Iosua 10:6-39

⁶Gibeona tataodi headi se hetamaridi Iosua arinai, Giligali eai, edi aba numa‐abi, si ene, Em heaheari debadi eai tabu nimam u nuahi: u saema heula u abihemaurimai, eo u saguimai paana Amoraiti edi Vasavasa gamagaridi oea tupidi eai se mia se oigogoesegama hesabamai.

⁷Giligali eai Iosua i sae tauiala gamagaridi maenaeao, eo tauiala adidiri gamagaridi hinage.

⁸Guiau i ribalau Iosua arinai i ene, Tabu u matausidi: isi nimam eai ea lediva: taba nige tau esau matam eai i toro.

⁹Arinai Iosua i heula, maieona eai i lau e, mara‐i‐tom Giligali eai i sae.

¹⁰Isaraela matadi eai Eaubada i hebaaeadi: Gibeona eai gamagaridi se unuidi, se henaudi Belehorana dobilana eai, Aseka eai hinage se unuidi, i lau e, se lage Makeda eai.

¹¹Isi Isaraela matadi eai se dagodago, se dobi Bete‐horana eai, Guiau gareva eai veu lailaidi i tudobedi potadi eai i lau e, Aseka eai, arinai se mate: tatao vau veu va aridi eai se mate se gamagari: isi Isaraela se lauelepaidi, nige doha.

¹²Asubenana ne Guiau Amoraiti tataodi i mosedi Isaraela tataodi aridi eai Iosua i ribalau Guiau arinai, Isaraela matadi eai i ene, Mahana e u otaesegai Gibeona potana eai; eo navarai e Agaloni arotauna eai.

¹³Mahana abo i otaesegai, eo navarai nige i dalasae hinage, i lau e tatao adi vaiunu se hemaisadi. Iasa ena buka eai vasa va se uri, e nigee? To mahana gareva duaduarina eai i otaesegai, asubena maudoudoina nige i dui.

¹⁴Nige asubena esau mugamugaina eo murimuritana nei doha, tau esau arinana Guiau i ataiei: paana Guiau Isaraela i ialasaguidi.

¹⁵Iosua Isaraela gamagaridi maenaeao se uio edi aba numa‐abi Giligali eai.

¹⁶Vasavasa haligigi va se dago duhana esau eai Makeda eai se bavaeamui.

¹⁷Iosua se heriba, si ene, Vasavasa haligigi va se lobaidi Makeda gudana eai.

¹⁸Iosua abo i ene, Veu nabunabutuadi au buihai guda avana eai, tatao au hetorodi bena se itavataidi.

¹⁹Omi tabu au bava inai, ami vaiunu au henaudi murina eai se dago au lubidi: edi eanua tabu se lagedi paana Guiau emi Eaubada nimamiu eai i lediva.

²⁰I lau e, Iosua eo Isaraela nanatunaeao se iala lautom, tatao se unuidi se gamagari ariri, doha se mate ohi, headi mo se mia se lau edi eanua se ganaidi.

²¹Tatao gamagaridi se uio edi aba numa eai, Iosua arinai, Makeda eai, eo se labini, nige esau avana eai Isaraela i ribahebaaea.

²²Iosua abo i ene, guda avana au soe, Vasavasa haligigi duha eai abo au woeaidima arigu eai.

²³Ena riba se lauvatai, Vasavasa haligigi se woeaidima ia arinai: Ierusalema edi Vasavasa, eo Heberona edi Vasavasa, Iamuta edi Vasavasa, eo Lakisi edi Vasavasa, eo Egalona edi Vasavasa.

²⁴Teina Vasavasa se woeaidi Iosua arinai, Iosua Isaraela tataodi gamagaridi i eogaidi, edi iala kapena maena se lau ia i heribadi, i ene, au laoma gegesigu eai, aemiu teina Vasavasa gedugedudi eai au ututavaidi. Si laoma ia gegesina eai aedi gedugedudi eai se ututavaidi.

²⁵Iosua i heribadi i ene, Tabu au matausi, tabu aruamiu se loi, au adidiri eo au nuakipikipi, ina doha hinage Guiau abo i abi ami vaiunu gamagaridi aridi ena.

²⁶Murina eai Iosua i lubidi, eo i unuidi oeagi haligigi aridi eai i hegadosohadi, se ota i lau e, i maimailahi.

²⁷Mahana i dui Iosua i lauhesomdi, oeagi eai se abihaidi, se gabalaedi vau duha va alona eai, arinai se bavaeamui veu nabunabutuadi duha avana eai se toredi, hinage nei eai se ota i laoma e asubena ta.

²⁸Nei asubenana ne Iosua Makeda i abi i lauelepaidi, edi Vasavasa hinage i unui, isi tatao gamagaridi, nige esega i mia: ena laulau Makeda edi Vasavasa arinai doha hinage ena laulau Ieriko edi Vasavasa arinai.

²⁹Iosua eo Isaraela gamagaridi maenaeao Makeda se laugabaei se lau Libina, Libina se ialaidi.

³⁰Guiau Isaraela nimadi eai Libina i mosei, eo edi Vasavasa hinage: se lauelepaidi, tatao gamagaridi boeana eai si unuidi; nige tau esau arinai ie mia: ena laulau edi Vasavasa arinai doha hinage ena laulau Ieriko edi Vasavasa arinai.

³¹Iosua, eo Isaraela gamagaridi maenaeao Libina se laugabaei, Lakisi eai se lagema matadi eai se abi‐numa, se ialaidi.

³²Guiau Lakisi Isaraela nimadi eai i mosei, asubena helabuina eai se abi se lauelepaidi, tatao gamagaridi hinage boeana eai se unuidi, doha edi laulau Libina eai.

³³Horama, Gesa edi Vasavasa abo i laoma Lakisi bena i saguidi: Iosua ia hinage, eo ena eanua tataodi i lauelepaidi nige esau i mia.

³⁴Iosua, eo Isaraela gamagaridi maenaeao Lakisi se laugabaei, Egalona eai se lagema, matadi eai se abi‐numa, eo se ialaidi.

³⁵Nei asubenana ne Egalona se abi, se lauelepaidi, tatao gamagaridi eanua boeana eai se unuheohidi, doha hinage edi laulau Lakisi aridi eai.

³⁶Iosua eo Isaraela gamagaridi maenaeao Egalona eai se sae, se lau Heberona eai se ialaidi.

³⁷Heberona se girihai, edi Vasavasa, eo edi eanua gamagaridi, eo tatao gamagaridi boeadi eai se lauelepaidi, nige tau esau ie mia, i hebaaeaaririedi tatao gamagaridi i unuidi, ena laulau doha hinage ena laulau Egalona aridi eai.

³⁸Iosua, eo Isaraela gamagaridi maenaeao abo se uio: se lagema Debiri eai se ialaidi

³⁹Debiri se girihai eo edi Vasavasa, eo edi eanua gamagaridi hinage: se lauelepaidi, tatao gamagaridi se unuidi, nige tau esau ie mia: ena laulau Debiri aridi eai eo edi Vasavasa arinai, doha hinage ena laulau va Libina aridi eai eo edi Vasavasa arinai.