JUAN 12:9-32

⁹Ndalyaa men-Israel waknan ne Betania ka Jesus, lex wa men nga, per wadet men noze por ne kwii men Jesus, sinke no por ne kwii men Laser ne wa Jesus waneban Jesus.

¹⁰Por neguin wyan yra fxuz ne rnebééy lo yra fxuz diiz ne yket men no Laser,

¹¹porke por ne wneban Jesus Laser, ndal men-Israel zaruu lad men zalaleedx men Jesus.

¹²Ne wra gyëël guin, menroo menduxtee ndxin Jerusalén por ne gan men lni; ne won men ne le Jesus zadxiin Jerusalén,

¹³wtxuug men zin wzen men, wruu men watsëlnëz men Jesus, noze nesree nesrotee rlen xrëz men, re men: ―¡Nzoon Dëdyuzh! ¡Dëdyuzh gaknonen men ne zëëd por la Dëdyuzh! ¡Laa men nak xerrey men-Israel!

¹⁴Kom wzël te bur bëën bëënleg, wzob Jesus led zegne zëëd lo xgyiich Dëdyuzh ledne re:

¹⁵Men gyëz-Sión, ydxedet de; gukwii, le xerrey de zëëd nee, zëdmbib men te bur bëën bëënleg.

¹⁶Wdeedetgue xpén Jesus kwent neree, per chene che sya Jesus gyeybaa, wdee men kwent ne zenga zëëd lo xgyiich Dëdyuzh ledne rakzëët xkwent Jesus no zenga wako.

¹⁷Mén ne zu yra Jesus chene wbëz Ne Laser ne yruu Laser lenbaa no ne wneban Ne Laser, laa men ruu diiz ne wii men wneban Ne Laser.

¹⁸Por neguin ndal mén wruu watsëlnëz Ne por ne won men gyelmilaguer guin ne wlaa Ne.

¹⁹Lex rulsaa yra men ne nak farisew diiz, re men: ―Betre gakdet ylaa be. ¡Gukwii, yrandxee mén za zanal men!

²⁰Lad yra mén ne wa Jerusalén por ne saknon men Dëdyuzh lo lni, ndxin tebëd men-griego;

²¹wbig mén guin lo Blib men ne nak men-Betsaida gyëz ne nak lo lyu ne la Galilea, lex re men lo Blib: ―Dechey, rlaan noo gu noo diiz yra noo Jesus.

²²Orguin wa Blib re Blibo lo Ndrizh, lex wa men yrup men wa gue meno lo Jesus.

²³Wke Ne re Ne: ―Le or ne gaknyoo xgyelenzoon Men ne wdxiid wak Mén che wdxiin.

²⁴Nligue yna noo lo de, ne zegnak te zhobxtil, belne tsuudeto lenlyu, tetegue nako; per belne tsuu we lenlyu, rakndalo.

²⁵Mén ne rkaa xgyelembán lextoo nee gyëzlyuree, zako perdid; per le mén ne rboleedx xgyelembán por ne nak men xpén noo, zap men gyelembán ne nunk luzhdet.

²⁶Belne nuu mén rlaan ylaa xdxiin noo, rap men degne chidnal men noo, no ledne tsuu noo, nga ke tsuu men. Men ne rlaa xdxiin noo, Dëdyuzh Xuz noo ylep xeblaan men.

²⁷’Kesentyent nles nuu lextoo noo orree. ¿Pe gueleg noo? ¿Peguin ze noo: “Dëde, guselaa noo lo gyelenlesree”? Per por neree nerendxee zëëd noo gyëzlyuree.

²⁸Lex re Ne: ―Dëde, guluu xgyelenzoon de lo yra ménree. Orguin wlen te rëz gyeybaa, re we: ―Che wluu noo we, per sluu noo we ste.

²⁹Ne won yra mén ne ndxin nga rëz guin, nuu men re: ―Ngwzii we. Nuuzeg men re: ―Te angel wnii lo men.

³⁰Lex re Jesus lo men: ―Let por noodet nak rëzree ne won de, sinke por laa de yra de nako.

³¹Le or che wdxiin ne gak gyelextis gyëzlyuree no che ke wdxiin or ne koo Dëdyuzh Bzelo nee gyëzlyuree, ynebééydetre men.

³²No chene che wkaa noo lo kruz, yralondxee mén gak xpén noo.