SALMOS 148:1-13

¹¡Ma quipaquilismacaca TOTECO nochi cati itztoque ipan ilhuicacti! Quena, ten ajacatipa xijpaquilismacaca TOTECO.

²Nochi amojuanti anilhuicac ehuani, xijpaquilismacaca TOTECO. Quena, xijpaquilismacaca nochi amojuanti cati anquitequipanohuaj nepa ilhuicac.

³Ma quipaquilismacaca tonati huan metzti. Ma quipaquilismacaca nochi nopa sitalime cati cuajcualtzi taahuíaj.

⁴Ma quipaquilismacaca nopa ilhuicacti cati eltoc más huejcapa, huan nopa apocti cati mopantía ajacatipa.

⁵Xijpaquilismacaca TOTECO pampa yaya camanaltic huan mochijqui cati ama onca.

⁶Yaya quinchijqui para eltose para nochipa, huan quinmacac se tanahuatili cati amo quema mopatas.

⁷Ma quipaquilismacaca TOTECO nochi cati itztoque ipan ni taltipacti. Ma quipaquilismacaca nopa huejhueyi tapiyalme cati itztoque tatzinta hueyi at.

⁸Ma quipaquilismacaca nopa tit, tesihuit, tasesecayot, apocti, huan nopa ajacat cati quichihua ipaquilis.

⁹Ma quipaquilismacaca nochi tepeme, tachiquilme, huan nochi cuame cati temacaj inintajca huan nochi tiocuame.

¹⁰Ma quipaquilismacaca TOTECO nochi tamanti tapiyalme, huan nochi tecuanime, cohuame, huan totome.

¹¹Ma quipaquilismacaca nochi tanahuatiani cati itztoque ipan taltipacti, huan nochi jueces, huan nochi masehualme ipan nochi talme.

¹²Ma quipaquilismacaca telpocame, ichpocame, huehuentzitzi huan coneme.

¹³Ma quipaquilismacaca TOTECO pampa san yaya quinamiqui tijhueyimatise. Ihueyitilis nelhueyi hasta quipano ilhuicacti huan taltipacti.