Yuhanna 12:9-32

⁹Yahuudiyankooɓe heewɓe anndi Iisaa ana Baytaniya, njehi ton. Wanaa saabe Iisaa tan waddi ɓe, yalla eɓe njiya Laajaru guurtinaaɗo oo duu.

¹⁰Non hooreeɓe yottinooɓe sadaka ndawridi mbaran Laajaru duu,

¹¹sabi Yahuudiyankooɓe heewɓe ana njoppa ɓe ngoonɗinoya Iisaa saabe Laajaru.

¹²Janngo mum, jamaa keewɗo garɗo hawrude e iidi oo nani Iisaa garoowo Urusaliima.

¹³Ɓe ɓami caɓe tamarooje, ɓe cakkitoyii mo. Eɓe kuljina, eɓe mbiya: —Jettooje e barke ngoodanii gardoowo e dow innde Joomiraaɗo oo! Jettooje ngoodanii mo, kanko kaananke Israa'iila!

¹⁴Iisaa heɓi mola ndakiiwa, waɗɗii, hono no Binndi ɗii mbiiri ɗum nii:

¹⁵«Yimɓe ngalluure Siyona, pati kulee! Ƴeew, kaananke mon ana wara, ana waɗɗii mola ndakiiwa.»

¹⁶Nden taalibaaɓe makko ɓee paamaalino ko ɗum woni. Kaa caggal Iisaa teddinaama, ɓe miccitii ko mo sappananoo koo ɓe ngaɗi mo.

¹⁷Jamaa tawdanooɗo e makko nde o wuurtinnoo Laajaru, o noddi ɗum iwde e yanaande ndee, kaɲum'en duu ana ceettii.

¹⁸Ɗum waɗi so yimɓe heewɓe njehi cakkitoyii mo sabi ɓe nanii o waɗii ndee haaynde.

¹⁹Non Farisa'en mbiyondiri: —On njii, walaa fuu ko mbaawan-ɗen mo, aduna oo fuu annii jokki e makko.

²⁰Won Yunaninkooɓe tawaaɓe hakkunde warɓe Urusaliima faa ndewa ley ɲalaaɗe iidi ɗee.

²¹Ɓe ɓattitii Filipa jeyaaɗo Baytisayda ley leydi Galili, ɓe mbii ɗum: —Moobbo, miɗen njiɗi yiide Iisaa.

²²Filipa yehi haalanoyi Andire. Ɓe njottinoyi haala kaa Iisaa.

²³Iisaa jaabii ɓe: —Wakkati mo Laamɗo hollata teddeengal Ɓii Neɗɗo oo yottike.

²⁴Miɗo haalana on goonga: so wabbere alkama yooraali aawaama e leydi, heddoto yo wabbere wootere. Kaa so nde yoorii nde aawaa fuu, nde riman faa heewa.

²⁵Neɗɗo fuu jiɗɗo yonki mum, mursan ki, kaa jeebiiɗo yonki mum e aduna oo, damman ki, heɓan nguurndam nduumiiɗam.

²⁶So won muuyɗo gollande kam, yo jokku e am. Ɗo ngon-mi fuu, ɗoo golloowo am duu wonata. Baabiraaɗo teddinan gollanoowo kam.

²⁷—Jooni mi wemmbaama. Koɗum mbiyan-mi? Mi wiya Abba hisinam e oo wakkati naa? Mi waawaa wiide ɗum sabi kammari wakkati oo ngardu-mi.

²⁸Abba, teddin innde maa. Daande nanaa iwrude dow kammu: —Mi teddinii nde, mi teddinan nde kasen.

²⁹Nde yimɓe darinooɓe ton ɓee nanunoo nden daande ndee, mbii ɗum riggaango kammu. Woɓɓe mbii: —Malaa'ika haaldi e makko!

³⁰Iisaa wii ɓe: —Wanaa saabe am daande ndee wardi, saabe mooɗon.

³¹Jooni woni sariya aduna oo. Jooni kaananke oo ɗoo aduna tippete sella.

³²Miin, so mi toownaama iwde e leydi ndii, mi fooɗan yimɓe fuu warde e am.