Kpɑrobu 12

1

2

3

4

5

6

7

8

9

10

11

12

13

14

15

16

17

18

19

20

21

¹Yenibɑn biruwɑ Efɑrɑimubɑ bɑ mɛnnɑ bɑ Yuudɛni tɔburɑ bɑ dɑ sɔ̃ɔ yɛ̃sɑn nɔm ɡeu ɡiɑ Yɛfiten mi, bɑ nɛɛ, mbɑn sɔ̃nɑ ɑ Amɔnibɑ tɑbu wɔri mɑ ɑǹ sun sokɑ su nun somi. Yen sɔ̃ tɛ̃, sɑ ko nun dɔ̃ɔ mɛni kɑ wunɛn diru sɑnnu.

²Yerɑ Yɛfite u bu wisɑ u nɛɛ, ɡeemɑ, nɛ kɑ nɛɡibu sɑ kɑ Amɔnibɑ tɑbu kuɑ ɡem ɡem. Sɑɑ ye sɔɔrɑ nɑ bɛɛ sokɑ i kɑ sun somi. Adɑmɑ bɛɛn ɡoo kun nɛ.

³Ye nɑ wɑ mɛsum, yerɑ nɑ nɛn wɑ̃ɑru kɑri bɔrie nɑ kɑ Amɔni be tɑbu kuɑ. Yinni Gusunɔ u mɑɑ mɑn bu nɔmu bɛriɑ. Ǹ n mɛn nɑ, mbɑ nɑ kuɑ i kɑ mɑn tɑbu wɔrimɑ ɡisɔ.

⁴Yerɑ Efɑrɑimu be, bɑ Gɑlɑdiɡii be sɔ̃ɔwɑ bɑ nɛɛ, i sɑ̃ɑwɑ be bɑ duki yɑkurɑ bɛsɛ Efɑrɑimun bwese kɛrɑn di i dɑ i wɑ̃ɑ Mɑnɑsebɑn suunu sɔɔ. Ye Yɛfite u nuɑ mɛ, mɑ u win tɔmbu kpuro mɛnnɑ bɑ Efɑrɑimubɑ tɑbu wɔri bɑ kɑmiɑ.

⁵Yerɑ Gɑlɑdiɡii be, bɑ dɑ Yuudɛnin tɔburɑ yerɔ bɑ swɑɑ burɑ mi Efɑrɑimubɑ bɑ koo tɔburɑ. Efɑrɑimu ɡoo ù n nɑ mi, ù n kĩ u tɔburɑ, yerɑ Gɑlɑdiɡibu bɑ rɑ nùn bikie bu nɛɛ, ɑ sɑ̃ɑwɑ Efɑrɑimu? Ù n nɛɛ, ɑɑwo,

⁶kpɑ bu nɛɛ, ǹ n mɛn nɑ, ɑ ɡeruo ɑ nɛɛ, Kibolɛti. Kpɑ u nɛɛ Gibolɛti. Domi Efɑrɑimu be, bɑ ku rɑ kpĩ bu ɡere dee dee. Sɑnɑm mɛyɑ Gɑlɑdiɡii be, bɑ koo nùn sɛ̃re yɑnde bu sɑkɑ Yuudɛnin tɔbu mi. Ben tɑɑ bi sɔɔ, Efɑrɑimubɑ nɔrɔbun subɑ weeru kɑ yiruwɑ (42.000) bɑ ɡu.

⁷Yɛfite wi, u Isirelibɑ kpɑrɑwɑ wɔ̃ɔ nɔɔbɑ tiɑ mɑ u kpunɑ u ɡu, bɑ nùn sikuɑ win wuuɔ, Gɑlɑdin temɔ.

⁸Yɛfiten biru Ibisɑni, Bɛtelehɛmuɡiiwɑ u kuɑ Isirelibɑn kpɑro.

⁹Bibu wɑtɑwɑ u mɑrɑ, bii tɔn durɔbu tɛnɑ, tɔn kurɔbu mɑɑ tɛnɑ. Mɑ u derɑ bii tɔn kurɔ be, bɑ mɔrɑ kɑ Isirelibɑn bwese kɛri ɡɛɛ. Mɛyɑ mɑɑ win tɔn durɔ be, bɑ wɔndiɑbɑ suɑ Isirelibɑn bwese kɛri ɡɛɛ sɔɔ. U Isirelibɑ kpɑrɑwɑ wɔ̃ɔ nɔɔbɑ yiru.

¹⁰Yen biru u kpunɑ u ɡu. Mɑ bɑ nùn sikuɑ Bɛtelehɛmuɔ.

¹¹Ibisɑnin biru, Eloni, Sɑbulonin bwese kɛrɑɡiiwɑ u kuɑ Isirelibɑn kpɑro. U Isirelibɑ kpɑrɑwɑ wɔ̃ɔ wɔkuru.

¹²Yen biruwɑ u kpunɑ u ɡu. Mɑ bɑ nùn sikuɑ Ayɑloniɔ Sɑbulonin temɔ.

¹³Elonin biru, Abudoni, Hilɛlin bii, Pirɑtoniɡiiwɑ u kuɑ Isirelibɑn kpɑro.

¹⁴Bibu weeruwɑ u mɑrɑ. Mɑ win debuminu sɑ̃ɑ tɛnɑ. Win bii be, kɑ win debumii ni, ben bɑɑwure u win kɛtɛku mɔwɑ. Abudoni u Isirelibɑ kpɑrɑwɑ wɔ̃ɔ nɔɔbɑ itɑ.

¹⁵Yen biruwɑ u kpunɑ u ɡu. Mɑ bɑ nùn sikuɑ Pirɑtoniɔ Efɑrɑimun temɔ Amɑlɛkibɑn ɡuurɔ.