A Umana Kakailai 148:1-13

¹Avat a pite pa ra Luluai. Avat a pite pa ra Luluai arama ra bala na bakut; Avat a pite pa ia arama liu.

²Avat par kana lavur angelo, avat a pite pa ia; Avat kana lavur kor, avat a pite pa ia.

³Amur a matana keake ma ra gai, amur a pite pa ia; Avat par a umana tagul ava pupua, avat a pite pa ia.

⁴U ra lao arama liu kakit, una pite pa ia, Damana bula avat ra lavur polo ta ra ul a bakut.

⁵Boina ba diat a Pite pa ra iang i ra Luluai, Tago i ga vartuluai, ma dia ga vana rikai.

⁶I tar vatur vapadikat diat upi diat a tur tukum; I tar pait ra varkurai ba pa na panie.

⁷Avat a pite pa ra Luluai mara ra pia, Avat ra lavur konakonom, ma avat ra lavur marumian na ta,

⁸Ra iap ma ra bata na vatvat, a bata i pua, ma ra vual, A ngala na vuvu bula nina ba i pait ot pa kana tinata,

⁹A lualuana ma ra lavur ilil par, A davai dia vuavuai ma ra lavur gatagal par,

¹⁰A umana leing ma ra lavur vavaguai par, A umana mangana dia kakao ra pia, ma ra lavur beo liuliu,

¹¹A umana king ta ra rakarakan a gunagunan ma ra lavur tarai par, A umana luluai ma ra lavur tena varkurai par ati ra pia,

¹²Diat par a umana barmana ma ra umana gara na vavina, A umana patuana ma ra umana kuramana;

¹³Boina ba diat a pite pa ra iang i ra Luluai; Tago ia kaka ra iangina i ngala; Kana minamar i ki akit ta dital ma ra rakarakan a gunagunan ma ra bala na bakut bula.