova kova ćerđa e manuše, kova džanel le hem od avrijal hem od andral?

⁴¹Akavai pošukar: den e čororenđe sar milostinja okova so isi tumen, so xalane ićerena ano šolje hem ano čare, i ka oven čista hem od andral hem od avrijal.

⁴²Ali jao tumenđe e farisejenđe so dena e Devlese dešto kotor oto začinja hem oto sa o povrće, a na marinena te ćeren averenđe okova soi pošteno hem te mangen e Devle. Valjani te den o dešto kotor, ali na troman te bistren te ćeren adava soi po bitno.

⁴³Jao tumenđe e farisejenđe so volinena te bešen ko anglune thana ano sinagoge hem so volinena ked o manuša, pherde poštujiba premala tumende, pozdravinena tumen ko trgija.