Ibru 2

1

2

3

4

5

6

7

8

9

10

11

12

13

¹I mo ra i wakak sur dat in mur a kum etowo ra dat sa longoro tari. Dat in mur a kum etowo ra, sur gong dat wan gisen gusuni.

²A kum wasiso ra numugu a kum ensel det wasiso talapor nami i tur sikot. Ra taio ke muri o i pitarngat kut, din pitar tar a warkurai na minabalu toromi, ra i elar nam anun a pitarngat.

³Ra i lenra, in pepetlai torom dat, ra dat rosumur gusun a labino pinapam na ulaun a taro ra o God i sa pam tari? Ka dat in kalabor eno lar pas gusun anun a warkurai na minabalu. A pinapam na ulaun a taro, a Labino ut i sa wasiso puaso mugu taru uni. Ma det ra det longoro in nalngano, det upuaso i torom dat lena i lingmulus sakit.

⁴O God i pam a kum ukinalong ma a kum utna na ukisin, ma a kum dekdek na pinapam, ma i tibo susuaro a kum etabor anun a Tokodos na Nion elar ut nam anun a nemnem. Una nun a kum pinapam ra, i ese i lena anun a pinapam na ulaun a taro i lingmulus.

⁵A matok na rakrakon bual ra numur in nanpat, ra uniri dat wasiso uni, o God ke ubek tari utuntudu ina warkurai anun a kum ensel.

⁶Ikut, un ara dino una Buk Tabu, ara i watungi torom o God lenri, “Met a taro, osi mulus met ra u nuk pas met? Sur asau ra u tamtamabat met?

⁷U sa ukis tar met sur met in kis utuntudu ina kum ensel, a nat na du bung kut. U ukukup tar met nama minamar ma a urur,

⁸ma u sa ubek tar a kum utna rop utuntudu ina numet a warkurai.” O God i sa ubek tar dat a taro sur dat in warkurai sur a kum utna rop. I talapor lena, katu utna melet mo ra ke kis utuntudu indat. Ikut, una kum kilalo ri, ka dat tama i utmakai lena a kum utna rop det kis utuntudu indat.

⁹Ikut dat tama o Iesu, i ra o God i unatino pasi sur in natino tan a kum ensel, a nat na du bung kut, sur in mat sur a taro rop. I mat uni o God i maris det. Ikut uniri, dat tama i lena o God i sa ukukup tari nama minamar ma a urur, uni i taramo a ngunungut ma i mat.

¹⁰O God i ukis tar a kum utna rop suri ut, ma i nemi sur in ben pas a susut na nutnutunu sur det in rakon pas a minamar. I mo ra i tokodos sur in mulaot tar o Iesu sur in taramo a ngunungut, sur in papos a kisapi sur o God in ulaun pas det.

¹¹O Iesu tomo nama taro ra i rus talapor pas det gusun anundet a kum sakino petutna, det ara Tamandet kut. Iri a kibino ra o Iesu ke maimai sur in watung det, a kum tistisino.

¹²Ma i watungi torom o God lenri, “An wasiso talapor un ui torom a kum tistising, ma an kelekele na watung ulabo pas ui epotor tan a taro na lotu.”

¹³Ma i watungi kai lena, “An nurnur ut un o God.” Ma i watungi utkai lenri, “Tama i, iau kuri, iau nama kum nat liklik ra o God i sa pitar tar det tang.”

¹⁴A kukurai ina kum nat liklik ra, a kum mulusino ut. Ma o Iesu kai i wanpat a mulusino, a pinino ma a gapino ut. I pami lenra sur una nun a minat in ban laulau ru o Satan, i ra i utur ukai a dekdekin a minat.

¹⁵O Iesu i mat sur in ulangolango det ra a nginara na minat i ker det una nundet a kum bung na nilaun rop.

¹⁶I lingmulus sakit, o Iesu ke pam a pinapam ri sur in warut a kum ensel, awu. I pami sur in warut a kum tumtubun o Abaram.

¹⁷Iri a kibino ra o Iesu i wanpat elar ut nama kum tistisino una kum utna rop, sur in mugumugu na tene etabor torom o God ma una nun a pinapam ra torom o God, in ese a marmaris torom a taro, ma a lingmulus na petutna. In pitar anun a nilaun sur in mat, ma o God in unus ru a kum sakino petutna anun a taro, ma in urop ru anun a kankan ma ken kankan melet mo torom det.

¹⁸O Iesu i pet lari sur in warut det ra di lar det, uni o Iesu kai di lari ma i taramo a ngunungut uni.