JOSUA 24:19-33

¹⁹Eme Josuazi ŋic ŋokac ʒiŋuc jazawec: “Wofuŋ e Tiri Anutu, e ʒoɋac‐ticnehec, irec ŋoŋe kiŋaŋ sâcne mi qacneniŋmu. E kiŋ bahac â qaqatara‐ŋeŋic moc mi behe‐jâmbâŋkeocmu.

²⁰Ŋoŋe nemu kiŋaŋ qajarehuc Wofuŋ fârine râpeckeniŋmuo ine wiac biaŋne eŋareweczi ŋerisierâ wiac hâhâwicne bâmâckehuc eŋarerâ sipiric‐ŋopaocmu hâcne.”

²¹Eme ŋic ŋokac jaŋe Josua âzâcnembiŋ: “Aricne, nâŋe Wofuŋ kiŋaŋ qacnenaŋmu.”

²²Eme Josuazi ŋic ŋokac jazawec: “Ŋoŋe ŋaŋaczia fuŋne‐ŋeŋic muhuc Wofuŋ kiŋaŋ qacneniŋte mutaniŋkeŋgopieŋ hâcne.” Eme jaŋe mumbiŋ: “Nâŋe nâŋac fuŋne‐nâŋec muŋgopeneŋ.”

²³Eme eki muwec: “Irec nemu jabane bajuŋgopieŋ i bârârie‐fârerâ Israere Wofuŋ Anuturao maŋ mamanasu‐ŋeŋic râepie fosanaŋkezejec.”

²⁴Eme ŋic ŋokac jaŋe Josua âzâcnembiŋ: “Wofuŋ Anutu‐nâŋecte mic reŋkerâ kiŋaŋ qacnenaŋmu.”

²⁵Mupie Josuazi ʒoaŋ ira ŋic ŋokac jaŋe Anutuhec ʒâfic‐jopahuc Sikem haeo sâcmutâc â tiŋne jujure dâŋ mutâcne‐jare‐fârewec.

²⁶Ehuc dâŋ sasawa i Anutu sâcmutâc‐ticnere papia qizecko qâreŋkewec. Erâ qânâ sâko moc rorâ boriŋfuŋko Wofuŋte furu mâreŋ fowec ira âkendâŋneme domawec.

²⁷Erâ Josuazi ŋic ŋokac jazawec: “Qânâ ʒi honeŋgopieŋ, e Wofuŋzi dâŋ sasawa nâzâwec i mana‐fârekac. Eme ŋoŋe Anutu‐ŋeŋic enʒaŋauc ecnehuc eatuckeniŋmuo ine eki fuŋne‐ŋeŋic sâcne rituocmu.”

²⁸Eme Josuazi ŋic sasawa mâreŋ ro rauc embiŋ sâc sorec‐jopame râwiŋne‐fârembiŋ.

²⁹Wiac sasawa ewarehuc jumbiŋ irec faicnao Wofuŋte kiŋaŋŋic Nuŋte ŋokâ Josua e jara 110 bazurâ hâmowec.

³⁰Hâmome e jahacne mâreŋ Timina‐Sera Eferaim tiki mâreŋko Gasi tiki ŋekac irec faicnao duckembiŋ.

³¹Eme Israe ŋic jaŋe Josuare dameŋko â ere faicnao Wofuŋzi Israe ŋic jaŋerao gie bame sâc hone manac embiŋ soŋaŋ i jaŋere dameŋko wâc Wofuŋ kiŋaŋ qacnehuc jumbiŋ.

³²Eme Israe ŋic jaŋe Josefere siec Aigita mâreŋkonec bawefumbiŋ i Sikem haeo Jakobozi mâreŋ dâkâne moc Sikemte mamac Hamoro ere ŋokâfâc jaŋeraonec moneŋ kâcɋene 100‐zi furine bawec ira duckembiŋ. Mâreŋ i hâcne Josefere ɋâricfâc jaŋe ro rauc embiŋ.

³³Eme Aroŋte ŋokâ Eleaʒa e wâc iŋuc jaha hâmowec. Eme jaŋe ŋokâ‐ticne Pinehasi ere hae Gibea, Eferaim tiki mâreŋko râcnembiŋ, ira duckembiŋ.