Juan 12:9-32

⁹Medita se Judiyo dimineg te kidoen si Jesus te Bitanya, aw dimoton dan. Pengkey nengemahà dan ki Jesus, meibeg dan heman komità ki Lazaro inantay din lekat te nematay.

¹⁰Yan se doun te miglalang se menge pengolo te simbahan te imetayan dan heman si Lazaro,

¹¹so peg-antay kandin lekat te nematay, medita se Judiyo limengà te pegtaking kandan, so nemenal den dan ki Jesus.

¹²Keeldawan niyan, dimineg se medita otaw timanod te pista te agpet den domateng si Jesus kidoen te Jerusalem.

¹³Simongon dan kandin, aw inibing dan se menge pelapà te palmera sinagpì dan, so yan se ketanem dan te pegsongon dan te selotan. Migpegais dan, “Iduyun se Timanem. Iduyun heman se insogò din dimateng den. Iduyun sikandin Selotan te kedita tadon bowad-bowad i Israel.”

¹⁴Impeangay i Jesus se nati te kodà egtewalen asno, aw yan se sinekayan din. Pineokit kenyan, tinoman din se pakang tapay insolat kidoen te kagi te Timanem,

¹⁵“Na, kedita niyo tege Sion, ikà niyo egkelemitan. Domateng se selotan niyo somakay te nati te asno.”

¹⁶Pegdateng i Jesus doton te Jerusalem, wedà pa ketaga-taga se menge tinoledaan din te yan se pegketoman te pakang tapay insolat. Meneng penga te pegkeantay din lekat te nematay, aw pegpeengat din doton te langit, mig-aneng-aneng den dan te yan se impakang tepad kandin gebii, aw netoman den iyan.

¹⁷Medita se otaw kimità te pegtawal i Jesus ki Lazaro kidoen te lebeng aw peg-antay din kandin lekat te nematay. Mig-indan dan te menge doma otaw,

¹⁸aw yan se doun te medita se otaw simongon ki Jesus te pegdateng din doton te Jerusalem, so dinineg dan tepad te kepelahan ininang din.

¹⁹Pegkità te menge Parisiyo te medita se otaw timaking ki Jesus, migpebelaw-belaway dan, “Dinaeg kidon den, so timaking kandin se kedita te otaw te keneyonan.”

²⁰Doen heman menge otaw Griego timaking te menge Judiyo dimoton te Jerusalem amon megsimba dan kidoen dalem te pista.

²¹Nengemahà dan ki Felipe tege Bitsayda, sakop te Galiliya. Minikagi dan, “Sir, meibeg kay komità ki Jesus.”

²²Mig-indan si Felipe diyà ki Andres te ibeg dan, aw didowa dan se dimoton ki Jesus amon meg-indan kandin.

²³Minikagi si Jesus, “Agpet den se aldaw ipekità te Amay ko te melangkaw a.

²⁴Eneng-enengi niyo se kagi ko kenyo. Wedad ontong te benì singed aw onà itanem diyà te tanà aw ilebeng. Aw ilebeng aw tomobò, dakel se pongo niyan.

²⁵Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey eked keleyati se omol din dini te keneyonan, begayan sikandin te kaling pedowan wedad temanan.

²⁶Aw meibeg se otaw meinang sogounun ko, keilangan tomaking kanak, so pengkey kenan a pesalo, doton heman se sogounun ko. Iduyun te Amay ko se sogounun ko.”

²⁷Minikagi si Jesus, “Ontò den nepuluk se pedowan ko. Megmeno a? Eked a pemoyò diyà te Amay ko te ipelowà a din lekat te kelimahan domateng diyà kanak, so yan se doun te dimini a te keneyonan amon tomayod a kenyan.”

²⁸Penga niyan, migtawal-tawal si Jesus, “Amà, pekitai diyà te menge otaw dini te ontò ka melangkaw.” Peg-ikagi din kenyan, dinineg dan se kagi te Timanem lekat te langit, kagi din, “Tapay ko den iyan impekità, aw todà ko heman ipekità.”

²⁹Medita se otaw kidoen dimineg kenyan, meneng eden dan aw kilat. Minikagi se menge doma otaw, “Doen anghil minikagi diyà kandin.”

³⁰Minikagi si Jesus, “Kenà siak se tod te peg-ikagi te Timanem kenyan, meneng sikiyo, amon memenal kaw.

³¹Lekat seini, ipelumun te Timanem se kedita te poon din dini te keneyonan. Dàgen din heman se pengolo te medaet dini te keneyonan si Satanas.

³²Meneng penga te pegsawol kanak kidoen te kayo intollok, ipetaking ko se kedita te otaw kanak lekat te kebelad te keneyonan.”