IOSUA 24:19-33

¹⁹A Iosua ese hebou taudia e hamaorodia, eto, Iehova isiaina basio lao heni diba; badina be ia na Dirava helaḡana, vageḡe Diravana; ia na emui kara dika bona emui kara havara basine gwaudia tao.

²⁰Iehova boma rakatania bona dirava idaudia isiaidia boma lao heni, ia ese ihanamomui baine hadokoa, ma baine hadikamui.

²¹Hebou taudia ese Iosua e haere henia, eto, Lasi, ai na Iehova isiaina baia lao heni.

²²Bena Iosua ese e hamaorodia, eto, Emui hereva ihahedinaraina na umui sibomui; Iehova vada o abia hidi, ia isiaina ba lao heni o tomu. Idia na e haere, eto, Ai sibomai ese vada a gwauraia hedinarai.

²³Iosua ma eto, Benaini, dirava idaudia bogaragimui ai mimia na ba negedia, bona lalomui ba hamanadadia, Iehova, Israel Diravana, enai.

²⁴Hebou taudia ese Iosua e haere henia, eto, Iehova, eda Dirava, isiaina baia lao heni, ia erena baia kamonai.

²⁵Taunabunai, Iosua na hebou taudia ida e herohemaino una dina ai; bona taravatu bona haheḡani e henidia, Sekem ai.

²⁶Bena Iosua ese unu hereva na Dirava ena taravatu bukana ai e tore; bena nadi badana ta e abia, oak auna henunai e haginia, Iehova ena gabu helaḡana ai.

²⁷Bena Iosua ese taunimanima iboudiai e hamaorodia, eto, A itaia, ina nadi na ita ihabadelaida toana ai vada ela; badina be Iehova ese e henida herevadia iboudiai na ina nadi ese vada e kamonai: taunabunai Iehova, emui Dirava, ba koia negana ai, ina nadi ese baine hahemaoro henimui.

²⁸Bena Iosua ese idia iboudiai e siaidia karoho, ta ta ena tano ena tano baela.

²⁹Unu ḡau muridiai, Iosua Nunu, Iehova ena hesiai tauna, e mase. Ena laḡani iboudiai na sinahu-ta dikoana gwauta.

³⁰Ena tano ai e guria, Timnata-sera ai; una na Efraim ororodia ai, Gaasa ororona mirigini kahana ai.

³¹Israel taudia ese Iehova isiaina e lao heniva, Iosua ena maun dinadia iboudiai lalodiai, bona tau-badadia, Iosua ena mase murinai dounu e mauriva bona Iehova ena kara Israel taudia ediai na matadia amo e itava taudia, edia mauri dinadia lalodiai danu.

³²Iosef turiana, Israel taudia ese Aigupto amo e mailaidia, na Sekem ai e guridia, Iakob ese Sekem tamana Hamoro ena amo e hoia tanona ai. Davana be silver monidia sinahu-ta e heni; bena Iosef garana edia tano ai ela.

³³Eleasara Aaron danu e mase; bena Gibea ai e guria, natuna Fineha vada e henia hanuana bunai, Efraim ororodia ai.