1Gi ɠulaai ma faaɓaagi laawu, gi kwɛɛni ga ziɛ zaama yooi naa laasei ka ga Malete.
2Ná nuiti ti yeezeini gi wu ga pagɔ, ti abu wolai ɠaazoni, ti gi pɛ toli ga gi ɠɔɔlɛ, tɔɔzei tonai ta kɔɔlɛi ɠa é ɠɛni ʋaazu ga gola.
3Pɔle kpataɠalagi ta ɠaalɛɛni ba ga é pu abui ɠa, kɛlɛ abui liegi maaʋele ma, pɛɛɠaali ɠila ge ɠulani su, é so zeei ʋa.
4Ná nuiti ti kaalii ɠaai ma zɛlɛni Pɔle yeei ʋa, ti ɠɛni ɠɛɛzu ɓɔɠɔ ma: «Gaama zu zunui nii ɠa ɠɛ ga nu ʋaa nui ta, kulaa nɔ ɠa feya faa ɓɔii zu kpoloɗɛi wu, gaamanɔ ada-ɠalagi ná-tukpɔi la vaani bu, é ʋa yɛ vulua.»
5Kɛlɛ Pɔle kaalii voɓeni abui zu, é la vɔlɔ ma zoolɛ nɔpɛ gaaɠaani.
6Naama nuiti ti ɠɛni ná maaɓɔunsu, é ɠɛni ti ɠisu ga ti Pɔle ɠa zeei ve, ɓa é loo é za gaamanɔ. Tɛi ti lɛbini maaɓɔungi naa zu, ti la faa ɲɔu nɔpɛ kaani, é ʋa ɠɛ ga Pɔle, ti-ɠigi valiboni, ti ɗa ɠɛ ma: «Galagi ta ʋe de.»
7Ná ɠobaʋɛ ziɛ zaama yooi naa ma nu wola mɔungi daaseigi ga Puɓiliuse ná-kpeleiti ti ɠɛni ná. É yeezeini gi wu ga nɛɛnɛgi, é gi laazuʋɛɛ folo saʋagɔ laawu.
8Puɓiliuse kɛɛɠɛ ɠɛni zeeɓɛzu, kɔlɔkpadimai ta kɛlɛndɛgi ɠa é ɠɛni ba. Pɔle lɛɛni pɔ bɛ, é GALA fali bɛ, é yeela ma, é balo.
9Naa ʋoluma, seeɓɛ nui niiti kpein ti ɠɛni ziɛ zaama laai zu, ti ʋaani ɓalaa, tama ti pɛ ti ʋaloni.
10Ti unfema wola veeni gi ʋɛ, gi liizuʋɛ nii pɛ é ɠɛni ga gi ɓɛdɛma ani, ti naa pɛ feeni gi ʋɛ.
11Alu saʋagɔ leʋeni pɛ gi ʋa lɛ Alɛgezandili ɓatoi gila su, nii é samai ɠɛɛni ziɛ zaama laai zu, ɓatoi naa laaseigi ʋoluʋɛ ɠɛni ga «Gala felegɔiti ti ga yoogiti.»
12Gi zeelini Silakuse taazuʋɛ, gi kɛ miná ga folo saʋagɔ.
13Gi zeɠeni miná, gi ɗa li ga kake ɠobu ʋelei, eyɛsu gi zeeli Legio. Poluma voloi lɛkpɛma ʋelei nu yeezazuʋɛ viilɛi lokoleʋeni, gi kɛɛni ga folo felegɔ gi ʋa zeeli Puzɔle.
14Gi kidaaleʋe nuiti tanigaa ɠaani miná, ti gi maanɛɛnɛni ga gi dɔɔɠɔ ɠila kɛ ti ʋa. Ʋele ɠana gi zeelini la Wɔlɔme.
15Wɔlɔme ɠidaaleʋe nuiti ti gi-maawoo mɛnini, ti ʋilɛ pele ma gi laaɠomisu eyɛsu ti ʋa adaʋɛ ná laa ga Apiyuse Lɔɔɠɔi, ta ʋɛ ná laa ga Wɛɛn Laazu Ʋɛlɛ Saʋagɔi. Siɛgi zu Pɔle ti ɠaani la, é GALA mamani, naa ʋoluma iɲɔ ge lɔɔni.
16Siɛgi zu gi zeelini la Wɔlɔme, ti vaani bu ga Pɔle yɛ ɓɔɠɔ ʋɛlɛ wu, salaʋusui gila ge ɗa wɛlɛ ma.
17Folo saʋagɔ leʋegai ma, Pɔle Zuifuiti ta-lotuɠɔiti tolini ga ti ɠomi ta naati. Siɛgi zu naati ti ʋaani la pɔ bɛ, é ɠɛni ti ma: «Kɛ̀ɛleaiti, gè la faa ɠoloɠoloni ada-nuɓusɛiti ma, gè la ade-mɛmɛwolani ta-vaa ʋɔlɔmai ta ɠoloɠoloni ɓalaa. Anɛɛ naa ʋe, ti sòni, ti pìli kasoi ɠa Zeeluzalɛme, ti kùla miná, ti fè Wɔlɔme nuiti zea.
18Naati ti ɓegai ma ga nà-faiti buuʋɛtɛ, ti ɠɛni ɠɛɛzu, ti pìlɛ, tɔɔzei ti la ɠɛni nɔ̀un sɔ kaani, nii soloogai nu ʋa vaa ma.
19Kɛlɛ tɛi Zuifuiti ti la ɠɛni vaazu naa wu, kɛɛ ɠeleɠele ge la ɠɛni ná kɛni gè wooɠulani masagi Seezaal ma, naa la bosu ga wɔin ɠa mà ga gè nà-nuɓusɛiti maalɔ.
20Naa ɠa é kɛa gè toligi wogai la ga ade ɠa, ade yɛpɛ é ʋilɛ naama vai ʋa, tɔɔzei Izelayɛle ná-kitogi maaʋele ɠa za gè yɔlɔɠɔi nii zu la.»
21Zuifuiti ti gooɠaaʋoteni, ti ɠɛ ma: «Gi la sɛʋɛ zɔlɔɔni, é ʋa zeɠe Zudee yooi zu ɗa-vaa zu, gi-ɠɛɛloin gila kpalaa ge la ʋaani, é ʋa ɗa-vaa ɲɔu wo gi ma.
22Kɛlɛ wɔin ɠa gi ma ga ɗa ɓɔɠɔi è ɗa-ɠisiɛi lɛ ga giye. Nii é ga kalagi naa è ʋɔɔpɛai ba, gi kwɛɛni ga adɛ pɛ nuiti ta wuzeɠezu daalɔɠɔma ga gola.»
23Ti ku ɠili toni ga ti ɠomi. Naama voloi zeeliai ma, ti ʋaani pɔ bɛ, ti mɔin, é leʋe ma mɔungi ʋa. É zo sobui ma eyɛsu kpɔkɔi zeeli, Pɔle ɓɔɛni ti ʋɔ, é ná-kalagi wo pelei lɛ ga tiye: É GALA ná-masadai ma wooi laazeelini ti ma, é Moize ná-tɔgi zu wooiti seɠeni ta GALA goo wo nuiti ta-ɓɔɛiti, é ɠaaɓa kele ga é ti-ɠigi lati, é lo Yesu ná-fai ʋa.
24Tanigaa ti laani gooi la, zɔiti ti la kɛɛni pɛ ti ʋa la da.
25Siɛgi zu ti ɠɛni zeɠezu la Pɔle ʋɔ bɛ, tiya letele ti la ɠɛni zolooni faa ɠila ma, Pɔle niima ɠisiɛ ɠilagi woni ti ma, é ɠɛ ma: «Gaama ɠɛni Zɛnvu Ɲadegai ya, siɛgi zu é ɠɛni ɓɔɛzu la wo-mɛmɛwolani pɔ ga GALA goo wo nui Ezayi maaʋele, é ɠɛni ti ma:
26‹Li, è ɠɛ niima nuɓusɛiti ma: wa la woilo nɔ, kɛlɛ wo la faa ɠaaɠaa pɛ. Wa la wɛlɛ nɔ, kɛlɛ wo la wozaɠaa pɛ.
27Tɔɔzei niima nuɓusɛiti ti ɠɛa ga kigaaza nuiti, ti ɓɔɠɔ woizuɓɔlɔa, ti yeeʋɛɛ ɠaazu, naa ɠa a kɛ ti ɠaazu mina wozaɠa, ti-woiyeɠeiti ti mina faa mɛni, ti-yii mina faa ɠaaɠa, ti ʋa ɠale ma pɔ̀, nii a kɛ gè ʋa ti ɠɛdɛ.› »
28Pɔle ɠɛni ti ma ʋolu: «À kwɛɛ mu ga kizo fai nii GALA ge fea, daa ɠana zeelizu zii ɠiligiti ma, naati mu ta woilo ma.»
29Pɔle naama wooi wogai ma, maaɠaali wolai yɛni Zuifuiti zɔɠɔzu, ti ɗa li.
30Pɔle kɛɛni ga kona felegɔ pɛlɛi naa wu, nii é seɠeni. É ɠɛni yeezeizu nuiti pɛ bu ná, niiti ti ɠɛni ʋaazu pɔ ga ti ka.
31É ɠɛni GALA ná-masadai ma vai laazeelizu, é ɗa kalagi wo, é ʋilɛ Maliɠii Yesu Kilista ná-fai ʋa ladalai zu, faa nɔpɛ ge la ɠɛni kpeteʋeni naa ʋa.
