San Lucas 20:30-45

³⁰Orzeꞌ yu cyup zeꞌ pchelaa gaꞌy mi. Orzeꞌ niꞌ ziꞌl gutaꞌy, nunu wangyeeñ iꞌñ yu ni biñ mñaa zeꞌ.

³¹Orzeꞌ niꞌ ziꞌl yu chon pchelaa gaꞌy nu biñ mñaa zeꞌ. Orzeꞌ zaꞌ gagy laa dey pchelaay mi. Tees wangyeeñ iꞌñ ni tub la dey nim.

³²Laab ndeꞌ la, orzeꞌ biñ mñaa zeꞌ gutaꞌm.

³³Na ornu shuub dzi nu gyabañ de mbecy gut, ¿ca na dey zeꞌ gac mñaay biñ mñaa zeꞌ? Gun zaꞌ gagy laa dey pchelaay mi ―na dey.

³⁴Orzeꞌ na Jesuuz rab mi dey: ―Gyishlombecy ii de yu gyeey, nu de biñ mñaa rchelaa dey losaꞌy.

³⁵Tees de yu gyeey nu de biñ mñaa nu yad ñi nu gyabañ gri dey tuubaꞌ lo yu, de yu zeꞌ wachelaa gaꞌ dey.

³⁶Gun orzeꞌ wataꞌ dey, sinu chuꞌ dey gal nu yuꞌ de anc, nunu gyac dey iꞌñ Ñgyoozh nu nac nu gyabañ dey.

³⁷Gun laab Moisees bicy yu nu bi gud lagy na nu gyabañ de mbecy nu bi gut lat de riidz nu bzeeñ yu ni yag nu rca gyi zeꞌ. Lat de riidz zeꞌ mnii Moisees nu Shuaan na nac mi Ñgyoozh ni Abraham, nac mi Ñgyoozh ni Isaac, nunu nac mi Ñgyoozh ni Jacob, rniiñ.

³⁸Gun Ñgyoozh a̱ꞌ nac mi Ñgyoozh ni mbecy nu bi byaꞌ lo la, sinu nac mi Ñgyoozh ni mbecy nu gabee zu, gun par mi zeꞌ dela mbecy gabee zu dey ―na Jesuuz.

³⁹Orzeꞌ la be de mbecy nu rlyuu leey ni Ñgyoozh nu yuꞌ zeꞌ na dey: ―Masht, tonaꞌ la nap mniir ―na dey.

⁴⁰Gun wancuicaꞌ dey baloor nu ngugyiꞌ zir yu lom.

⁴¹Orzeꞌ Jesuuz nam rab mi dey: ―¿Lagu rnii dey nu Mesías, biñ nu ca lo cuen nu cyid, gruum lat nez Dabi?

⁴²Gun laab Dabi mniiy tub riidz lo libr ni Salmos. Orzeꞌ nay: Ñgyoozh nam rab mi Shuaana̱, Gzub ru lugaar ni mbecy nu gya zir zu, par yaa be̱e̱ ii,

⁴³Gashtal gyicy la̱ nu gyicy ru gan losaꞌ yuur, nam, na Dabi.

⁴⁴Orzeꞌ ¿lac mod gruu Mesías lat nez Dabi, benu ub la Dabi rniiy rab yum: “Shuaana̱”, rniiy?

⁴⁵Orzeꞌ dela de mbecy yuꞌ dey rzuub gyidag yu ni Jesuuz. Orzeꞌ nam rab mi de yu nu rsyaꞌ lom: