Iosua 8:16-27

¹⁶Eae tataodi adi sasagueao gamagaridi se eogaidi bena Isaraela se henaudi, Iosua se henau arinai eanua va se laugabaei.

¹⁷Beteli eo Eae eai nige tau esega i mia, gamagaridi se lau Isaraela hesabadi: eanua se laugabaei, edi eanua dobiladi nige se gududi, Isaraela se aihenaudi, se lau.

¹⁸Guiau i ribalau Iosua arinai, i ene, Alahia nimam eai u abiisini Eae matana eai, Eae nimam eai abo ea reava. Iosua alahia nimana eai abo i abiisini Eae matana eai.

¹⁹Nimana i abiisini va tau vaseina edi aba bavaeamui eai se toroheuheula se aitautau, se avasae eanua eai, se girihai, se gabuheulai.

²⁰Eae tataodi abo se sinibui edi eanua asuasuna se ita i sae gareva eai, nige edi dobila bena se dago, se sae, se dobi, Isaraela se dago borabora va barabara eai abo se uio tauhenaudi matadi eai.

²¹Iosua eo Isaraela gamagaridi se itaeao tauvesevesei eanua se girihaiao, eanua asuasuna i sae, se uio Eae tataodi se unuidi.

²²Isi hinage eanua eai se lage se laoma hesabadi: arinai Isaraela Eae tataodi se hetaiiridi hari teha, hari teha se unuidi, nige esega i mia, eo nige esega i dago.

²³Eae edi Vasavasa se toai abo se laei Iosua arinai.

²⁴Isaraela tataodi oea eai Eae tataodi se unuohidi barabara eai va se henaudi va, gamagaridi se lauelepaidi abo se mateohi, Isaraela gamagaridi abo se uio Eae eai, hinage tatao eanua eai se lauelepaidi.

²⁵Nei asubenana ne gamagaridi se mate, tatao eo sisine tausani saudoudoi‐labui, Eae tataodi abo se ohi.

²⁶Iosua nimana eai alahia i abiisini va nige i abiuio i lau e, Eae taumiaidi gamagaridi se unuheohidi.

²⁷Edi bulumakau, eo edi gogo mo Isaraela se abigaibuidi, doha riba va arinai Guiau Iosua i lauhesom va.