Luka 20:30-45

³⁰Wakabili kamsola mtwanzi ija, lakini nayo kafa bila wana.

³¹Abaho wa kadatu kamsola. Vivo ilawilile kwa wose saba wamsola, lakini wafa bila wana.

³²Kukimambukizo, mtwanzi ija nayo kafa.

³³Lelo mwiisiku ya kuzilibuka, mtwanzi ayo kokuwa mwehe wa nani? Kwavija kakala yasoligwe na wose saba.”

³⁴Yesu kawedika, “Wanhu wa mwiisi ino wosola na kusoligwa,

³⁵lakini waja wasaguligwe kuzilibuka kulawa kwa wafile na kuupata ugima wondawize, hawasola hebu kusoligwa.

³⁶Woigala na wasenga wa kuulanga, na hondawafe bule. Wao ni wana wa Mulungu kwavija wazilibuka kulawa kwa wafile.

³⁷Lakini kwa mbuli ya kuzilibuka kwa wanhu wafile, hata Musa kalagusa avo mna imbuli ya ikisolo kikwaka baho kamkema Mndewa, ‘Mulungu wa Abulahamu na Mulungu wa Isaka na Mulungu wa Yakobo.’

³⁸Heyo ni Mulungu wa wanhu wagima, siyo wa wanhu wafile. Kwavija kumwake heyo wose wagima.”

³⁹Wafundiza Malagizo ga Musa wayagwe walonga, “Mfundiza, kulonga goya!”

⁴⁰Avo hawadahile kumuuza mbuli ziyagwe.

⁴¹Yesu kawauza, “Vino habali wanhu wolonga kamba Kilisito Mkombola kolawa mulukolo lwa Daudi?

⁴²Kwavija Daudi mwenyego kolonga mna ikitabu cha Zabuli, ‘Mndewa Mulungu kamulongela Mndewa wangu, Kala hano mwambu wangu wa mkono wa kudila,

⁴³mbaka niwahume wanhu wakwihile na niweke hasi mmagulu gako.’

⁴⁴Daudi mwenyego kamkema ‘Mndewa.’ Yodahika vilihi Kilisito Mkombola yalawe mulukolo lwa Daudi?”

⁴⁵Wanhu wose viwakalile womtegeleza, Yesu kawalongela wanahina zake,