Ibraawe 2

1

2

3

4

5

6

7

8

9

10

11

12

13

¹Hessa gish nuni siyida qaalappe balettidi kundonta mala nu siyida qaala lo7ethi naaganas bessees.

²Aazas giikko kase kiitanchata baggara yootetida qaalay tumu gidida he qaala yedhi aadhdhiday baas bessiza qixaate ekees.

³Nu qasse hessa mala gita maaroteth coo lep histikko waani attanee? Hayssi maarotethay koyro Goda baggara nuus yootetides. Izappe siyidaytikka nuus geeshi yootida.

⁴Xoossi qasseka malatata, malalisiza miishata, dumma dumma malatata oosoninne ba shene mala immida Xillo Ayana imotata baggara ista markatetha minthides.

⁵Xoossi hayssa nu iza gish haasayiza buro yaana alameza kiitanchas haarsibenna.

⁶Gido attin Geeshsha Maxaafay harason “Ne izas yuusha qoppanas asi aazee? Izas ne qoppanas asanay izi aazee?

⁷Ne iza kiitanchatappe guuthara guuthadasa. Boncho zawudenne galata iza hu7en wothadassa. Neni iza ne kushe oosota bolla shuumadas.

⁸Ne wursaka iza toho garsan haarisadassa; Xoossi ubbaakka izappe garsara izas haarisishin attiday ay miishikka deenna. Gido attin ha7i qasse wurikka izas haarettishin nu beybeekko” gides.

⁹Gido attin Xoossa kiyatethan asa ubba gish hayqqanas kiitanchatappe guutha wode guuxida Yesusi waaye hayqo hayqqidi ha7i bonchonne galata zawude ba hu7en woththidayssa nu beyoos.

¹⁰Hanizay wurikka izappe izas medhetida Xoossi daro nayta bonchos efanas ista maarotethas hu7e gidida Yesusi waayen polanas koshizaz gidides.

¹¹As geeshizaynne izan geeyiza asay heyti issi keeththa asata. Hessa gish Yesusi ista “Ta ishato” gi xeeyganas yellatenna.

¹²“Tani ne sunthan ta ishatas yootana shiiqida dereza sinthan nena galatiza yeth ta yexana.”

¹³Hessathoka “Ta izan ammanettana” qasseka “Taninne taas Xoossi immida nayti nu haan doos” gees Geeshsha Maxaafay.

¹⁴Naytas ashoynne suuthi diza mala izikka ista mala asa. Hessika hayqo bolla izas wolqay diza dabulosa izi ba hayqo wolqan zaaranassa.

¹⁵Hessathoka ba diza wode ubban hayqos babon haaretti qashetidayta hayqoppe wozanassa.

¹⁶Izi ha yiday kiitanchata maaddanas gidonta Abrahaame zerethata maaddanas yides.

¹⁷Hessa gish ubba baggara izi ba ishata misatanas bessizaade gidides; izi hessa ooththiday maarizadenne ammanettida waanna Qeese halaqa gididi Xoossas ooththanassinne dereza nagarappe maaranassa.

¹⁸Izi ba hu7en paacetidi meto ekkida gish paacetizayta maaddanas dandayees.