ᤕᤢᤜᤢᤴᤏᤠ 12:9-32

⁹ᤂᤧᤴ ᤕᤧᤶᤔᤥ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤒᤧᤌᤠᤏᤡᤀᤥ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤂᤧᤵᤔᤥ ᤂᤢᤏᤧ᤹ ᤁᤢᤀᤥᤔᤧᤳᤇᤧᤖᤰ ᤔᤧ᤺ᤴ. ᤁᤖ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤗᤠᤈᤖᤛᤧᤴᤏᤠᤱ ᤀᤥᤔᤧᤳᤇᤧ ᤂᤧᤵᤔᤥ ᤔᤧᤍᤩᤧ॥

¹⁰ᤂᤧᤸᤗᤧ ᤆᤥᤃᤢᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤈᤖᤛᤧᤴᤏᤠᤱ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ.

¹¹ᤌᤣᤀᤠᤱᤓᤧᤸᤗᤧ ᤗᤠᤈᤖᤛᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤛᤧᤴᤍᤧ ᤔᤧᤒᤣᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥

¹²ᤁᤢᤍᤠ᤺ᤴᤍᤡᤰ ᤋᤱᤏᤠᤶᤔᤥ ᤁᤧᤈᤢᤶᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥ ᤌᤠᤱᤗ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤖᤥ॥

¹³ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤂᤧᤒᤰᤛᤡᤱ ᤐᤥᤖᤠ᤺ᤰᤜᤠ᤹ ᤔᤧᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤍᤢᤶᤛᤧ ᤗᤠᤶᤍᤣ᤺ᤱ ᤌᤠᤖᤡᤰ ᤔᤧᤒᤣᤖᤥ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤔᤧᤀ᤺ᤰᤋᤧ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤖᤥ॥ ᤀᤡᤛᤪᤠᤀᤡᤗᤛ᤻ᤔᤠ ᤜᤠᤱᤅᤡᤴ ᤔᤢ᤹ᤀᤡᤛᤠᤒᤠᤖᤥ᥄”

¹⁴ᤀᤠᤸᤗ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡ᤺ᤰ ᤕᤧᤛᤢᤖᤧ ᤀᤍᤱᤛᤠᤎᤡᤰ ᤂᤥ᤺ᤛᤢᤀᤠᤱ ᤕᤢᤰᤋᤢ.

¹⁵“ᤛᤡᤕᤥᤏᤖᤧ ᤁᤢᤛ᤻ᤛᤠ᤺ᤀᤣ. ᤔᤧᤃᤡᤛᤧᤴᤏᤧ᤹ᤀᤥ᥄ ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤜᤠᤱᤅᤡᤱᤃ ᤀᤍᤱᤛᤠ᤺ᤴ ᤕᤢᤰᤋᤢᤀᤠᤱ ᤂᤧᤏᤧ᤹ᤀᤥ ᤑᤧᤴᤗ ᤐᤳᤗᤥ॥”

¹⁶ᤋᤃᤡᤃ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤁᤧᤖᤧᤒᤠ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤁᤖ ᤕᤠᤱᤛᤡ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤢ᤺ᤰᤂᤧ ᤐᤣᤀᤠᤱᤗᤰ ᤛᤠᤶᤕᤥᤛᤠᤵᤗᤠᤀᤥ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤒᤠ ᤏᤢ ᤂᤢᤏᤧ᤹ ᤁᤢᤍᤢᤶᤛᤧ ᤗᤠᤶᤍᤣ᤺ᤱ ᤌᤠᤖᤡᤰ ᤔᤧᤒᤣᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

¹⁷ᤀᤠᤸᤗ ᤕᤧᤛᤢᤖᤧ ᤗᤠᤈᤖᤛᤧᤴ ᤀᤡᤵᤐᤢᤱᤗᤠᤶ ᤗᤠ᤺ᤰᤁᤠᤳ ᤀᤢ᤺ᤳᤋᤢᤀᤠᤱ ᤁᤧᤛᤡ᤺ᤒᤠᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤁᤧᤏᤡ᤺ᤒᤠ ᤔᤏᤠᤜᤠ᤹ᤖᤧ ᤂᤧᤴ ᤁᤠᤰ ᤐᤠ᤺ᤴᤏᤡᤴ ᤆᤰᤔᤧᤸᤗ᤹ᤀᤣ ᤀᤡᤱᤔᤧᤓᤥ᤺ᤛᤢᤖᤥ॥

¹⁸ᤂᤢᤏᤧ᤹ ᤀᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ ᤗ᤹ᤖᤡᤰ ᤔᤧᤄᤧᤵᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤒᤣᤀᤠᤱ ᤔᤧᤘᤕᤧᤖᤥ॥

¹⁹ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ᤃ ᤌᤧᤔᤠᤀᤠᤱ ᤆᤥ᤺ᤰᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧᤀᤣ ᤂᤢᤏᤧ᤹ ᤔᤧᤍᤡᤶᤍᤢᤀᤠᤱ ᤔᤧᤘᤠ᤹ᤖᤥ᥄”

²⁰ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤛᤣᤘᤠ ᤆᤥ᤺ᤰᤛᤧ ᤁᤧᤍᤠ᤺ᤒᤠᤜᤠ᤹ᤀᤥ ᤁᤢᤓᤠ ᤃᤪᤡᤁ ᤛᤢᤘᤠᤱᤜᤠ᤹ᤀᤠᤱ ᤕᤖᤢᤛᤗᤧᤶᤔᤥ ᤔᤧᤎᤠᤅᤧᤀᤠᤱ ᤔᤧᤘᤕᤧ॥

²¹ᤂᤧᤱᤜᤠ᤹ ᤃᤠᤗᤡᤗᤒᤠ ᤒᤧᤌᤛᤣᤍᤠ ᤐᤠᤱᤈᤢᤶᤒᤠ ᤑᤡᤗᤡᤐᤖᤥ ᤔᤧᤒᤣᤀᤠᤱ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤕᤧᤛᤢ᤺ᤴ ᤋᤢᤶᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥”

²²ᤜᤧᤰᤁᤩᤠᤱ ᤑᤡᤗᤡᤵᤐᤧᤴ ᤐᤣᤀᤠᤱ ᤀᤠᤴᤍᤪᤡᤕᤠᤛᤧᤴ ᤔᤧᤳᤋᤢ. ᤜᤧᤰᤁᤩᤠᤱ ᤑᤡᤗᤡᤵᤐᤧᤴ ᤏᤢ ᤀᤴᤍᤪᤡᤕᤠᤛᤧᤴ ᤐᤣᤛᤡᤀᤠᤱ ᤕᤧᤛᤢ᤺ᤴ ᤆᤧᤰᤋᤧᤳᤇᤢ॥

²³ᤕᤧᤛᤢᤖᤧ ᤐᤠ᤺ᤳᤋᤢ. “ᤔᤧᤴᤇᤠᤶᤛᤠ᤺ᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥

²⁴ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤠ᤹ᤖᤡ᤺ᤶᤒᤠᤴ ᤂᤠᤶᤔᤥ ᤔᤰᤌᤠᤀᤠᤱ ᤔᤧᤴᤇᤡ᤺ᤀᤣ ᤌᤠᤖᤡᤰ ᤂᤧᤱᤃ ᤌᤡᤰᤗᤰ ᤏᤧᤖᤥ॥ ᤁᤖ ᤂᤧᤴ ᤛᤡ᤺ᤏᤧ ᤑᤠ᤹ᤃᤪ ᤂᤧᤴᤗᤠᤶ ᤕᤖᤡᤰ ᤐᤥᤃᤢᤃᤧᤴ ᤁᤢᤈᤠ᤹ ᤌᤥ᤺ᤰᤗᤥ॥

²⁵ᤀᤠᤳᤋᤡᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤗᤢᤱᤔᤠ᤹ ᤋᤢᤰᤋᤢ᤹. ᤂᤧᤸᤗᤧ ᤔᤠᤛᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤌᤣᤀᤠᤱ ᤔᤧᤀᤡ᤺ᤳᤋᤢᤴ. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤛᤧ᤺ᤵᤋᤢ ᤕᤢᤰᤂᤢ᤹ᤖᤥ॥

²⁶ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤛᤣᤘᤠ ᤆᤥ᤺ᤰᤁᤠ ᤂᤧᤸᤗᤧ ᤀᤡᤱᤃᤠ᤹ ᤋᤡᤶᤔᤠᤀᤣ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤳᤋᤥ ᤘᤠ᤹ᤀᤠ. ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤴᤏᤠᤱ ᤂᤧᤵᤔᤥᤀᤣ ᤘᤠ᤹ᤖᤥ॥ ᤀᤠᤳᤋᤡᤸᤗᤧ ᤛᤣᤘᤠ ᤆᤥ᤺ᤰᤁᤠ ᤂᤧᤱᤃ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖᤥ॥”

²⁷“ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤡᤴ ᤛᤠ᤹ᤖᤡᤰ ᤋᤢᤰᤂᤣ ᤆᤩᤧᤀᤠᤱ ᤘᤠ᤹. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤌᤣ ᤐᤠ᤺ᤳᤋᤢᤱᤒᤠᤒᤣ᥅ ᤐᤠᤏᤢᤍᤡᤱ ᤀᤠᤶᤒᤦ. ᤁᤴ ᤀᤡᤏᤥᤃᤧᤴ ᤋᤢᤰᤂᤣᤗᤠᤶ ᤋᤠᤱᤛᤧ᤺ᤵᤋᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤒᤡ ᤗ᤹ᤀᤠ. ᤁᤖᤛᤠᤱ ᤐᤣᤗᤡ ᤔᤧᤓᤠᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤢᤰᤂᤣ ᤆᤠᤛᤧᤀᤣ ᤋᤩᤠᤱᤒᤠᤖᤥ॥

²⁸ᤂᤧᤸᤗᤧ ᤆᤥᤃᤢᤸᤗᤧ ᤐᤠᤏᤢᤍᤡᤱ ᤀᤠᤶᤒᤦ. ᤂᤧᤏᤧ᤹ ᤀᤠᤒᤠᤅᤣ ᤔᤡᤔᤡᤍᤡᤱ ᤔᤧᤳᤇᤡᤱᤅᤧ᤹ᤀᤥ॥” ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤀᤡᤱᤃᤠ᤹ ᤋᤃᤡᤛᤠ ᤀᤠᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤗᤥ॥”

²⁹ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤧᤴ ᤀᤡᤰᤗᤠ᤺ᤴ ᤔᤧᤄᤧᤵᤛᤢᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. ᤁᤱᤃ ᤋᤠᤱᤛᤠᤰᤐᤧᤴ ᤀᤢ᤺ᤰᤋᤧᤒᤠᤖᤥ. ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤠᤱᤗᤠᤀᤡᤱᤒᤧᤴ ᤕᤧᤛᤢ᤺ᤴᤏᤢ ᤐᤠᤖᤧᤒᤠᤖᤥ॥”

³⁰ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤀᤡᤰᤗᤠ᤺ᤱᤃ ᤀᤡᤱᤃᤠ᤹ ᤀᤠᤗᤠᤃᤡ ᤔᤧ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤋᤩᤧᤒᤠᤖᤥ॥

³¹ᤀᤠᤸᤗ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤄᤠᤛᤧᤴ ᤐᤥ᤺ᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ. ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤱᤃ ᤗᤠ᤺ᤰᤁᤠᤳ ᤗᤠᤵᤑᤢᤖᤥ॥

³²ᤁᤖ ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤌᤠ᤺ᤱ ᤐᤱᤛᤡᤱᤅᤠᤸᤗᤧ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤀᤡᤱᤃᤠ᤹ ᤗᤧᤵᤔᤠᤱ ᤀᤢ᤺ᤰᤂᤢᤱᤛᤡᤱᤗᤥ॥”