Ioanes 12:9-32

⁹Sus oko me toto ari asaer, me a kot wasa o, irail ari kodo pweki Iesus o pil, pwen kilang Lasarus, me a kotin kamauredar sang ren me melar akan.

¹⁰Samero lapalap akan pil raparapaki, en pil kamela Lasarus.

¹¹Pwe Sus oko toto kola o poson Iesus pweki i.

¹²Mandan ran o aramas toto, me toun iang kamadip o, lao rong, me Iesus pan kotilang Ierusalem,

¹³Ap paledi ran tuka kan o koieila tu ong i, ngisingisida: Osiana! Meid iasanai me kotido ni mar en Kaun o Nanmarki en Israel!

¹⁴A Iesus lao kotin masani esel pul amen, ap kaipokedi poa, duen a intingidier:

¹⁵Der masak nain Sion seripein! Kilang om Nanmarki kotido, kaipokedi pon nain esel amen.

¹⁶A sapwilim a tounpadak kan sota madang weweki mepukat. A Iesus lao linganlar, irail ap tamanda mepukat, me indingidier duen i, o me ir wiai ong i mepukat.

¹⁷A pokon o, me iang i ni a kotin molipei Lasarus sang nan sousou o, ni a kotin kamauredar i sang ren me melar akan, kadede i!

¹⁸Iei me aramas kokiieilang i, pwe irail rongadar, me a kotin wiadar kilel wet.

¹⁹Parisär oko ap indada nan pung ar: Komail kilang, me komail sota kak wia meakot. Kilang, toun sap akan idauenla i.

²⁰Akai men Krik iang irail, me koda dong kamadip o, pwen kaudok.

²¹Mepukat ko dong Pilipus, men Petsaida en Kaliläa, poeki re a indada: Maing, se men udial Iesus.

²²Pilipus ap kodo kaireki Andreas, a Andreas o Pilipus kaireki Iesus.

²³A Iesus kotin sapeng irail masani: Ansau leler, me Nain aramas pan kalinganla.

²⁴Melel, melel I indai ong komail, ma wan korn so moredi ong nan pwel o mela, a pan kelepata, a ma a pan mela, a pan kaparapar wa toto.

²⁵Me pokepoke maur i, pan salongala; a me tounmeteki maur i pali pa, pan diarada maur soutuk.

²⁶Meamen papa ia, i en idauen ia! A wasa I mi ia, i wasa me papa ia, pan pil mi ia. Ma meamen papa ia, i me Sam o pan kasapwilada.

²⁷I ap lol olar, a da me I en inda? Sam kamaio wei sang ia ansau wet, ari so, i me I koki dong ansau wet.

²⁸Sam, kalinganada mar omui! Ngil eu ap peidido sang nanlang indada: I kalinganadaer, o I pan pil kalinganada.

²⁹A aramas akan me u sili me rongadar, indada: A nansapwe. A akai indada: Tounlang amen me kasoia ong i.

³⁰Iesus kotin sapeng masani: Kaidik pweki ngai, me ngil wet wiauikier a pweki komail.

³¹Met ansau en kadeik en sappa wet. Met kaun en sappa et pan lokidokila.

³²A ngai lao langada sang sappa, I pan kainonga dong ia karos.