Salmo 148:1-13

¹Deliǥa is Nengazen! Sikiyu is diyan te langit, deliǥa niw is Nengazen!

²Deliǥa niw sikandin, sikiyu is langun he menge velinsuǥuen, he menge sundaru zin diyà te langit.

³Deliǥa niw sikandin, andew, bulan, wey menge vituen.

⁴Deliǥa niw sikandin, kinetikangan he langit wey is wahig diyà te zivavew.

⁵Medalig dan is langun te Nengazen! Su pinaaǥi te kebmandù din, nelimbag sikandan is langun.

⁶Wazà pidtemanan is kebpekesavuk dan diyà te midsevukan din kandan, ne kenè en heini egkahalin is kebpekesavuk dan.

⁷Deliǥa niw is Nengazen, sikiyu is langun kayi te kelibutan, menge dezekelà he langgam he ziyà te zaǥat, wey is langun diyà te kinezeleman en te zaǥat.

⁸Deliǥa niw te Nengazen, sikiyu is menge kilat, menge ǥiyew, menge ǥapun, wey mevendes he keramag he edtuman ke edsuǥuen din.

⁹Deliǥa niw is Nengazen, sikiyu is menge vuntud, menge vuvungan, wey menge kayu he zuen din beǥas wey wazà,

¹⁰langun he menge langgam: he leew wey is ayam, wey zuma pa he kelasi te langgam he ebpenanap wey ebpemenlayang.

¹¹Deliǥa niw zaan is Nengazen, sikiyu is menge hadì, menge upisyal, menge ebpemendumala, wey is langun he etew zini te kelibutan;

¹²menge menguhed man, wey is menge meǥurang en, wey ke iyan be menge vatà.

¹³Langun te sikandan ne medalig te Nengazen su iyan sikandin lavew te langun. Iyan sikandin lavew he mekeǥeǥehem te langun he ziyà te langit.