Lucas 20:30-45

³⁰Penga niyan, nengognan se ikedowa meama te nayi din nebalo, meneng nematay heman sikandin.

³¹Penga niyan, nengognan heman kandin se iketelo meama. Migpetibos-tibosay se pito telekedowa nengognan te bayi sìyan, meneng nematay se kedita dan te wedad pa palos batà dan.

³²Penga niyan, nematay heman se bayi.

³³Nayan, indani kay. Aw meantay se otaw lekat te nematay, sinu lay lebò diyà kandan se ontò esawa te bayi sìyan? So migpetibos-tibosay dan se pito nengognan kandin.”

³⁴Minikagi si Jesus, “Gayed pa egpengognan se otaw dini te keneyonan.

³⁵Meneng kidoen te langit, eked den pengognan se otaw pinemallì te Timanem aw entayen din dan lekat te nematay.

³⁶Eked dan todà kematay, so iling dan te menge anghil. Meinang dan menge batà te Timanem, so entayen din dan lekat te nematay.

³⁷Metoman dan meantay lekat te nematay, so impetaga-taga iyan heman i Moises. Pegsolat din tepad te pegpekità te Timanem diyà kandin kidoen te sagbet limegdeg, tinawal din se Pengolo ‘Timanem gayed egseligan i Abraham, aw si Isaac, aw si Jacob.’

³⁸Kenà otaw wedad pedowan se egsalig te Timanem, meneng otaw doen pedowan se egsalig kandin. Yan se doun te keilangan ketegahan tadon te doen keentayan te lawa te otaw nematay, so binegayan dan te Timanem te kaling pedowan wedad temanan.”

³⁹Doen kidoen menge menenoladà te punù, aw minikagi dan, “Sir, ontò mèpiya se intaba no kandan.”

⁴⁰Penga niyan, wedad palos otaw migtelaman mig-insà kandin.

⁴¹Minikagi si Jesus, “Pengkey benal se ipegtoladà dan te bowad-bowad i David se Misiyas isogò te Timanem dini kenyo,

⁴²meneng minikagi si David te Pengolo din se Misiyas, so simolat si David kidoen te libro te Delangan, ‘Minikagi se Timanem diyà te Pengolo ko, Penenoo ka dini te tangkil ko

⁴³lamig dàgen ko se menge poon no aw ipetolò ko dan kamno.’

⁴⁴Na, aw minikagi si David te Pengolo din se Misiyas, kenà olò bowad-bowad din se Misiyas, meneng Pengolo din heman.”

⁴⁵Dalem te pegpenenalan te medita otaw ki Jesus, minikagi sikandin diyà te menge tinoledaan din,