Johane 12:9-32

⁹Eme Judaŋic bocjaha jaŋe hae ira jume manarâ ijaha fisimbiŋ. Erâ Jesure sawa mâcne, Lazaro hâmockonec bâɋârewec e mâmâc honeniŋte fisimbiŋ.

¹⁰Eme irec taha bapa micne jaŋe Lazaro mâmâc qaniŋte dâŋgie bambiŋ.

¹¹Judaŋic bocjahazi ere erâ rarâ Jesurao qohotambiŋte iŋuc embiŋ.

¹²Hae fureme ŋic guru sâko hombaŋte biac Jerusalem haeo fisimbiŋ jaŋe dâŋ biŋe ʒiŋuc manambiŋ: “Jesu warehuc jukac.”

¹³Dâŋ i manarâ ʒariŋ bazu amec erâ hatao bâfuaniŋte rambiŋ. Erâ bâfuarâ ofac hecnehuc ʒiŋuc mumbiŋ: “Ohec, Wofuŋte micte ware‐nârekac e mumbiaŋkenaŋ, Israe ŋicwofuŋ ohec!”

¹⁴Jesu e doŋgi motecne bâfuacnepie fainao ŋehuc rawec. I findaŋdâŋ kecʒiŋuc fokac irec sâcko ewec:

¹⁵“Zioŋte otâ, go mi hâwicguoc; manakic, ŋicwofuŋgezi fakac, doŋgi motecnere âsio fakac.”

¹⁶Dâŋ i motecfâc‐ticne jaŋe mârâc mi mana‐hâmombiŋ. Juku Jesu sambâŋ tatamac‐ticnao risie feme dâŋ irec manasurâ ʒiŋuc mana tarambiŋ: I ere qâreŋkekicnere sâc ijaha ecnembiŋ.

¹⁷Jesu e Lazaro wiracneme ʒâŋeruŋkonec wahame honembiŋ ŋic guru sâko i jaŋe gâcne dâŋ binaŋ ejarembiŋ.

¹⁸Eme mâsi irec biŋe manambiŋte bocjahazi hatao ra bâfuambiŋ hâcne.

¹⁹Eme farisaio ŋic jaŋe jaŋackoaŋ ʒiŋuc muhuc muc manac embiŋ: “Manaŋgopieŋ, ŋoŋe dâŋgie bâipiehapie ŋic mâmâc sasawa erao qohota‐fâreŋgopieŋ ine!”

²⁰Judaŋic hombaŋte Jerusalem haeo fisimbiŋ jaŋere ŋondeŋko Grikŋic qâpuc moc moc mâmâc juhuc Anutu mai ecnembiŋ.

²¹Eme jaŋe Filipo Besaida haeonec Galilaia mâreŋkonec erao rarâ ʒiŋuc âzâcnembiŋ: “Ŋicbomboŋ, nâŋe Jesu honezo muŋgopeneŋ.”

²²Mupie Filipozi Anderea âzâcneme mâmâc Jesurao rarâ dâŋ i âzâcnepic.

²³Âzâcnepire ʒiŋuc muwec: “Ŋic Fâri Wâtuŋne huriri qâreŋ‐ticne fua tâcneocte ʒâfo maickekac hâcne.

²⁴Jâmbomac jâmbâŋ ŋazape mananiŋ, jacgoŋ hândâŋ e mâreŋko mi hurâ mâc foku foocmu, mâreŋte nânâ eme ine fârine bocjaha fuaocmu.

²⁵Moc e juju‐ticne âgo ecneme sifuckecneocmu, moc e mâreŋko juhuc juju‐ticne râsi ecneme juju sanaŋte biŋe focneocmu.

²⁶Moc e nore kiŋaŋ qaqa ezo murâ bâjâpecnuzejec, eme no jupemuoa kiŋaŋ qaqa‐nanezi juocmu. Moc e no kiŋaŋ qanareocmu, e Mamac‐nanezi erickeocmu.

²⁷Ʒi maŋnane fâfârerâ ɋarac ɋarac qakac. Ehame weniŋuc mupemu? ‘Mamac go dameŋ maicnukac i bâsuec’ iŋuc mupe? Misac, iŋuc aricne, dameŋ i hâcne maicnuocte mukicne.

²⁸Irec Mamac go mutec ʒâŋe biŋegere huriri qâreŋ fua tâcnezejec.” Mume sambâŋkonec dâŋ ʒiŋuc wahawec: “I huriri qâreŋ‐ticne fuawec erâ huriri qâreŋ jaha fua raocmu.”

²⁹Eme ŋicguru domambiŋ jaŋe manarâ mumbiŋ, “Ɋuŋ hejec.” Â gâcnezi mumbiŋ, “Aŋelo moczi dâŋ âzâcnejec.”

³⁰Mupie Jesuzi micjeŋicko rorâ ʒiŋuc jazawec: “Dâŋ i nahacnere mâcne, ŋoŋere erâ fuajec.

³¹Ʒi mâreŋko ââke râwiŋ dameŋ maickekacte mâreŋ ʒirec ŋicbomboŋ e hetuŋkezo.

³²Mâreŋkonec bâfeŋnupie mâreŋ sâc ŋic fârec‐jopape norao fisiniŋmu.”