24 Nani murinai kawana Elisabet iropeya ma nawaravi miikovi gaburai imakai da ke ita baba.
25 Ma Elisabet ivona bo, “Weni berana Bada kubiiku iberai. Karako ivi kamyuyuweku da kaku vinimaya aku wawaya kamosiyai ivi koviya.”
26 Elisabet iropeya da kana nawaravi miikovimasago na God ina aneya Gebriyel ivonatawei ku meyagai sago. Meyagina kana vava Nasaret, Gariri dobuna kamonai.
27 Ivonatawei inae wiwike gubugubu sago kurina, wiwikena kana vava Meri ma kana vopapara Josepa, ma tuna na Kiivavo David tupurereghina.
28 Aneyina ivona bo, “Kiiwa kiiwa, tam Bada ina vigheghena ghamana. Bada gwabimuwai emakamakai.”
29 Ma Meri weni sisiyina ivi yanei na nuwanuwana ikarai ma ivi nuwanotanota da avi kubiine nakanani ivi kiikiiwei.
30 Ma aneyina ivona bo, “Meri, ke kuna yabumana. God ina agabiibai gwabimuwai irakata.
31 Kuna ropeya ma kuni tuwa da natum tomowa, ma kevi vavei Yesu.
32 Ini wawayaghama ma wawaya kudubisi ina vonei da tuna na God Kiidamo Makamakiina Natuna. Rewapana Bada God gwabinai ina viiya da ini kiivavo ina kaekiki David nakanani.
33 Jeikap kana dam kamonai ini bada nonowa ma ina vikiivavona na ina makai nonowa.”
34 Ma Meri ivona bo, “Taku na ke meyani tomowa damina ata viiya. Tuna kubiine ikikava da weni berasi ina tupuwa kuriku?”
35 Ma aneyina ivonapotei bo, “Kanuma Vovokaravina ina towatepanim ma God ina rewapana ina rogum. Ma tuna kubiine pepeya vovokaravina kuni tuwei da tuna na God Natuna.
36 Ma bade am tuwa Elisabet ini tuwa. Imagura kirakai ma wawaya inotanotai da tuna na gagarina ma kegha da gisina kava ini tuwa da natuna tomowa. Wekarakava kana nawaravi na miikovimasago.
37 God kurina bera kudubina itekateka kirakai.”
38 Ma Meri ivonapotei bo, “Taku na God ina bigabiga. Aivaghinei da ikikava kuvoneku na nakanani ina tupuwa kuriku.” Ma vaghina, aneyina Meri inekuyowei.
39 Nani murinai Meri ivovunagha ma yaghiyaghinai ivomiiri, inumataya ku kwanatu sago Judiya kamonai.
40 Inekiibau ma Zekaraya ina ku numa irui da Elisabet ivi kiikiiwei.
41 Elisabet, Meri ina vikiikiiwa ivivi yanei na pepeya manawina kamonai ikayopapara ma Kanuma Vovokaravina itowatepani
42 da ikiirara, ivona bo, “Wivine kudubisi kamosiyai na tam gwabimuwai Bada ina vibiibiina irakata kirakai. Ma bade wawaya kikei kuni tuwei, tuna yavata na Bada ina vibiibiina kamonai.
43 Ma anota meyeku da taku na ke wavine kiimatana da aku Bada ina maduwa ita pisi da ita kitiku.
44 Kuvi kiikiiweku na wawaya kikei manawiku kamonai nuwabiibiiyai ikayopapara.
45 Bada ivi biibiinim iyamna aviyavisina ivi sisiyei kurim na kuvi tumaghanei da berasi ina tupuwa.”
46 Ma Meri ivona bo, “Nuwanuwaku Bada evovokavakavari da kana kadara ina rakata,
47 Ma kanumiku inuwabiibai da God na kaku Viviyawa,
48 Iyamna taku ina bigabiga vovokuwayiku na enotanotiku. Kimta kudubisi karako ma mara nonowa ini sisiyeku, ina vona da taku na ina vibiibiina kamonai.
49 Tuna na God Rewapana Kirakiina ma kubiiku bera ghamaghamasi eberaberai. Ma kana vava na vovokaravina.
50 Iyavo kava God eyabuyabumanei na ini kamyuyuwesi, Kimta ma kimta kurisi ina vikamyuyuwa ini debei.
51 Imana rewapaninai na bera ghamaghamasi eberaberai. Iyavo kava i nota gavugavusi kamonai ekayokayotata na ikugerisi.
52 Kiikiivavo eteretereoruwesi ma wawaya vovokuwayisi na etereterepisi.
53 Iyavo kava vitonara ikarakarisi na ikanikanisi, ma mumurisi na imasi kwebukwebusi ma evonavonatawesi.
54 Ina bigabiga Israel damsi ini vitesi, ke nuwanuwana ita wapa da iti kamyuyuwesi.
55 Vonakiiyapa bagibagina iterei Abraham ma tupurereghina kurisi, Tuna sisiyina ita kaekiki mau kurisi iberai na enununuri.”
56 Ma vaghina, Meri nawaravi aroba Elisabet yavata imakai ma muriyai ivovira ina ku dobu.
57 Elisabet ina mara ipisi da iti tuwa na ivi tuwa da natuna tomowa.
58 Ma ina rakaraka ma turaturana sisiyina ivi yanei da Elisabet yavata ivi nuwabiibii kirakai da Bada ivi kamyuyuwei da ivi tuwa.
59 Ivi tuwa murinai na mara 8 ikovi na wawaya iriyei da tomowa kikei kwimata bekana ita tuviviratawei ma kana vava ita verei. Ma iti vavei Zekaraya, ina mamai yavata iti varigheya.
60 Ma ina maduwa ivona bo, “Kegha, kana vava Jon.”
61 Ma wawayisi ivonapotei bo, “Am rakaraka kamonai ke sago iyai da kana vava nakanani.”
62 Ma wawayisi tomowa kikei ina mamai kurina imasiyai irurutawei, akova ita viiya da ina kayowana ikikava natuna kana vava kubiine.
