Kölfel 148:1-13

¹Ousipwe mwareiti ewe Samol mi Lapalap. Oupwe mwareiti ewe Samol mi Lapalap seni won läng, oupwe mwareiti i me won ekewe leni tekia.

²Oupwe mwareiti i, ämi nöün chon läng meinisin. Oupwe mwareiti i, ämi nöün mwichen sounfiun läng meinisin.

³Oupwe mwareiti i, ämi akkar me maram, oupwe mwareiti i, ämi fü meinisin mi tin.

⁴Oupwe mwareiti i, ämi kewe läng mi fokun tekia, pwal ämi kewe koluk asen ekewe läng.

⁵Ir meinisin repwe mwareiti iten ewe Samol mi Lapalap. Pun i a allük, nge ir ra fisitä.

⁶Kot a anüküchareer lon lenier pwe repwe nom tori feilfeilachök ren eu allük esap tongeni tala.

⁷Oupwe mwareiti ewe Samol mi Lapalap seni won fanüfan, ämi kewe mönün lematau mi fokun watte me ämi kewe leni mi alolol,

⁸ämi inefi me ütten fau, sno me kuchu, pwal mölümöl mi apwönüetä an allük.

⁹Oupwe mwareiti i, ämi kewe chukutekia me chukutekison meinisin, ämi kewe irä mi ua me ämi irä setar meinisin,

¹⁰ämi manmwacho me manfesir, ämi mantötö me mansüsü meinisin.

¹¹Oupwe mwareiti i, ämi kewe kingen fanüfan me chon ekewe mwü meinisin, ämi samol me chon nemenem meinisin won fanüfan,

¹²ämi alüal me föpwül, pwal chinlap me semirit.

¹³Ir meinisin repwe mwareiti iten ewe Samol mi Lapalap, pun itan a tekia seni it meinisin, an ling a nom asen fanüfan me läng.