Luk 20:30-45

³⁰Afta det sekanwan braja blanga im bin merrit det seimwan gel. Bat imbin dai, en im nomo bin abum eni biginini du.

³¹Lagijat gin imbin hepin langa ol detlot najalot faibala braja blanga dubala. Deibin ol merrit langa det seimwan gel, en wen deibin ol dai, dei nomo bin libum eni biginini,

³²en afta det gel bin dai du.

³³“Wal yu dalim melabat na. Wen det taim garra kaman blanga ola dedbala pipul garra gidap laibala, blanga hu waif det gel garra jidan, dumaji imbin merrit langa ol detlot sebenbala braja gija?” Lagijat na detlot serramonimen bin askim Jisas.

³⁴Wal Jisas bin tok, “Ebribodi iya langa dijan kantri dei merrit.

³⁵Bat detlot pipul hu garra gidap laibala brom dedbala bambai, dei kaan merrit det taim.

³⁶Dei garra jidan wulijim detlot einjul. En dei kaan dai du. Olabat garra gidap laibala. En blanga tharran na olabat biginini blanga God.

³⁷“Yumob reken ola dedbala pipul kaan gidap laibala. Bat Mosis bin shoum yumob ola dedbala pipul garra gidap laibala. Det stori langa oltestaman blanga det tri weya bin barnbarn garram faiya, im tokabat God lagijat na. Im tok, ‘Mi na det God blanga Eibrahem en Aisik en Jeikob.’

³⁸“Yumob sabi? God nomo God blanga dedbala pipul. Im God blanga laibala pipul, dumaji im na meigim olabat jidan laibala.” Lagijat na Jisas bin tok.

³⁹Wal sambala lowamen bin tok, “Titja, yubin gibit olabat gudwan ensa.”

⁴⁰En nobodi bin geim blanga askimbat im enimo kwestjan.

⁴¹Wal Jisas bin askim olabat kwestjan na. Imbin tok, “Wotfo sambala pipul tok det speshalwan Bos gulum Masaiya im grengrensan blanga King Deibid?

⁴²Deibid imselp bin tok langa det buk gulum Saam.

⁴³Imbin tok, ‘God bin dalim main Bos, Yu jidan langa main raidensaid raidap ai garra bidim ola enami blanga yu en meigim olabat jidan lobala langa yu.’”

⁴⁴“Wal yumob dalim mi na. Hau det Masaiya garra jidan grengrensan blanga King Deibid wen Deibid bin gulum im Bos?” Lagijat na Jisas bin tok langa olabat.

⁴⁵Afta na wen ola pipul bin stil deya lisinbat langa im, Jisas bin tok langa im wekinmen olabat,