Isaias 10:25-33

²⁵Su kenè en egkeuǥet ne egkaawè en is pauk ku keniyu ne ziyè ku maan te kandan ibpaahà is pauk ku taman te ebpemematey sikandan.

²⁶Edsilutan ku sikandan iring te mibeelan ku ziyà te menge Midianhen diyà te Batu he Oreb wey te menge tig-Ehipto hein midlened ku sikandan diyà te zaǥat.

²⁷Dutun he andew, ibpeǥawas ku sikiyu puun te ǥehem te Asiria he henduen be te meveǥat he uwiten he midtiang niw wey iring te eyuǥu he nekeveǥat te tengel niw. Ebpekeǥawas kew puun te ǥehem din su egkehimu kew he gemhanan.”

²⁸Midsurung te menge tig-Asiria is Ayat. Diyà sikandan mebayà te Migron ne intaǥak dan diyà te Micmash is menge uwiten dan.

²⁹Mibayè dan diyà te leyunà, ne ziyè dan mebpemenlipezeng te Geba. Nengahandek is menge tig-Rama, ne nemelaǥuy is menge meǥinged te Gibea he iyan inged ni Hadì Saul.

³⁰Kulahì kew is menge tig Galim! Pemineg kew is menge tig-Laish wey sikiyu is menge tig-Anatot he menge mekehizuhizu!

³¹Nemelaǥuy en is menge meǥinged te Madmena wey Gebim.

³²Guntaan he andew ebpekeuma is menge tig-Asiria ziyà te Nob. Ne ed-uyew sikandan su edsurung dan diyà te Jerusalem, kes Buvungan he Zion.

³³Pemineg kew! Is Nengazen he Mekeǥeǥehem edezeetan din is menge tig-Asiria pinaaǥi te utew zekelà he ǥehem din. Ed-iringen din sikandan te ebpenempezen he menge subpang te kayu. Ebpekevevaan din sikandan is menge gelbuwen iring te kebpemiley te memetawis he kayu.