1Lɛ̃ nnyɑ kɑi pisɛ rɛ tɔkɛ́ mɛyɑ́nsei mmɛ̃ kɑri n kṍ nɛ kutu n cɔlɛ̃, ɑ́ri kɑpɛ nɛ ncée m pɔ nnyɑ.
2Nsímɛ́ kɛ Uléécɑɑ uú nɛ piléécɑɑtumɛ nnɔɔ n símisi yɛ mpikɛi wɑlɛ. Nkó yɛɛ úu kutu n tińcɔ nɛ́ɛ úu m m pɑkɑrɛ, yɛ ɑkpɑnii nyɛɛ nɛ u n sɑ́ yɛ́nlɛ.
3In lɛ̃, íye kɑri yɛ́ fe ɑri ŋmɛ́hɛrɛɛ, in tɛ ɑ́ri ń-yulɑlɛsimɛ́ píimɑ mmú kpísi tɔkɛ́ wɑisɛ linyinɛ? Upíimɑ ricuruu yɛɛ ń-yulɑlɛsimɛ́ mmɛ̃ pisímɛ́ kórɑɑnɛ, pɛpɛɛ n kṍ un símisi ɑpi rɔ́ mɑɑ rɛ ɑsei yɛ nyɛ.
4Uléécɑɑ pɔ́ɔ kɔ mɛwɑisɑŋɑ nɛ mɛwɑi píimɑ mpehẽ mpehẽ wɑpisi uú nɛ nyísɛ rɛ lɛ̃ kɑpi ḿ mɑ yɛ ɑsei lɛ. Uu kɔ Unfɑɑsɔnɛ lihɛɛhɛɛ pi hɔɔnɛ yɑrɛ kuu ń lɑ uú nɛ lɛ̃ pi símisi.
5Asei kɛcɑ́ɑ́, ɑ́i piléécɑɑtumɛ kɛ Uléécɑɑ uu kɛtẽ kɛɛ mɑsí kɛpirɛ n wemɛ pɑ rɛ pikɛ́ kɛkɛcɑ́ɑ́ m pɑílɛ̃. Kɛnsímɛ́ kɑri nní we tɔn símisi.
6Amɑ́ unyinɛ yɛ Nléécɑɑsimɛ́ kɛlõ kɛnyinɛ-i mɑɑ rɛ: Yo kɑpi yɛ sée rɛ usoi pɔkɛ́ nɛ ukɛcɑ́ɑ́ n léisɛ? Yo kɑpi yɛ sée rɛ kɛsoipipi pɔkɛ́ nɛ kɛkɛcɑ́ɑ́ ḿ pɑílɛ̃?
7Pɔ u wɑlɛ ɑɑ tíyɛsɛ un ituŋɛ keri inyinɛ kɛ́mɛɛ piléécɑɑtumɛ mɛtene we nkɑ́ripi. Pɔ ripɔ́yɔ́ɔpikɔŋ u rikipisɛlɛ ɑɑ ríyu u wɑisɛ. Pɔ u tonsɛlɛ rɛ ukɛ́ lɛ̃ kɑɑ n wɑ kɛcɑ́ɑ́ m pɑílɛ̃.
8Pɔ ḿpɑ́ yo uɑnipɛ-i wɑlɛ. Uléécɑɑ yɛ́ ḿpɑ́ yo uɑnipɛ-i n wɑilɛ̃, líkɑ mpuri ɑ́i kɔ we kúu uɑnipɛ-i m múílɛ̃. Ḿpɑ́ nɛ lɛ̃, ɑ́ri kɑhɑnɛ n yɛ̃ tɛ pi ḿpɑ́ yo uɑnipɛ-i wɑ.
9Amɑ́ tɔ nkpéni yɛ́nlɛ rɛ Yeesu kɛ Uléécɑɑ uu ituŋɛ keri inyinɛ kɛ́mɛɛ n tíyɛsɛ un piléécɑɑtumɛ mɛtene we yɛ nkpéni riyɔ́ɔpikɔŋ tikipilɛ uu kɔ ríyu yɛnu, nkpɔ kuú nɛ íwɛ n li uú nɛ kpi nnyɑ. Kɛfɑ kɛ Uléécɑɑ uú nɛ u n fénnɛ nnyɑ kuu lɛ̃ pisoi nnɛ́í riyu kɛcɑ́ɑ́ kpu.
10Asei kɛcɑ́ɑ́, Uléécɑɑ yɛɛ ḿpɑ́ yo wɑ lin uɑnipɛ-i we. U kɔ lɑ rɛ sisoipipi kulúi sikɛ́ uiyɔɔpi kɛ́mɛɛ lompɔ. Kɑi nní rɛ Yeesu yɛɛ yɛ siriyu lɔ nnyɑ, li nɛ risɑ́ rɛ Uléécɑɑ ukɛ́ íwɛ u lukɛisɛ ukɛ́ n nyɑḿ nɛ kɛ́tɔ-pɔ ukɛ́ nɛ sisoipipi kulúi uiyɔɔpi kɛ́mɛɛ ń hɑpɔ nnyɑ.
11Uyɛ̃ Yeesu yɛɛ yɛ pisoi ɑkópɛ n hɛɛrɛ nɛ pɛ̃ ɑkópɛ kuu n hɛɛrɛ yɛ usɑ́ɑ usɛ pikɔ́ lɛ. Lɛ̃ nnyɑ kɑ́i isɛi u we ukɛ́ pi sée rɛ upimɑrɛcɔ.
12Ticuruu u Uléécɑɑ mɑɑ rɛ: Hói Uléécɑɑ! Nɛ́ ripɔ́nyíri pinɛ́mɑ́rɛcɔ símisi. Nɛ́ piicɑ́pinɛ kɛ́mɛɛ pɔ́ pɑkɑrɛntɛ.
13Uu kɔ pimɑ́ɑ kpɑ́ rɛ: Nɛ́ Uléécɑɑ nɛ ritɑ́. Uu kɔ kpɑ́ rɛ: Nɛ́ɛ nkó nté nɛ siwɑ̃́ sɛ̃ kɛ Uléécɑɑ uu nɛ́ ḿ pɑ.
14Siwɑ̃́ sɛɛ sisoipipi lɛ nɛ isoipiŋɛ nɛ mɛsoinyɛ. Lɛ̃ nnyɑ kɛ Yeesu pɔ́ɔ kɔ isoipiŋɛ nɛ mɛsoinyɛ kpísi uu pimɛcɔ umɛcirɛ pɑnsɛsɛ kɛsoipipi, uu kpi uú nɛ unkpɔ mmɛ̃ Setɑni yɛɛ nkpɔ nnɑŋɛ m múílɛ̃ tɛ́kɛ́ɛ́.
15Lɛ̃ kuú nɛ pɛpɛɛ pɛɛ nkpɔ iwɑmɛ nnyɑ piisoi nnɛ́í kɛ́mɛɛ ilɑ́si n tṹ ɑkpɑnii tɔ.
16Asei kɛcɑ́ɑ́, ɑ́i piléécɑɑtumɛ kuu pilɛ̃́ kɑ, ɑmɑ́ Apirɑhɑm sipirɛ̃ kuu pilɛ̃́ kɑ.
17Lɛ̃ nnyɑ kɑi pisɛ rɛ ukɛ́ mɛyíkíyiki nɛ upimɑrɛcɔ mɛnyínɛ n we. Lɛ̃ kuu wɑ uú nɛ pɑnsɛ Uléécɑɑ usinɑ yɛɛ yɛ íwɛ n tẽ́ un kɔ Uléécɑɑ pikɛi nɛ ɑsei wɑi rɛ Uléécɑɑ ukɛ́ nɛ pisoi ɑkópɛ n sɑ́rɛi nnyɑ.
18Li uricuruu peikɛɛlɛ uu íwɛ le. Lɛ̃ nnyɑ kuu yɛ́ kɔ fe uu pɛ̃ kɑi umɛcɔ m peikɛɛ pin íwɛ le comɛ.
