Joni 12:9-32

⁹Maka Jiu vahe'mo'za antahizana Jisasi emani'ne hige'za, zamagra Jisasinke kenaku ome'nazanki, Lasarusima, fri'nefinti azeri oti'nea ne' kenaku e'naze.

¹⁰Ana nehu'za vugota prisi vahe'mo'za Lasarusi'nena ahe frinaku ke anaki'naze.

¹¹Na'ankure Lasarusinte'ma fore hu'nea'zanku, rama'a Jiu vahe'mo'za atre'za nevu'za Jisasinte zamentinti hu'naze.

¹²Anante nanterana rama'a vahe'mo'za, kinafinti zamare'nea knagu antahimiza ne'za (Pasova) nenaza knare e'namo'za, Jisasi'a Jerusale ne-ea ke antahi'naze.

¹³Antahite'za tofe zafamofo ani'na hantagi'za e'neri'za, ome ke'za amrara nehu'za kezati'za, Tza huogu ke'za netune! (Hosana!) Ramofo Agifi ne-ea nera agi'a hentesga hanune! Israeli vahemofo kinia agi'a hentesga hanune!

¹⁴Jisasi'a mago agaho ve tonki afu keteno, agumpi mrerino mani'ne, kasnampa vahe'mo'za korapa krente'naza kemo efore hu'ne.

¹⁵Korera osiho Saion veara, Keho tmagri Kinimo, agaho ve donki afumofo agumpi manino ne-e. (Zek 9:9)

¹⁶Agri amage nentaza disaipol naga'mo'za e'inama pusante hiazana antahi so'e osu'naze. Hianagi Jisasi'ma hanave'afi mrerino, Ra agi erige'za zamagra zamagesa nentahi'za, e'i Agriku huno avontafepina krente'negeno, amazana Agrite fore hie hu'naze.

¹⁷Ana higeno, rama'a vahe'mo'za, Jisasi'a kerifinti Lasarusi azeri otige'za ke'naza vahe'mo'za, mago'ene ome huama hume vu'naze.

¹⁸Ama'na agafare, vahe'mo'za anahu kna hu'za ome Agrira ke'naze. Na'ankure vahe'mo'za nosaza kaguvaza (mirakol) hu'nea ke nentahi'za ome ke'naze.

¹⁹Ana hige'za Farisi vahe'mo'za ohumi ahumi hu'za zamagra anage hu'naze, keho tagrira neratre'za maka vea'mo'za Jisasi amage avriri'za nevze.

²⁰Ana zupage Griki vahepinti mago'a vahe'mo'za, kinafinti zamare'nea ne'za ne'knare mono hunaku mreri'naze.

²¹Ana vahe'mo'za Galili kazigati Betsaida kumateti ne' Filipinte uhaniti'za antahige'za, ramoka Jisasi kenaku nehune.

²²Filipi'a eno Andruna eme asmitege'ne, tarega'moke vu'ke, Jisasina ome asmi'na'e.

²³Jisasi'a anage huno kenona zani'arera hu'ne, Vahe'mofo Mofavremo ra agi erisia kna atupa nehie.

²⁴Tamage hu'na neramasmue, witi rgamo'ma mopafi taniramino ofrisigeno'a anante megahie. Hianagi taniramino mopa agu'afi frisigeno'a rama'a rga'a rentegahie.

²⁵Aza'o agragu'ma avesi antesimo'a, mani'zama'a eri haviza hugahie. Iza'o ama mopafi mani'zama'a ha'rentesimo'a, manivava asimu erigahie.

²⁶Iza'o, Nagri eri'za erinaku hanimo'a, namage eno, Nagrama umnisure, eri'za vahe nimo'enena anante umanigahie, iza'o, Nagri eri'za erisimofona, Nenfa'a ra agi amigahie.

²⁷Menina Nagu namemo kna navenesianki, na'ane hu'na Nagra hugahue, Nafa'nimoka, ama knare (aua) fore hania knazampinti naza huo, hianagi ama'na agafare ama knarera (aua) e'noe.

²⁸Nafa'nimoka, ra kagi erio. Anante mago ageru monafinti eno amanage hu'ne, hago Nagra erisaga hu'noanki'na, rune Nagra erisaga hugahue hu'ne.

²⁹Rama'a vahe'ma atru hu'za anante oti'namo'za, ana ageru nentahi'za, monage nehie nehzageno, mago'amo'za ankeromo naneke hu nemigahie hu'za hu'naze.

³⁰Jisasi kenona'a anage hu'ne, ama'na agerura Nagri naza hunakura nosianki, tmagri tmaza hunaku nehie.

³¹Menina ama mopa refkohu knae, menina ama mopafi kva hu'nea nera retufe atregahie.

³²Hanki, Nagri'ma mopafinti nazeri'sga hanige'na, hakare vahera zamare Nagrarega atregahue,