1Agelipa ɠɛni Pɔle ma: «Kpɔɛi ɠa è ya, ɗa zoo è woozuɠula.» Pɔle yeemaaleni, é woozuɠula, é ɠɛ ma:
2«Ee, masagi Agelipa, gòla undaanɛɛʋɛ ga gè woozuɠula è ɠaazu, é ʋilɛ naama vaiti pɛ ba, nii Zuifuiti ti daazu ùnma.
3Tɔɔzei ɗa ɓɔɠɔi è Zuifuiti kɛɛ vaa ʋɔlɔmaiti kwɛɛ kala, ta ta-ɓɔɛzuɠulaiti. Nà è maanɛɛnɛzu soma kae, è yiilɔɔ, è woilo gòo ma.
4Zuifuiti pɛ ti sìɛ ʋelei ɠwɛɛ, kaite kɛ̀ai ma ga buzeɠe niinɛgi nà-nuɓusɛiti saama, ma un ge da ma ga Zeeluzalɛme taazuʋɛ.
5Kaite ti kwɛ̀ɛni, tiya ɓɔɠɔi ni ta pɔ ta zoo ti naama zeele wooi ve, ga gè nà-eteai ɠɛɛʋɛ é zoloo kpɔgi naa ma, nii ná-fai wola ɓaai ada-ƓALA pelei ma, naa ɠa é ga Faliziɛinti ta-ɓɔgi.
6Niima ziɛgi zu ti ʋa ga ze tukpɔɠaaleʋezuʋɛ, tɔɔzei kitogi naa ʋa, nii é zèa minazeɠegi zu, nii GALA ge kɛɛni ade-mɛmɛwolani bɛ,
7ada-woloda puugɔ maazu felegɔiti (12) pɛ kitogɛ naa laazeeli vai ʋa, ti ɗa GALA dɛbi ma vaa zu kpidi ʋɛɛ folo ʋa. Ee, masagi Agelipa, naama ɠitogi maaʋele ɠa Zuifuiti ti màalɔɔzu su!
8Toɠa ɠale mu! Wo la laani da ɓaa ga GALA ka zoo é zɛnvui ve gɔvɛiti zea ʋolu?
9Nɔ̀un nà ɓɔɠɔi gè ɠisiɛni dɛ ga kɛni gè leʋe ga pele goi ma zii pɛ, gè wuzeɠe Yesu Nazalɛte nui laaseigi laalɔɠɔma.
10Naa ɠa gè kɛɛni Zeeluzalɛme, zobogi nii gè sɔlɔɔni zalaɠa ɠula ɠundiɠiiti zea, gè lo naa ma, gè ɗa kidaaleʋe nui ma mɔinmɔin pili kasoi ɠa. Ni a la ɠɛna ga ti zaa vai leve vai, gè ɠɛni ʋɔɔpɛɛzu ba ga ti maanɛɛʋɛ ga ti za.
11Gè ɠɛni leʋesu siɛ mɔinmɔin su GALA dɛbi ʋɛlɛiti pɛ bu, ga gè ɠɛni faa zeizu ti ma, gè ɓɔi ti la ga ti ɠɛlɛ ta-ɠidaaleʋei ʋa, nà-ziiɠulai lateʋe pele ma ti laalɔɠɔma, gè ɠɛni liizu gè ɗa ti zo wɛɛn laaiti su.
12Naa ɠa gè yɛni su yeeta, zalaɠa ɠula ɠundiɠiiti ti valini mà ga ta-zobogi gè li Damase.
13Ee, masagi, gè yɛni pelei zu, folo ɓekpegi gè wozakalagi ɠa, é zeɠe geeɠɔlɔgi zu, é ɗa volo gi-maaɠoolii zu ga sìɛɲɔɠɔiti, ma zezei leʋegai foloi nɔnɔi ʋa.
14Gi pɛ gi looni zooi ma, gè wooi ta mɛnini, é ɗa ɓɔɛ pɔ̀ Alame wooi zu, é ɗa ɠɛ mà: ‹Sɔle, Sɔle, lee vaa zu è wɔ̀inzeɠezu? Ɗa ɓɔɠɔ maawanazu ga ɗa ɓɔɠɔ lɔɔna ani ɠaazoɓagiti ga.›
15Gè ɠɛni ma: ‹Ɓɛ ɠa ga ɗe, Màliɠii?› Maliɠii ɠɛ mà: ‹Nà ɠa gè ga Yesu, nii è wɔinzeɠezu.
16Kɛlɛ wuzeɠe, è lo ɠɔɠɔiti ga, mazɔlɔɔ gè ɠulaa è ʋɛ kɛlɛma, nii a kɛ gè è ɠɛ ga nà-botiɠɛ nui, è ɗa zeele wooi wo nuiti ma ga è kàaʋɛ, ta è naama vaiti bo ti ma, niiti gè ʋaazu ti lɛɛzu ga ɗe mɔnɔ.
17Nà è unmɔɔ Zuifuiti ma ta zii ɠiligiti, niiti gè è leʋesu ti zaama.
18Nà è leʋesu, nii a kɛ è ti-ɠaazuʋɛti seɠe ma, è ti ɠula kpidii zu, ti ʋa wozakalagi ɠa, è ti ɠula Setana ná-zobogi wu, ti ʋa GALA pɔ, nii a kɛ ti zuvaayɛ ga ta-ɠotoiti ta ti tɔnɔ zɔlɔɔ ʋɔɔma, ta niiti ti ɲadegai ga kidaaleʋei maaʋele nɔ̀un ma.›
19Masagi Agelipa, naa ɠa é kɛɛni, gè la zooni gè ʋa ɠɛlɛ kulakɛlɛmai naa zu vai ʋa, nii gè sɔlɔɔni, é ɠula geeɠɔlɔgi zu.
20Kɛlɛ gè tɔɔzeini dɛ, gè daazeeli Damase nuiti ma, naa ʋoluma Zeeluzalɛme nuiti, naa ɠa é zeelini Zudee yooi zu nuiti pɛ ma, gaaɓela ga zii ɠiligiti, gè ɠɛni ɠɛɛzu ti ma, kɛni ti ziɛ ʋelei maavalibo, ti ɠidaaleʋe GALA ma, ta ti kɛɛwotiiti kɛ niiti ti zoloogai maavalibogi ma kɛai ta-eteai zu.
21Naa maaʋele ɠa é kɛa Zuifuiti ti sògai GALA sei ʋɛlɛi wu, ti ɠɛ ti pàa.
22Kɛlɛ GALA kpaaʋɛ nɔ̀un maazu, é yɛga su za zeeli zaaɠaza, nà ʋɛ mu, gè ɗa zeele wooi wo ɓolomadɔɠɔiti ta seizumaanɛɛgiti ma. Niima gè bosu, naa la ga faa ɠili nɔpɛ, kɛni nii GALA goo wo nuiti ta Moizeni ti boni ga daa ɠa zeeli.
23Naa ɠa é kɛɛni Kilista a la ɓɔlɔ, ta é ɠɛ ga nu mɔungi gɔvɛiti saama, é wuzeɠe, naa ʋoluma é kizo fai ma wozakalagi laazeeli dɛ Zuifuiti ma, é leɠa zeeli zii ɠiligiti ɓalaa ma.»
24Tɛi é ɠɛni ɓɔɛzu ɠanu, Fɛsetuse ɓainni la, é ɠɛ ma: «È litigɛ, Pɔle! Ɗa-vaaɠwɛ golai ɠana é ɓoloɠa!»
25Pɔle gooɠaaʋoteni, é ɠɛ ma: «Ɓa-o, nà-nu ʋagɔ wolai Fɛsetuse, gè la litini. Wooi niiti gè ti wosu, ta ga gaama ɓɔɛi, gè ti wogɛ ɓalaa ga ɠimalai.
26Tɔun vɔlɔ masagi Agelipa ɓɔɠɔi niima vaiti suɠwɛɛ, naa ɠa é kɛɛzu gè la ɓɔɛzu pɔ ga inɛinɛ, dàaʋɛ da ga niima vai tanɔpɛ ge la ɠɛɛni zeemazu, tɔɔzei ti la ɠɛɛni ga dɔɔɠuzu va.
27Masagi Agelipa, è laaʋɛ nɛi GALA goo wo nuiti gooiti da? Nɔ̀un, kìsuɠalagɛ ga è laaʋɛ ti la.»
28Agelipa ɠɛni Pɔle ma: «Ɗa-ɠisiɛi zu, su la mɔ ɠoozani, è kɛ̀ ga keletiɛn!»
29Pɔle ɠɛ ma: «Suɓuɠani ɓa suɠoozani, nà GALA falizu ga ɗa ɠila nɔ laade, kɛlɛ zɔiti pɛ ti gòoi mɛnisu za, wo pɛ wo ɠɛ ga kɛ̀ʋele, é ɠula gili ɠalui niiti polu!»
30Naa wogai ma, masagi ʋe-o, zou zɛʋɛ ɠundiɠii ʋe-o, Ɓelenise ʋe-o ta zɔiti pɛ ti sei woni ti ɠoba, ti pɛ ti wuzeɠeni.
31Siɛgi zu ti ɠɛni ɠulazu la, ti ɠɛni ɠɛɛzu ɓɔɠɔ ma: «Zunui nii la faa nɔpɛ kɛɛni nu a paa ma vaa zu, ɓa é ʋa ʋili kasoɠa ma vaa zu.»
32Agelipa ɠɛni Fɛsetuse ma: «Ni zunui nii la ɠɛni wooɠulani masagi Seezaal ma, nu a la yeeɓe ba.»
