IOSUA 8:16-27

¹⁶Bena Ai taudia iboudiai e heau hebou, bae hahavadia totona; bena idia ese Iosua e havaia, hanua na e rakatania.

¹⁷Ai bona Betele lalodiai tau ta dia noho; asi tauna ta Israel se havadia. I lanua na hekehona ai e rakatania, idia e havadia lao.

¹⁸Bena Iehova ese Iosua e hamaoroa, eto, Io na imamu ai ba toia roro, Ai ba dudui henia; badina be oi imamu ai baina atoa kau. Taunabunai Iosua ese ena io na imana ai e toia roro, hanua e dudui henia.

¹⁹Bena imana e toia roro negana ai, hari e komu oreana na edia komu gabuna amo e tore isi haraḡa, e heau lao, hanua lalonai e heau vareai, vada e abia; bena maoromaoro e doua.

²⁰Taunabunai, Ai taudia na e roha kerehai, hanua e doua kwalahuna guba ai e dae e itaia. Bena asi edia heau dalana ta; badina be tano ḡaḡaena e heau lao taudia na ma e lou, e havadia taudia ma e lou henidia.

²¹Iosua bona Israel taudia iboudiai ese e itaia, e komu oreana ese hanua vada e abia, bona hanua e doua kwalahuna na e daeva, bena idia na e lou, Ai taudia e hadareredia.

²²Bena hari orea ta ma hanua amo e raka lasi, e tuan henidia; taunabunai Israel taudia na kahana kahana ai, idia na ihua-pada ai. Bena Israel ese e hadareredia, ta se mauri bona ta se heau.

²³A Ai pavapavana na e abia mauri, Iosua dekena e hakaua lao.

²⁴Israel taudia na Ai taudia iboudiai, hari tano ḡaḡaena ai e havadia taudia, na e aladia ore, iboudiai na dare amo e aladia mase. Una murinai idia na Ai e lou ela, noho taudia ma dare amo e aladia ore.

²⁵Una dina ai e aladia mase taudia iboudiai na gerebu-ta daha-rua, tatau bona hahine; Ai taudia iboudiai bunu.

²⁶Badina be Iosua ese io imana ai se veria lou ela bona Ai taudia iboudiai vada e aladia ore.

²⁷A Israel taudia ese ubu-ubu ḡaudia bona kohu una hanua lalona amo e abidia edia, Iehova ese Iosua e haḡania heḡereḡerena.