Josua 24:19-33

¹⁹Mago Josua kêsôm gêdêŋ lau tau gebe “Amac atôm gebe anam sakiŋ Apômtau atom, gebe eŋ Anôtô dabuŋ. Eŋ gêjam lêmuŋ lau gebe têntac êwiŋ eŋ taugeŋ. Eŋ oc êsuc amacnêm biŋ agêli biŋsuŋa to nêm sec ôkwi atom.

²⁰Eŋ kêmoasiŋ amac su, mago amac embe awi eŋ siŋ ma anam sakiŋ anôtôi jaba, go ênam dêmôê amac ma êŋgôm amac sec to enseŋ amac su.”

²¹Ma lau sêsôm gêdêŋ Josua gebe “Masi, aêac abe anam sakiŋ Apômtau.”

²²Ma Josua kêsôm gêdêŋ lau gebe “Amac taôm awa taôm sa gebe ajaliŋ Apômtau sa gebe anam sakiŋ eŋ.” Ma êsêac sêsôm gebe “Aêac awa tauŋ sa sugac.”

²³Eŋ kêsôm gebe “Amboac tonaŋ, go atiŋ anôtôi jaba, taŋ sêc amac ŋalêlôm naŋ su, ma akêŋ nêm ŋalêlôm êndêŋ Apômtau, Israelnêŋ Anôtô.”

²⁴Ma lau sêsôm gêdêŋ Josua gebe “Aêac anam sakiŋ Apômtau, aêacnêŋ Anôtô, to taŋeŋ wamu ênê awa.”

²⁵Tec gêdêŋ bêc tonaŋ Josua kêmoatiŋ poac gêwiŋ’ lau ma kêmasaŋ biŋsu to ŋagôliŋ kêtu êsêacŋa aŋga Sikem.

²⁶Ma Josua keto biŋ tonaŋ kêsêp Anôtônê biŋsu ŋabuku. Ma eŋ kêkôc poc kapôêŋ teŋ jagêjac sa aŋga kamem, taŋ kêkô Apômtaunê gamêŋ dabuŋ naŋ ŋalabu.

²⁷Ma Josua kêsôm gêdêŋ lau samob gebe “Alic acgom, poc tonec êtu ŋabelo êwa aêac saŋa, gebe gêŋô Apômtaunê biŋ samob, taŋ eŋ kêsôm gêdêŋ aêac naŋ gêwiŋ. Kêtu tonaŋŋa amac embe ansa nêm Anôtô auc, go poc tau êtu ŋabelo êwa amac saŋa.”

²⁸Go Josua kêsakiŋ lau sêc sêja nêŋ nomlênsêm gêdêŋ-gêdêŋgeŋ.

²⁹Biŋ tonaŋ gêbacnê, go Apômtau nê sakiŋwaga Nun latu Josua gêmac êndu. Ênê jala kêtu 110.

³⁰Ma êsêac sêsuŋ eŋ aŋga tau nê nomlênsêm ŋamalac Timnat-Serat, taŋ gêc lôc Gas ŋagamêŋ gêmu kêpiŋa aŋga Epraim ŋagamêŋ lôcŋa.

³¹Ma lau Israel sêjam sakiŋ Apômtau gêdêŋ bêc Josua gêmoa mata jaliŋa samob. Eŋ gêmac êndu su ma laumata ŋagêdô, taŋ sêlic kôm, taŋ Anôtô gêjam kêpi lau Israel naŋ, gacgeŋ sêmoa. Tec lau Israel sêjam sakiŋ Apômtau gêdêŋ laumata tonaŋ nêŋ bêc sêmoa mateŋ jaliŋa samob amboac tonaŋgeŋ.

³²Josepnê ŋatêkwa, taŋ lau Israel sêkôc aŋga Aiguptu sêmêŋ naŋ, sêsuŋ aŋga Sikem kêsêp nom, taŋ Jakob gêjam ôli ŋa mone silber 100 gêdêŋ Sikem tama Hamor latui naŋ, ŋasawa teŋ. Gamêŋ tau kêtu Josepnê wakuc nêŋ nomlênsêm teŋ.

³³Ma Aron latu Eleasar gêmac êndu ma sêsuŋ eŋ aŋga latu Pinehas nê malac Gibea. Êsêac sêkêŋ malac, taŋ gêc Epraim ŋagamêŋ lôcŋa naŋ, gêdêŋ eŋ.