Ola Saam 148:1-13

¹Preisim YAWEI det trubala God! Preisim YAWEI ol yumob hu jidan langa hebin.

²Preisim im, ol im einjul hu wek blanga im deya langa hebin.

³Preisim im, san en mun. Preisim im, ola shainiwan sta.

⁴Preisim im, haiwan skai, en ola woda ontop langa skai.

⁵Larram olabat holot preisim det neim blanga YAWEI. Imbin tok, en imbin meigim olabat.

⁶Garram im wed imbin meigim ebrijing jidan langa olabat raitwan pleis olagijawan, en tharran na kaan neba tjeinj.

⁷Preisim YAWEI, ola solwoda langa dijan wel, en ola bigwan enimul en ebrijing weya jidan raitdan langa bodam langa solwoda.

⁸Preisim YAWEI ola laitining en heilston en sno en ola klaud en ola strongwan win hu teiknodis langa im wed.

⁹Preisim YAWEI ola hil en ola bigwan hil, en ola frut tri en ola tri langa bush.

¹⁰Preisim YAWEI ola wailwan en kwaitwan enimul, en ola enimul weya kraulkraul, en ola bard weya flaiflai.

¹¹Preisim YAWEI ola king en ola pipul, en ola boswan langa ebri kantri.

¹²Preisim YAWEI ola yanggel en ola yangboi, en ola ol pipul en ola biginini du.

¹³Larram olabat holot preisim det neim blanga YAWEI! Im neim im mowa haibalawan langa ola najalot neim. Im jidan mowa haibalawan langa dijan wel en langa hebin.